ՀՅԴ Եւ ՀՀԿ Ստորագրեցին Համագործակցութեան Նոր Համաձայնագիրը

ԵՐԵՒԱՆ.- Հինգշաբթի, 11 Մայիսին, ՀՀ նախագահի նստավայրին մէջ Հայաստանի Հանրապետական կուսակցութեան եւ Հայ Յեղափոխական Դաշնակցութեան ներկայացուցիչները ստորագրեցին քաղաքական դաշինք կազմաւորելու մասին յուշագիրը, որ ի զօրու պիտի ըլլայ մինչեւ 6րդ գումարման Ազգային ժողովի (նոր ընտրուած Ազգային Ժողովի) լիազօրութիւններու աւարտը:

Յուշագիրի ստորագրութեամբ, երկու կուսակցութիւնները քաղաքական պատասխանատուութիւն կը ստանձնեն կառավարութեան ամբողջ գործունէութեան համար:

Հայաստանի Հանրապետական կուսակցութեան կողմէ փաստաթուղթը ստորագրեց ՀՀԿ նախագահի տեղակալ Արմէն Աշոտեան, իսկ Հայ Յեղափոխական Դաշնակցութեան կողմէ՝ ՀՅԴ Գերագոյն մարմինի ներկայացուցիչ Աղուան Վարդանեան:

Ստորեւ կը ներկայացնենք յուշագիրի բնագիրը.
Երեւան, 11 Մայիսի 2017թ.

Յուշագիր՝ քաղաքական ԿՈԱԼԻՑԻԱ ԿԱԶՄԱՒՈՐԵԼՈՒ ՄԱՍԻՆ

Հայաստանի Հանրապետական կուսակցութիւնը եւ Հայ Յեղափոխական Դաշնակցութիւն կուսակցութիւնը՝

– Վերահաստատելով 2016 թուականի Փետրուարի 24ին երկու կուսակցութիւնների միջեւ կնքուած քաղաքական համագործակցութեան մասին համաձայնագրին իրենց հաւատարմութիւնը եւ նրանում ամրագրուած դրոյթների կատարման պատասխանատուութիւնը,

– Հաշուի առնելով 2017 թուականի Ապրիլի 2ին կայացած ՀՀ Ազգային ժողովի ընտրութեան արդիւնքները,

– Համադրելով Հայաստանի Հանրապետական կուսակցութեան եւ Հայ Յեղափոխական Դաշնակցութիւն կուսակցութեան 2017 թուականի Ապրիլի 2ի Ազգային ժողովի ընտրութիւնների ժամանակ ներկայացրած նախընտրական ծրագրերը,

– Կարեւորելով 2015 թուականի Դեկտեմբերի 6ի սահմանադրական բարեփոխումներով սկսուած համակարգային եւ որակական փոփոխութիւնները խորացնելու եւ անշրջելի դարձնելու անհրաժեշտութիւնը,

– Առաջնահերթ համարելով հասարակութեան մէջ պետութեան եւ ապագայի հանդէպ վստահութեան ու լաւատեսութեան հիմքերի ստեղծման նպատակով նոր որակի իշխանութեան ձեւաւորումը,

– Նպատակ ունենալով կառավարութեան կազմում երկու կուսակցութիւնների համատեղ ջանքերով ապահովելու մարդու անվտանգ ու բարեկեցիկ կեանքը՝

Ձեւաւորում են քաղաքական կոալիցիա եւ քաղաքական պատասխանատուութիւն են ստանձնում կառավարութեան ողջ գործունէութեան համար:

  1. Համագործակցութեան ռազմավարական նպատակները.

1.1. Ամբողջացնել մարդու արժանապատուութեան անխախտելիութեան ու իրաւունքի գերակայութեան սկզբունքների լիարժէք իրացումը երաշխաւորող մարդու իրաւունքների ու ազատութիւնների ապահովման համակարգը:

1.2. Կառավարման խորհրդարանական ձեւին անցնելու այս փուլում, Հայաստանի Հանրապետութեան Սահմանադրութեանը համահունչ եւ միջազգային լաւագոյն փորձի հաշուառմամբ, ձեւաւորել համապատասխան օրէնսդրութիւն:

1.3. Ապահովել հանրային իշխանութեան բոլոր մարմինների թափանցիկ, հաշուետու եւ արդիւնաւէտ աշխատանքը՝ ձեւաւորելով սահմանադրական նոր կարգից բխող ներիշխանական յարաբերութիւններ:

1.4. Նպաստել քաղաքական կուսակցութիւնների միջեւ մրցակցութեան, հանդուրժողականութեան եւ համագործակցութեան մթնոլորտի խորացմանը, կուսակցութիւնների ներքին ժողովրդավարութեան զարգացմանը:

1.5. Երաշխաւորել Հայաստանի Հանրապետութեան եւ Արցախի Հանրապետութեան ընդհանուր անվտանգութիւնը:

1.6. Արտաքին յարաբերութիւններում առաջնորդուել բացառապէս ազգային-պետական շահերով:

1.7. Ապահովել հայ ժողովրդի լիարժէք եւ անմիջական մասնակցութիւնը հայոց պետականութեան ամրապնդման գործում՝ վերարժեւորելով հայութեան տարբեր հատուածների դերն ու նշանակութիւնը:

  1. Քաղաքական կոալիցիայի առաջնահերթութիւնները.

