Սիրելի ուսուցիչներ Ձեր տօնը շնորհաւոր

Շատ քիչ անգամ կը գրեմ անձի մը մասին: Այսօր պարտք կը զգամ յարգանքի տուրքս մատուցել բոլոր ուսուցիչներուն՝ իրենց տօնին առիթով: Հալէպահայ ուսուցիչները հրաշք գործեցին տագնապի այս տարիներուն, անոնք առաջուան նման խստապահանջ գտնուեցան նախ եւ առաջ իրենք իրենց հանդէպ: Դպրոց յաճախեցին նոյնիսկ երբ հրասանդներ կը տեղային: Անոնք իրենց վախը թաքցուցին եւ կորով հաղորդեցին իրենց աշակերտներուն, եւ սակայն պահանջեցին դասերը պատրաստել նախկինի նման, մինչ բազմաթիւ այլազգի պատանիներ փողոցները կը չափչփէին ու կրթական տնօրէնութեան կարգադրութեամբ ուսումնական տարին կը բոլորէին «յաջողութեամբ» եւ կը փոխադրուէին դասարանէ դասարան:

Կեցցեն մեր ուսուցիչները: Ըսի թէ քիչ անգամ կը խօսիմ անհատի մը մասին, սակայն չեմ կրնար լուռ մնալ ի տես Հայ ուսուցիչի մը, ի տես հայերէն լեզուի ինծի ծանօթ ուսուցիչի մը: Ուսուցիչ մը համայնագիտարան պէտք է ըլլայ: Ուսուցիչ մը ո՛չ միայն պէտք է տիրապետէ իր ուսուցած նիւթին այլ նաեւ յարակից նիւթերուն: Հայերէնի ուսուցիչ մը պէտք է ամէն օր հետեւի հայկական բոլոր հարցերու ընթացքին եւ զարգացումներուն, պէտք է հետեւի մեր շրջապատի դէպքերու ընթացքին եւ ունենայ իր ինքնուրոյն դիրքորոշումը: Ուսուցիչ մը ինքնավստահօրէն պէտք է գործէ ըլլայ: Ուսուցիչ մը պէտք է ջանայ իրապէս սորվեցնել իր նիւթը: Ուսուցիչը պէտք է ցաւի իր անտարբեր աշակերտի վարքին համար եւ ցնծայ իր յաջողակ աշակերտին իր նիւթին հանդէպ ունեցած վերաբերմունքէն: Ուսուցիչ մը պէտք է սիրէ իր աշակերտները, շատ սիրէ:

Որպէս մարդ շիտակ պէտք է ըլլայ ուսուցիչը: Այսքանը: Ես կը ճանչնամ այսպիսի ուսուցիչ մը: Լ. Ն.-Գ.Կ. Կեդրոնական վարժարանի հայերէնի ուսուցիչ պարոն Լեւոն Շառոյեանն է ան: Սիրելի ուսուցիչներ Ձեր տօնը շնորհաւոր:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL