Սփիւռքահայ Երիտասարդը Արցախի ՄԷջ Գտաւ Իր Սէրը

Հայաստան տեղափոխուած իւրաքանչիւր հայրենադարձ իր պատմութիւնը ունի: Ատոնք տարբեր են ու ինքնատիպ, ինչպէս աշխարհի տարբեր երկիրներու մէջ ծնած ու մեծցած հայերը, որոնց Հայաստան  բերած է նման, միեւնոյն ժամանակ այնքան տարբեր ճանապարհներ:

«Հայերն այսօր»-ի ստորեւ ներկայացուած պատմութեան հերոսը յորդանանահայ Կարօ Սերպեկեանն է:

Հայաստան վերադառնալը միշտ մտքիս մէջ եղած է…

Կարօ Սերպեկեան Յորդանանի մէջ տաս տարի հաշուապահ  աշխատած է, նաեւ` երաժշտութեամբ զբաղուած (ճազ խումբի մէջ նուագած), ձայնագրութեան արուեստանոցին մէջ տարբեր աշխատանքներ կատարած:

Ծնած ու ապրած է հայրենիքէն հեռու, սակայն Հայաստան վերադառնալը միշտ Կարոյի մտքին մէջ  եղած է` դառնալով երազանք, որ ամէն կերպ ձգտած է իրականութիւն դարձնել:

Որպէս զբօսաշրջիկ` Հայաստան առաջին անգամ երկու շաբաթով եկած է 2007 թուականին: 2014 թուականին բախտ  վիճակուած է այս անգամ բարեկամի մը հարսանիքին ներկայ գտնուելու:

Մինչ հայրենադարձուիլը` համացանցի միջոցով աշխատանքային փնտրտուքներու մէջ  եղած է, քանի որ որոշած էր անձնական գործ դնել եւ ներդրումներ կատարել Հայաստանի մէջ:

Ի հարկէ, անոր ճանապարհին դժուարութիւններ յայտնուած են. չէ՞ որ իրեն համար Հայաստանը, այնուամենայնիւ, անծանօթ երկիր էր: Ան ծանօթ չէր մարդոց մտածելակերպին, գործող օրէնքներն ու գործարար դաշտը չէր գիտեր, բայց , այդուհանդերձ, չէ ընկրկած…

«Դէպի Հայք» հիմնադրամի ծրագիրը  եղած է վառուող այն ջահը, որուն հետքերով Հայաստան  եկած է:

«Դէպի Հայք» ծրագիրին մասնակցած է այն յոյսով, որ պիտի կարենայ կապուիլ Հայաստանին, աշխատանքային, մասնագիտական փորձ  ունենայ, նոր ընկերական շրջապատ ձեւաւորէ` ոտքի վրայ ամուր կանգնելով Մայր հողին: «Դէպի Հայք»-ի կամաւորական ծրագիրը վեց ամիս  տեւած է, որուն ընթացքին աշխատած է Երեւանի եւ Արցախի մէջ:

Հայրս օդակայանի ամբողջ ճանապարհին զիս կը համոզէր ետ վերադառնալ…

Հայրենադարձուելու միտքը Կարոյի հարազատներն ու ընկերները «խենթ» ու համարձակ քայլ  համարած են: Հիմնականին մէջ երկու քոյրերը  քաջալերած են: Մայրը Աստուծոյ կամքին  ձգած է տղուն որոշումը, իսկ հայրը ըսած է, որ ան տնօրինէ իր կեանքը: Սակայն ամբողջ ճանապարհին` մինչեւ օդակայան հասնիլը, փորձած է համոզել ետ վերադառնալ, սակայն Կարոն չէ «յանձնուած»:

«Ծնողքիս անհանգստութիւնը ինչ-որ տեղ հասկնալի էր ինծի համար. Յորդանանի մէջ կայացած էի, աշխատանք ունէի եւ յանկարծ այդ ամէնը ձգելով` անյայտութեան ուղիով կ’որոշեմ Հայաստան գալ` նոր էջով կեանքս սկսելու»,-անկեղծութեամբ կ’ըսէ Կարոն` աւելցնելով, որ հոգիի ձայնին  հետեւած է եւ Աստուած  Հայաստան գալու ճանապահը բացած է իր առջեւ. Կը զգար, որ ամէն ինչ լաւ պիտի ըլլայ:

