«Շնորհալի» Երգչախումբին Ազդեցիկ Համերգը

Հանդիսապետութեամբ Մեծի Տանն Կիլիկիոյ Արամ Ա. կաթողիկոսին, շաբաթ 13 մայիս 2017-ի երեկոյեան ժամը 8:00-ին, Սէն Ժոզէֆ համալսարանի «Փիեռ Ապու Խաթեր» սրահին մէջ տեղի ունեցաւ կաթողիկոսարանի «Շնորհալի» երգչախումբին համերգը, որ տպաւորիչ էր իր թեմայով եւ կատարողական բարձր արուեստով: Երգչախումբը ներկայացուց Արմէն Տիգրանեանի «Անուշ» եւ «Դաւիթ բեկ» օփերաներէն հատուածներ, խմբավարութեամբ` Գարեգին վրդ. Շխրտմեանի: Դաշնակի վրայ խումբին կ՛ընկերակցէր Մարիա Փալազեան:

Յայտագիրը ընթացաւ հետեւեալ կարգով.

Առաջին բաժին` «Անուշ» – Առաջին գործողութենէն` «Նախերգանք», «Պատկեր Բ.», «Անուշի երգը (Ասում են ուռին)»: Երկրորդ գործողութենէն` «Համբարձումն եկաւ», «Հէյ ջան տղայ», «Ոհ ինչ սեւ վիճակ», «Աղջի բախտաւոր»: Չորրորդ գործողութենէն` «Անուշի եւ Սարոյի զուգերգը»: Հինգերորդ գործողութենէն` «Սարոյի Արիան», «Պատկեր Բ.» եւ «Ֆինալ»:

Առաջին բաժինի մեներգողներն էին Թորոսեան Շողիկ` Անուշի դերով, Քէլէշեան Կարօ` Սարոյի դերով, Կէտիկեան Անայիս` Անուշի մօր դերով եւ Գատէհճեան Գէորգ` Անցորդի դերով:

Կարճ դադարէ մը ետք, յայտագիրի երկրորդ բաժինով ներկայացուեցաւ «Դաւիթ բեկ» օփերան` հետեւեալ ընթացակարգով. առաջին գործողութենէն` «Սանթուր եւ երգչախումբ», «Սանթուրի երգը», «Շուշանի երգը»: Երկրորդ գործողութենէն` «Թամարի արիան», «Հարի հարալօ»: Երրորդ գործողութենէն` «Խմբերգ», «Զինուորի երգը», Հայկական քայլերգ` ֆինալ»:

Երկրորդ  բաժնի մեներգողներն էին Քէլէշեան Կարօ` Սանթուրի դերով, Մաջուլեան Անի` Շուշանի դերով, Թորոսեան Շողիկ` Թամարի դերով:

Համերգի փակման երգն էր «Հայրապետական մաղթանք»-ը, որմէ ետք վեհափառ հայրապետը իր պատգամը փոխանցեց ներկաներուն: Ան ըսաւ, թէ «Շնորհալի» երգչախումբը երաժշտութեան ճամբով դարձեալ հոգեկան անհուն վայելք տուաւ բոլորիս` ներկայացնելով հայ մշակոյթի գանձերը, որոնք այսօր դժբախտաբար մնացած են փոշիներուն տակ: Վերյիշելով հին օրերը` ան ըսաւ, թէ «Անուշ» եւ «Դաւիթ բեկ» օփերաները ծայրէ ծայր անգիր սորված էր վարժարանին մէջ` նշելով, որ երէցները կը յիշեն, թէ ինչպէ՛ս հայ մշակոյթի այս գոհարները  Պուրճ Համուտի, Չարչապուխի, Քարանթինայի, Հաճընի, Պէյրութի, Նոր գիւղի փողոցներուն մէջ կ՛երգուէին: Ան դիտել տուաւ, թէ խմբավար հայր սուրբը երաժշտանոց աւարտած չէ, սակայն երաժշտութեան սէրն ու թռիչքը ունի եւ կրցաւ գեղեցկօրէն, ներդաշնակօրէն ու հմայիչ կերպով վարել խումբը: Կաթողիկոսը մեծապէս գնահատեց երգչախումբին կատարումը, ինչպէս նաեւ մեներգողներուն եւ դաշնակահարին բարձրորակ ելոյթները: Ան յատուկ կերպով գնահատեց Շողիկ Թորոսեանը եւ ըսաւ, թէ ան արժանի է միջազգային բեմերու վրայ երգելու: Վեհափառ հայրը յայտնեց, թէ Գարեգին վրդ. Շխրտմեան քանի մը ամիսէն պիտի մեկնի Քանատա իր ուսումը շարունակելու, միեւնոյն ժամանակ հովուական առաքելութեամբ: Իբրեւ գնահատանքի արտայայտութիւն, Արամ Ա., Գարեգին վրդ. Շխրտմեանին շնորհեց լանջախաչ մը` աւելցնելով, թէ հայր սուրբին Քանատա մեկնելէն ետք «Շնորհալի» երգչախումբին ղեկավարութիւնը պիտի ստանձնէ Մեղրիկ եպս. Բարիքեանը, որ  իբրեւ փոխղեկավար պիտի ունենայ Զաւէն աբղյ. Նաճարեանը:

Իր խօսքի աւարտին վեհափառը ներկաները յորդորեց մեր մշակութային, երաժշտական արժէքները առանձին չձգել, որպէսզի չմնան փոշիներուն տակ: Ան ըսաւ, թէ առանց մեր արժէքներուն, մենք պիտի մսինք, պիտի գունաթափինք հայօրէն եւ պիտի հեռանանք մեր ինքնութենէն: Մեր մշակութային արժէքներն են, որոնք մեզ պահեցին ու պահպանեցին, մեզի տուին ինքնուրոյն գոյն, երանգ եւ դիմագիծ, մանաւանդ ներկայ աշխարհին մէջ, մանաւանդ սփիւռքի մէջ: Մենք կոչուած ենք հաւատարմօրէն, ամրօրէն կառչած մնալու մեր արժէքներուն, որոնք մեր գաղութին մէջ կենսաւոր են: Արամ Ա. կաթողիկոս իր խօսքը աւարտեց` ըսելով, թէ ա՛յս է պատգամը այսօրուան համերգին` ուղղուած մեր ժողովուրդին:

 

Աւարտին, յոտնկայս երգուեցաւ «Կիլիկիա» մաղթերգը:

 

 

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button