Հայաստան-Սուրիա Դիւանագիտական Յարաբերութիւններու 25-Ամեակին Առիթով Երեսփոխան Նորա Արիսեանի Խօսքը` Սուրիոյ Խորհրդարանի Ամպիոնէն

«Բերիոյ նիուզ»-ը կը հաղորդէ, որ երկուշաբթի, 6 մարտ 2017-ին երեսփոխան դոկտ. Նորա Արիսեան, Սուրիոյ խորհրդարանի նիստին, Հայաստանի եւ Սուրիոյ միջեւ դիւանագիտական յարաբերութիւններու հաստատման 25-ամեակին առիթով, արտասանեց ստորեւ տրուած խօսքը:

1991-ին, Հայաստանի Հանրապետութեան անկախացումէն ետք, շատ մը երկիրներ սկսան ճանչնալ Հայաստանի անկախութիւնը, անոնց կարգին` Սուրիա, Լիբանան եւ այլ արաբական երկիրներ, որոնք հետաքրքրութիւն ցուցաբերեցին նորանկախ Հայաստանի Հանրապետութեան նկատմամբ եւ որոշեցին յարաբերութիւն հաստատել անոր հետ երկու բնագաւառներու` տարածաշրջանային եւ միջազգային մակարդակներու վրայ: Ինչպէս կը սպասուէր, Հայաստանի Հանրապետութեան արտաքին քաղաքականութեան առաջնահերթութիւնը եղան արաբական երկիրները` հայ եւ արաբ ժողովուրդներու առանձնայատուկ յարաբերութիւններու հիման վրայ, ջանալով խթանել պատմական եւ մշակութային յարաբերութիւնները արաբական աշխարհին հետ: Իսկ տնտեսական եւ քաղաքական դժուարին պայմաններուն մէջ Հայաստան ձեռնամուխ եղաւ դիւանագիտական յարաբերութիւններ հաստատելու արաբական երկիրներուն հետ: Օրինական սկզբունքներով եւ համաձայն միջազգային պայմանագիրներու,  համագործակցութեան հիմը դրուեցաւ բոլոր բնագաւառներու մէջ, միջազգային կազմակերպութիւններու ու տարածաշրջանային մակարդակի վրայ: Սուրիան առաջին արաբական երկիրն էր, որ դիւանագիտական յարաբերութիւններ հաստատեց Հայաստանի հետ: Այս մէկուն արտացոլացումն է 6 մարտ 1992-ին Հայաստանի Հանրապետութեան արտաքին գործոց օրուան նախարար Րաֆֆի Յովհաննէսեանի Դամասկոս այցելութիւնը, որուն ընթացքին դիւանագիտական յարաբերութիւններու հաստատման համաձայնագիր ստորագրուեցաւ Հայաստանի եւ Սուրիոյ միջեւ: Այսպիսով հիմը կը դրուէր դիւանագիտական կայուն յարաբերութիւններու, ընթացք կը տրուէր երկկողմանի կապերու նոր հանգրուան մը` Սուրիոյ եւ Հայաստանի միջեւ, հիմնուած երկու ժողովուրդներու եւ պետութիւններու միջեւ փոխադարձ վստահութեան վրայ, ղեկավարուելով միջազգային օրինականութեան հիմունքներով:

1992-ի նոյեմբերին Հայաստանի կառավարութիւնը որոշում կայացուց առաջին դիւանագիտական ներկայացուցչութիւնը հաստատել Դամասկոսի մէջ, անոր պաշտօնական բացումը կատարուեցաւ 1993-ի ապրիլին: Սուրիան ալ իր հերթին աշխուժացուց Հայաստանի հետ դիւանագիտական յարաբերութիւնը: 1997-ի մայիսին Սուրիոյ դեսպանատունը սկսաւ գործել Հայաստանի մէջ:

Կ՛ողջունենք բոլոր անոնք, որոնք մասնակից եղան Սուրիոյ եւ Հայաստանին միջեւ դիւանագիտական յարաբերութիւնները հիմնելու եւ զարգացնելու առաքելութեան, մանաւանդ արտաքին գործոց նախարարութիւնները:

Այս ամպիոնէն կը հաստատենք, որ երկու խորհրդարաններուն միջեւ համագործակցութեան եւ բարեկամական յարաբերութիւնները պիտի շարունակենք` խորհրդարանի արտաքին հարցերու յանձնաժողովի եւ Սուրիա-Հայաստան բարեկամական յանձնաժողովին միջոցով:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button