 

Միանգամէն սիրահարուեցայ Արցախին…

Կարոն նպատակ ունէր ապրելու Երեւանի կամ Դիլիջանի մէջ: Սակայն մտադրութիւնը հիմնովին փոխուած է, երբ «Դէպի Հայք» հիմնադրամի 4 շաբթուան կամաւորական ծրագիրով Արցախ գացած է:

Սփիւռքահայ  երիտասարդը  երբէք չէր այցելած   Արցախ, ուստի միանգամէն համաձայնած է երթալ, սակայն մտքով  երբէք չէր ալ անցներ, որ Արցախի մէջ խոր արմատներ պիտի դնէր:

Կարոն շատ հաւնած է Ղարաբաղը. իւրատեսակ հարազատ եւ հոգեւոր միջավայր ստեղծուած է շուրջը այն աստիճանի, որ մտածած է Արցախի մէջ որեւէ գործ նախաձեռնել:

Երեւան գալով` գինետուներէն  մէկուն մէջ հանդիպած է իր ընկերներէն մէկուն` զբօսավար Նաիրա Իսրայէլեանին, եւ երկուստեք քննարկման արդիւնքով` որոշած են Արցախի մէջ սրճարան  բանալ:

«Մուկլիմանդիլ» սրճարանի բացումը շառաչուն ապտակ էր ազերիներուն…

«Մուկլիմանդիլ» ղարաբաղեան բարբառով սարդոստայն կը նշանակէ: Այսինքն` կը ցանկանք իւրատեսակ ցանց ստեղծել Հայաստանի, Արցախի եւ Սփիւռքի հայերուն միջեւ, որպէսզի մարդիկ գան եւ իրենց հանգիստը անցնեն գեղատեսիլ Ստեփանակերտի գողտրիկ անկիւնի մը մէջ:Սրճարանը նաեւ իր դռները կը բանայ օտարերկրացիներու առջեւ, որուն միջոցով հնարաւորութիւն կը ստեղծուի աշխարհի մակարդակով Արցախը աւելի ճանաչելի դարձնել:

Սրճարանի մտերմիկ մթնոլորտին մէջ տեղի  կ’ունենան բազմապիսի ձեռնարկներ` գիրքերու շնորհանդէսներ, պարի դասընթացներ, քննարկումներ, դասախօսութիւններ, ֆիլմի դիտումներ եւ այլն:

Սրճարանի բացումը նախատեսուած էր 2016 թուականի Ապրիլին, սակայն յայտնի դէպքերէն յետոյ այն բացուեցաւ Մայիս 16-ին: Ինչպէս կը վստահեցնէ Կարոն, ապրիլեան քառօրեայ պատերազմէն յետոյ հակառակ Արցախի մէջ տիրող ճնշող իրավիճակին` ժողովուրդին կողմէ զարմանալիօրէն ջերմ ընդունելութեան  արժանացած են, որ շատ  յուզած է իրենց:

«Սրճարանի բացումը նաեւ շառաչուն ապտակ էր` ուղղուած ազերիներուն: Կ’ուզէինք ցոյց տալ, որ թշնամին մեզի ծունկի չի կրնար բերել. որքան ալ փորձէ սահմանին սադրիչ գործողութիւններ իրականացնել, մենք աւելի կը համախմբուինք` հզօրացնելու Հայաստանն ու Արցախը»,-նշեց Կարոն:

 

Հայրենադարձութիւնը ամենամեծ պարգեւը տուաւ` իմ բախտս գտայ Մայր հայրենիքի մէջ…

Կարոն անհուն ուրախութեամբ կը խօսի այն մասին, որ հայրենադարձութիւնը իրեն ամենամեծ պարգեւը  տուած է, իր բախտը գտած է Մայր հայրենիքի մէջ:

Սովորական  օր մըն էր, նոյնիսկ յստակ կը յիշէ` չորեքշաբթի, երբ զբօսավար Սիւզաննա Շահնազարեան Երեւանէն զբօսաշրջիկներու խումբ մը բերած էր սրճարան:

Իրարու հետ ծանօթանալէ ետք, կողքի սեղաններուն մօտ նստած երիտասարդներուն հետ ուրախ ընկերախումբ կազմելով`սկսած են զրուցել, նուագել եւ ուրախ ժամանակ անցնել: Այդ հանդիպումն ալ պատճառ  դարձած է, որ անոնց միջեւ զգացում մը ծնի:

«Սիւզաննան մասնագիտութեամբ սրտաբան է, եւ ան յաջողեցաւ «սիրտս գողնալ» ( ծիծաղելով-հեղ.): Եւ տաս օր յետոյ Երեւան գալով` յիշեցի Սիւզաննայի ըսածը եւ զանգահարեցի զինք…»,-ժպիտով պատմեց  Կարոն:

Կարոն ու Սիւզաննան արմատներով Ղարաբաղէն են, եւ գուցէ հէնց արեան կանչն է անոնց, նախախնամութեան շնորհիւ, Ղարաբաղ հասցուցած, որպէսզի այնտեղ անոնք սիրահարուին զիրար, ամուսնանան ու հայկական գեղեցիկ ընտանիք կազմեն:

 Նշենք, որ երիտասարդ զոյգը վերջերս նշանուած է եւ ամառը կը պատրաստուին ամուսնանալ:

«Կարոն պարզապէս երկրորդ ընտրութեան հնարաւորութիւն չտուաւ, ան սէր խոստովանեցաւ  եւ ըսաւ` որքան անհրաժեշտ է, կը սպասէ պատասխանիս: Ի հարկէ, մարդկային այլ յատկանիշներով եւ քայլերով ալ գրաւեց ուշադրութիւնս. շատ գեղեցիկ ռոմանտիկ առաջարկութիւն ըրած է (իրար նայելով` կը ծիծաղին-հեղ):

Աշխատանքի բերումով պարբերաբար շփուելով սփիւռքահայերու հետ` առանձնայատուկ վերաբերմունք  ունեցած եմ անոնց նկատմամբ: Միշտ հիացած եմ սփիւռքահայերու հայրենասիրութեամբ ու ազգային պատկանելիութեան վառ դրսեւորումէն:

Ի վերջոյ, Կարոյին հանդիպելով` հրաժարեցայ հեռանալ Հայաստանէն. արտերկրէ աշխատանքային տարբեր առաջարկներ ունէի, բայց Կարոն աչքերս բացաւ` ըսելով.«մի երթա՛ր, մնա՛յ Հայաստանի մէջ եւ գնահատէ՛ ունեցածդ»,-ըսաւ Սիւզաննան:

Կարոն Հայաստանէն հեռացող մարդոց խորհուրդ կու տայ սթափ ուղեղով մտածել` արդեօ՞ք ճիշդ կը վառուին, թէ՞ ոչ, նոր միայն այդ քայլին երթան:

Հայաստանի մէջ, ի հարկէ, դժուարութիւններ կան, բայց, ինչպէս Կարոն  խորհուրդ  կու տայ, պէտք է հասկնալ, ուր ալ երթան` այդ դժուարութիւններուն պիտի բախուին:

Ան «Green card»  շահած է,  քանի մը անգամ գացած է  Ամերիկա, տեսած է ամերիկեան շքեղ կեանքն ու հիմա առանց մէկ վայրկեան տատանելու` կ’ըսէ, որ Հայաստանը իրեն համար միլիոն Ամերիկա արժէ` իր առաւելութիւններով ու թերութիւններով: Մաքուր օդը, համեղ ուտելիքներն ու քաղցրահամ միրգերը երբեք չես գտներ Ամերիկայի մէջ:

 «Հայ նոր սերունդը շատ խելացի ու կազմակերպուած է: Միանշանակ կրնանք յոյս դնել  անոնց վրայ. մեր երիտասարդներուն շնորհիւ` Հայաստանի ապագան լուսաւոր պիտի ըլլայ: Մնանք ու շէնացնենք Հայաստան աշխարհը»,-լաւատեսական տրամադրութեամբ զրոյցը ամփոփեց Կարօ Սերպեկեան:

Գէորգ Չիչեան

 

 

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>