2.1. Նոր թափ հաղորդել հակակոռուպցիոն պայքարին եւ արժանիքահենք կադրային քաղաքականութեանը:

2.2. Սահմանել արդիւնաւէտ կառավարման չափորոշիչներին համապատասխանող կառավարութեան նոր կառուցուածք եւ գործունէութեան կարգ:

2.3. Ամբողջացնել ազգ-բանակ հայեցակարգը՝ յատուկ ուշադրութիւն դարձնելով հայրենական գիտական եւ տեխնոլոգիական մտքի վրայ հիմնուած ռազմարդիւնաբերական համակարգի ստեղծմանը:

2.4. Շարունակել կատարելագործել ընտրական համակարգը:

2.5. Ձեւաւորել կայուն զարգացում ապահովող սոցիալական շուկայական տնտեսական համակարգ, վերանայել իրականացուող սոցիալական քաղաքականութիւնը:

2.6. Սահմանել այնպիսի կարգաւորումներ, որոնք կը բացառեն բնական ռեսուրսների գերշահագործումը, նուազագոյնի կը հասցնեն շրջակայ միջավայրի, այդ թւում՝ մարդու կեանքի եւ առողջութեան վրայ բացասական ազդեցութիւնը, կ՛ապահովեն բնական ռեսուրսների արդիւնաւէտ կառավարումը եւ դրանց նկատմամբ վերահսկողութիւնը:

  1. Քաղաքական կոալիցիայի գործունէութեան եւ կազմակերպման կարգը.

3.1. Քաղաքական կոալիցիոն համագործակցութիւնը վերաբերում է կառավարութեան ողջ գործունէութեանը:

3.2. Քաղաքական կոալիցիայի կողմերն առաջնորդւում են փոխադարձ յարգանքի, փոխըմբռնման, հանդուրժողականութեան, տարաձայնութիւնները բանակցութիւնների եւ քննարկումների միջոցով լուծելու մօտեցումներով՝ հանրային իշխանութեան մարմինների ու պաշտօնատար անձանց գործունէութեան ամբողջական պատասխանատուութեան գիտակցմամբ:

3.3. Քաղաքական կոալիցիայի կողմերը քաղաքական պաշտօնները միմեանց միջեւ բաշխում են խորհրդակցութիւնների միջոցով ձեռք բերուած համաձայնութեամբ: Վարչապետի առաջադրման իրաւունքը պատկանում է Հայաստանի Հանրապետական կուսակցութեանը:

3.4. Քաղաքական կոալիցիայի կողմերը մինչեւ համապատասխան պաշտօնի համար թեկնածու ներկայացնելը՝ այն ներկայացնում են կոալիցիայի միւս կողմին:

3.5. Քննարկումների արդիւնքում տուեալ կուսակցութեանը վերապահուած պաշտօնում կարող է նշանակուել միայն տուեալ կուսակցութեան կողմից առաջադրուած թեկնածուն:

3.6. Թեկնածուի առնչութեամբ միւս կուսակցութիւնը կարող է ներկայացնել դիրքորոշումներ, որոնք հրապարակման ենթակայ չեն:

3.7. Քաղաքական կոալիցիայի կողմերը պարտաւորւում են.

3.7.1. Սահմանադրութեան փոփոխութիւնները, սահմանադրական օրէնքները ընդունել համախոհութեամբ: Կողմերը պէտք է ձգտեն այլ հարցերի շուրջ որոշումները եւս ընդունել համախոհութեամբ:

Համախոհութիւն չձեւաւորուելու դէպքում քաղաքական կոալիցիայի կողմերը, պահպանելով փոխադարձ յարգանքի, փոխըմբռնման, հանդուրժողականութեան նորմերը, կարող են հրապարակայնօրէն ներկայացնել իրենց դիրքորոշումները: Համախոհութեան բացակայութեան դէպքում, անկախ իրենց դիրքորոշումից, կողմերը պարտաւոր են ապահովել ընդունուած որոշման իրագործումը իշխանութեան բոլոր մակարդակներում եւ օղակներում:

3.7.2. Համագործակցութեան կողմերից մէկի առաջարկութեամբ քննարկման առարկայ դարձնել Հայաստանի Հանրապետութեան Ազգային ժողովի եւ կառավարութեան գործունէութեանը վերաբերող ցանկացած հարց:

3.7.3. Քաղաքական կոալիցիայի աշխատանքների արդիւնաւէտութեան, կանոնաւոր միջկուսակցական շփումների ապահովման եւ տեսակէտների համադրման նպատակով ձեւաւորել կոալիցիոն խորհուրդ, որն իր գործունէութիւնը իրականացնում է պարբերաբար հրաւիրող նիստերի միջոցով: Կողմերի համաձայնութեամբ կարող են ձեւաւորուել նաեւ մարզային խորհուրդներ:

3.8. Քաղաքական կոալիցիայի կողմերի միջեւ սկզբունքային տարաձայնութիւնների առաջացման դէպքում դրանք լուծւում են բանակցութիւնների միջոցով: Բանակցութիւնների միջոցով համաձայնութիւն ձեռք չբերելու դէպքում կուսակցութիւններից իւրաքանչիւրը, միւս կողմին գրաւոր տեղեկացնելով, կարող է դուրս գալ կոալիցիայից:

3.9. Քաղաքական կոալիցիա կազմաւորելու մասին սոյն յուշագիրը գործում է մինչեւ 6րդ գումարման Ազգային ժողովի լիազօրութիւնների աւարտը:

ՀՀԿ նախագահի տեղակալ

ԱՐՄԷՆ ԱՇՈՏԵԱՆ

ՀՅԴ Գերագոյն մարմնի ներկայացուցիչ

ԱՂՈՒԱՆ ՎԱՐԴԱՆԵԱՆ

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL