2017ին Ռուսահայ Գործարարները 300 Միլիոն Տոլար Պիտի Ներդրեն Հայաստանի Տնտեսութեան Մէջ

ԵՐԵՒԱՆ, 168.am.- Հայաստանի վարչապետին եւ Մոսկուայի յայտնի գործարար, «Տաշիր» ընկերութիւններու խումբի ղեկավար Սամուէլ Կարապետեանի յայտարարած «Հայաստանի ներդրողների ակումբ» հիմնադրամը 2017ին կը նախատեսէ իրականացնել 300 միլիոն տոլարի ներդրումային ծրագիրներ:

Ուժանիւթի ենթակառուցուածքներու եւ բնական պաշարներու նախարար Աշոտ Մանուկեան, Հինգշաբթի, 13 Ապրիլին, կառավարութեան նիստէն ետք լրագրողներու հետ ունեցած զրոյցին ընթացքին այս ներդրումային ծրագիրներուն մասին խօսելով՝ ներկայացուցած է կառավարութեան եւ «Հայաստանի ներդրողների ակումբ» փակ ոչ-հրապարակային պայմանագրային ներդրումային հիմնադրամին միջեւ ստորագրուելիք ռազմավարական նշանակութիւն ունեցող ծրագիրներու համատեղ իրականացման մասին փոխըմբռնման յուշագիրի նախագիծը, որ հաստատուած է գործադիր իշխանութեան կողմէ:

Ըստ Մանուկեանի՝ կառավարութեան եւ հիմնադրամի համագործակցութեան հիմնական ուղղութիւնները հետեւեալներն են՝ զբօսաշրջութեան ենթակառուցուածքներու եւ ծառայութիւններու զարգացումը, ուժանիւթի արտադրութեան ենթակառուցուածքներու զարգացումը, հանքարդիւնաբերութեան զարգացումը, քաղաքային ենթակառուցուածքներու եւ ծառայութիւններու զարգացումը եւ մշակող արդիւնաբերութեան զարգացումը:

Վարչապետ Կարէն Կարապետեան ընդգծեց հիմնադրամի գործունէութեան կարեւորութիւնը ոչ միայն ներդրումներու ներգրաւման, այլ նաեւ գործարար նոր մշակոյթ ներդրելու առումով:

«Ֆոնդի անդամները բաւականին ճանաչուած, յաջողակ բիզնեսմեններ են, ունեն լայն կապեր բազմաթիւ երկրներում, ունեն բազմաթիւ գործընկերներ, հանդիսանալու են կամուրջ մեր եւ այդ երկրների, ֆինանսական աղբիւրների միջեւ: Բացի դրանից, նրանց մուտքը Հայաստան՝ հանդիսանալու է որոշակի ազդակ գնահատող կառոյցների համար: Այդ առումով, մաքսիմալ (առաւելագոյն-Խմբ.) աջակցութիւն ենք ցուցաբերելու ֆոնդի կայացմանը ու մաքսիմալ սերտ աշխատելու ենք», յայտնեց վարչապետը:

Հիմնադրամը կառավարութեան գործընկեր պիտի ըլլայ՝ «պետութիւն-մասնաւոր հատուած» գործակցութեան իրականացման գործին մէջ, ներդրումային ծրագիրներուն պիտի մասնակցի սեփական միջոցներով՝ կիսելով վտանգները: Հիմնադրամը պիտի դառնայ արտաքին ներդրումներու ներգրաւման ազդակ՝ ստեղծելով խոշոր նախագիծերու ֆինանսաւորման իրական հնարաւորութիւն՝ նպաստելով տնտեսական աճի թափի արագացման եւ նոր աշխատատեղերու ստեղծման:

«Հայաստանի ներդրողների ակումբ» ոչ-հրապարակային պայ-մանագրային ներդրումային հիմնադրամին մաս կը կազմեն շուրջ երեսուն հայ գործարարներ, որոնք ընդառաջած էին վարչապետ Կարէն Կարապետեանի հրաւէրին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button