Թրամփէն Մեր Ակնկալիքը Հայոց Ցեղասպանութեան Հարցով Ազնիւ Դիրքորոշում Ունենալն է. Արամ Համբարեան

«Դեռ կը սպասենք, պէտք է տեսնենք՝ արդեօք Միացեալ Նահանգներու նախագահ Տանըլտ Թրամփ Ապրիլ 24ին պիտի նախընտրէ խօսիլ փաստերո՞ւ լեզուով, թէ տուրք պիտի տայ Թուրքիոյ ճնշումներուն», «Թերթ»ի հետ զրոյցին ընթացքին, խօսելով Միացեալ Նահանգներու նախագահ Տանըլտ Թրամփին ուղղուած Հայոց Ցեղասպանութեան զոհերու յիշատակը ըստ արժանւոյն յարգելու կոչին՝ յայտնեց Ուաշինկթընի Հայ Դատի գրասենեակի գործադիր տնօրէն Արամ Համբարեան, որ նախաձեռնութեան հիմնադիրներէն է:

«Եթէ ան մատնանշէ բարոյական արժէքներու, պատմական փաստերու մասին, ան շատ ճշմարիտ բան պիտի ընէ: Կը նշանակէ, որ ան ըստ արժանւոյն կը յարգէ Հայոց Ցեղասպանութեան զոհերու յիշատակը», ըսաւ ան:

Արամ Համբարեան յայտնեց, որ Միացեալ Նահանգներու մէջ Թուրքիոյ կողմէ գործադրուող ճնշումը որոշիչ կ՛ըլայ միշտ։ Անոնք ամէն ինչ կ՛ընեն, որ Միացեալ Նահանգներու վարչակազմէն ոեւէ անձ չարտասանէ «Հայոց Ցեղասպանութիւն» բառակապակցութիւնը:

«Դեռ ժամանակ կայ, տեսնենք՝ Տանըլտ Թրամփ պիտի հետեւի՞ պատմութեան, փաստերուն, բարոյական արժէքներուն, թէ Թուրքիոյ ճնշումներուն պիտի ենթարկուի», ըսաւ Արամ Համբարեան:

Անդրադառնալով Ամերիկայի նոր նախագահ Թրամփի քաղաքականութեան՝ ան նշեց, որ իրենք հիմա կը փորձեն հասկնալ, թէ ինչպէ՛ս Միացեալ Նահանգներու նոր վարչակազմը կ՛աշխատի, որքան երկրի կառավարումը կ՛առաջնորդուի նախագահի որոշումներով եւ որքան՝ արտաքին գործոց նախարարութեան որոշումներով:

«Մենք դեռ կը փորձենք ատիկա հասկնալ. դեռ ամբողջովին պարզ չէ: Դեռ պէտք է պարզենք, թէ Ամերիկայի նոր վարչակազմին մէջ ինչպէ՞ս աշխարհաքաղաքական, արտաքին քաղաքական եւ այլ հարցերով որոշումները կը կայացուին», ըսաւ ան:

Հարցումին, թէ ինք, իբրեւ հայկական հարցերւ լոպիինկը իրականացնող կառոյցի ղեկավար, ինչպէ՞ս կը գնահատէ Ամերիկայի նոր վարչակազմին հետ աշխատանքներու հնարաւորութիւնը, արդեօք դիւրի՞ն է անոնց հետ աշխատիլը՝ ան պատասխանեց. «Հայ Դատի Ամերիկայի յանձնախումբը միշտ կ՛աշխատի քոնկրեսականներու եւ նախագահին հետ: Ատիկա մեր պարտականութիւնն է: Մենք որեւէ որոշում կայացնելու ատեն կը փորձենք հասկնալ, թէ ինչպէս կրնանք օգնել Հայաստանին: Այդ պատճառով, մենք բոլորին հետ գործ կ՛ունենանք: Եթէ Քոնկրեսի կամ Ծերակոյտի անդամները ուզեն Հայաստանին օգնել, ուզեն ճանչնալ Հայոց Ցեղասպանութիւնը, մենք անոնց հետ կ՛աշխատինք: Մենք կ՛աշխատինք մեր բոլոր խնդիրներուն ուղղութեամբ»:

Արամ Համբարեան, վերադառնալով Ամերիկայի կողմէ Հայոց Ցեղասպանութեան ճանաչման հաւանականութեան նիւթին՝ յայտնեց, որ տարիներ առաջ Թուրքիան շատ աւելի լաւ յարաբերութիւններ ունէր այն մարդոց հետ, որոնք կրնային կանխել Հայոց Ցեղասպանութեան ճանաչումը Միացեալ Նահանգներու մէջ: «Բայց հիմա անոնք չունին այդ յարաբերութիւնները: Բացի ատկէ, Միջին Արեւելքի մէջ այժմ կատարուածը նման է Հայոց Ցեղասպանութեան, եւ ես կը կարծեմ, որ շատ մը ամերիկացիներ ատիկա կը տեսնեն: Նաեւ պէտք է պահել խոստումը՝ Հայոց Ցեղասպանութեան հարցը՝ միշտ Ամերիկայի մէջ ուշադրութեան կեդրոնին պահելով: Եւ պիտի գայ օր մը, երբ Թուրքիան այլեւս պիտի չկարենայ ազդել ամերիկեան քաղաքականութեան վրայ», ըսաւ Համբարեան:

Ըստ անոր՝ անկախ ամէն ինչէ, իրենք կը փորձեն այլ ուղղութիւններով ալ հայկական խնդիրները յառաջ տանիլ: Ան յիշեցուց, որ Ամերիկայի 45 նահանգ արդէն ճանչցած է Հայոց Ցեղասպանութիւնը: Այս տարի, 20 Ապրիլին Ամերիկայի նոր նախագահէն ակնկալիքը մէկ բան է՝ Թուրքիոյ լռեցնելու քաղաքականութիւնը մերժելը ու Հայոց Ցեղասպանութեան հարցով ազնիւ դիրքորոշում ընդունիլը:

Նշենք, որ նոր ընտրուած նախագահ Տանըլտ Թրամփ իր քարոզարշաւին ընթացքին երբեք չէ խօսած հայկական հարցերու շուրջ, Հայոց Ցեղասպանութեան ճանաչման հետ կապուած ոչ մէկ խոստում տուած է:

Ինչպէս նախապէս տեղեկացուցած էինք, Միացեալ Նահանգներու Քոնկրեսի աւելի քան 80 անդամներ կոչ ուղղեցին նախագահ Տանըլտ Թրամփին՝ ճանչնալու Հայոց Ցեղասպանութիւնը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>