Գարեգին Արք. Պէքճեան Վերադարձաւ Պոլիս

ՊՈԼԻՍ.- Պատրիարքական ընտրեալ տեղապահ Գարեգին արք. Պէքճեան երէկ (Չորեքշաբթի, 12 Ապրիլին-Խմբ.) Մարսէյլէն վերադարձաւ Պոլիս եւ այս օրերուն իր մասնակցութիւնը կը բերէ Աւագ շաբթուան եւ Ս. Զատիկի արարողութիւններուն: Այս առաւօտ ան Ընթրեաց Ս. պատարագ մատոյց Եշիլգիւղի Ս. Ստեփանոս եկեղեցւոյ մէջ: Ինչպէս ծանօթ է, Պոլիս վերադառնալէ առաջ Գարեգին արք. Պէքճեան պոլսահայ մամլոյ եւ հասարակութեան ուշադրութեան ներկայացուցած էր նամակ մը, որուն մէջ ածանցուած ձեւով հրապարակած էր նաեւ պատրիարքական ընդհանուր փոխանորդ Արամ արք. Աթէշեանի կողմէ իրեն ներկայացուած համաձայնութեան նախագիծին բովանդակութիւնը: Պէքճեան սրբազան այդ նամակի բովանդակութեան մէջ տեղեկացուցած էր, որ վերջնականօրէն կը մերժէ Արամ արք. Աթէշեանի առաջարկած համաձայնութեան նախագիծը, կը գրէ Պոլսոյ «Ժամանակ» թերթը:

«Այս կապակցութեամբ կարծիքը շօշափեցինք Արամ Արք. Աթէշեանի, որ այս առաւօտ Ընթրեաց Ս. պատարագը մատոյց Պաքըրգիւղի Ծն. Ս. Աստուածածին եկեղեցւոյ մէջ: Նորին սրբազնութիւնը ցաւ յայտնեց, որ պատրիարքական աթոռին շուրջ ստեղծուած տագնապի յաղթահարման տեսակէտէ առիթ մը մսխուած էր: Անդրադառնալով Գարեգին արք. Պէքճեանի նամակի բովանդակութեան մանրամասնութիւններուն՝ ընդհանուր փոխանորդը յայտնեց, որ Սուրբ Փրկիչ Ազգային հիւանդանոցին մէջ ժամադրուելու ատեն ինք բացայայտօրէն նշած էր, թէ գրաւոր առաջարկի մը տեսքով համաձայնութեան նախագիծ մը պիտի ներկայացնէ Գարեգին արք. Պէքճեանին: Դժբախտաբար, ընտրեալ-տեղապահը կը նախընտրէ այս հանգամանքը անտեսել իր վերջին յայտարարութիւններուն մէջ», կը պատմէ «Ժամանակ»ը :

Արամ Արք. Աթէշեան մեկնաբանեց նաեւ Գարեգին արք. Պէքճեանի այն դիտարկումը, թէ ինք կը փորձէ օրինականացնել պատրիարքական ընդհանուր փոխանորդի պաշտօնէն չհրաժարելու յամառութիւնը: Արամ արք. Աթէշեանի խօսքերով՝ ցաւալի է, որ այդպիսի անձնական յամառութիւններու տեսքով մեր ժողովուրդին կը մատուցուի առկայ փակուղին, ինչ որ բնականաբար կը դժուարացնէ անոր յաղթահարումը: «Մենք կը փորձենք հասնիլ մեր եկեղեցական իրաւունքի եւ պետութեան սպասումներու համադրութեան: Այս նոյն նպատակով պատրաստած էինք այն համաձայնութեան նախագիծը, որ մերժուեցաւ Գարեգին արք. Պէքճեանի կողմէ: Այդ համաձայնութեան նպատակներէն մին էր նաեւ մեր Եկեղեցականաց համագումարի հեղինակութեան բարձր պահուիլը: Եթէ Գարեգին արք. Պէքճեան համաձայնէր ընդառաջ երթալ այդ նախագծին, ապա մենք մեր միջեւ գոյացած համաձայնութեան հիման վրայ նոր քայլեր առնելու հնարաւորութիւնն ալ կրնայինք ունենալ: Այդպիսի համաձայնութեան մը նորութեան վրայ, շօշափելի լուծման արդիւնքը տեղեկացնելու համար, պիտի փորձէինք հերթական անգամ միասնաբար ներկայանալ Պոլսոյ կուսակալութեան: Սուրբ Փրկիչ Ազգային հիւանդանոցի հոգաբարձութեան ատենապետ Պետրոս Շիրինօղլուն ալ պիտի աջակցէր մեզի: Այսպիսով, ես պիտի կարենայի անձամբ պատկան իշխանութիւններուն ներկայացնել ընտրեալ տեղապահը, ինչ որ երաշխիք մը պիտի ըլլար իր գործունէութեան հեռանկարին եւ պաշտօնական մարմիններու կողմէ ապագայ ընկալման տեսակէտէն: Այս բոլոր նրբութիւնները արդէն բացատրած ենք, սակայն դժբախտաբար չկրցանք ունենալ դրական արդիւնք մը: Հետեւաբար, պաշտօնէ չհրաժարելու հարցին շուրջ ինծի վերագրուած յամառութիւնն ու այս հանգամանքին անվերջ կրկնութիւնը՝ առկայ դժուար իրավիճակին մէջ մեր մօտ կը ստեղծէ լրջութեան պակասի տպաւորութիւն», ըսաւ Արամ արք. Աթէշեան:

Ապրիլ 13ի առաւօտեան Արամ արք. Աթէշեան Պոլսոյ Ս. Աստուածածին եկեղեցւոյ, իսկ Գարեգին արք. Պէքճեան Ս. Ստեփանոս եկեղեցւոյ մէջ մատուցեցին Աւագ Հինգշաբթի օրուան պատարագ:

Գարեգին արք. Պէքճեան նախորդ օրերու իր յայտարարութեան մէջ ըսած էր, որ տեղեակ չէ եղած Արամ արք. Աթէշեանի կողմէ Սուրբ Փրկիչ հիւանդանոց կանչուելու իրական մտադրութեան՝ համաձայնագիր ստորագրելու:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>