Մեր Կորուստները. Ոչ Եւս Է Աշոտ Ճենտերէճեան

Երէկ իր մահկանացուն կնքեց Համազգայինի «Բարսեղ Կանաչեան» երաժշտանոցի նախկին տնօրէն Աշոտ Ճենտերէճեան:

Աշոտ Ճենտերէճեան ծնած է Երեւան: Աւարտած է Չայքովսկիի անուան երաժշտական միջնակարգ դպրոցը: 1976-ին աւարտած է Երեւանի Կոմիտասի անուան պետական երաժշտանոցի ջութակի դասարանը, ուսանելով ժամանակի ականաւոր փրոֆեսէօրներու մօտ: Աւելի ուշ վկայուած է նոյն երաժշտանոցի սիմֆոնիք-օփերային բեմադրութեան բաժինէն:

1960-ականներուն, եղբօր` Արմէնի հետ հիմնած է «Ճենտերէճեան տուեթ»-ը, որ համերգներով հանդէս եկած է նախկին Խորհրդային Միութեան տարբեր երկիրներու, ինչպէս նաեւ Եւրոպայի եւ Մերձաւոր Արեւելքի շատ երկիրներու բեմերուն վրայ:

Ծննդեան 50 եւ ստեղծագործական գործունէութեան 30-ամեակին առիթով Ճենտերէճեան եղբայրները պարգեւատրուած են Հայաստանի Հանրապետութեան մշակոյթի նախարարութեան պատուոյ գիրով:

2003 թուականին Արցախի մշակոյթի նախարարութիւնը Աշոտ Ճենտերէճեանը, 15 այլ երեւանցի երաժիշտներու հետ, կը հրաւիրէ Ստեփանակերտ` հիմնելու Արցախի պետական սենեկային նուագախումբը: 2007-ին նախարարի հրամանով ան կը գործուղուի Բերձոր (Լաչին), ուր կը ստանձնէ երաժշտական դպրոցի փոխտնօրէնի եւ ժողովրդային գործիքներու պետական նուագախումբի ղեկավարի եւ տնօրէնի պաշտօնները:

2011-2016 թուականներուն, ընդառաջելով Համազգայինի Լիբանանի Շրջանային վարչութեան հրաւէրին, վարած է «Բարսեղ Կանաչեան» երաժշտական քոլեճի տնօրէնութիւնը:

Այս ընթացքին երաժշտանոցի սաները գործուն մասնակցութիւն ունեցած են լիբանանահայ գաղութի մշակութային կեանքին մէջ` իրենց մասնակցութիւնը բերելով Պէյրութի, Այնճարի եւ Թրիփոլիի տարբեր համերգասրահներու մէջ, եռանդուն եւ մշտական մասնակցութիւն ունեցած են Հայոց ցեղասպանութեան 100-ամեակի ոգեկոչման հետ կապուած շարք մը ձեռնարկներու, ինչպէս նաեւ Կիլիկիոյ կաթողիկոսութեան դպրեվանքի սաներուն համար:

8 ապրիլ 2016-ին Մեծի Տանն Կիլիկիոյ Արամ Ա. վեհափառ հայրապետը «Ս. Մեսրոպ Մաշտոց» շքանշանով պարգեւատրեց Աշոտ եւ Արմէն Ճենտերէճեան եղբայրները:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button