«Տարածքներ՝ Խաղաղութեան Դիմաց» Տրամաբանութեամբ Լուծումը Կարելի Է. Մամետեարով

ԵՐԵՒԱՆ, «Եռագոյն».- «Մոսկուայի հանդիպումէն ետք ստեղծուած է այնպիսի տպաւորութիւն մը, որ հայկական զօրքերը տարածքներէն դուրս հանելուն դիմաց՝ խաղաղութիւն կարելի՛ է հաստատել, այսինքն՝ «տարածքներ՝ խաղաղութեան դիմաց» տրամաբանութեամբ», Մայիս 15ին յայտարարած է Ատրպէյճանի արտաքին գործոց նախարար Էլմար Մամետեարով, միաժամանակ աւելցնելով, որ Հայաստանի եւ Ատրպէյճանի արտաքին գործոց նախարարներու նոր հանդիպում մը հաւանական է:

Մամետեարով նաեւ ըսած է, թէ վերջին 12 տարիներու բանակցութիւններուն տրամաբանութիւնը եղած է՝ «տարածքներ՝ խաղաղութեան դիմաց», ընգծելով, որ բանակցութիւններ չեն ըլլար միայն բանակցելու համար: «Բոլորին համար յստակ է, որ Հայաստան պէտք է իր զօրքերը դուրս հանէ Ատրպէյճանի տարածքներէն», ըսած է ան:

Իր կարգին, Հայաստանի արտաքին գործոց նախարարի խօսնակ Տիգրան Բալայեան յայտարարեց. «Ապրիլ 28ին, Մոսկուայի մէջ Հայաստանի, Ռուսիոյ եւ Ատրպէյճանի արտաքին գործոց նախարարներու հանդիպման բովանդակութիւնը արտացոլացած է Հայաստանի եւ Ռուսիոյ արտաքին գործոց նախարարութիւններուն կողմէ հրապարակուած հաղորդագրութիւններուն մէջ: Ի միջի այլոց, կը նախատեսուէր, որ համանման բովանդակութեամբ հաղորդագրութիւն մը հրապարակէր նաեւ Ատրպէյճանի արտաքին գործոց նախարարութիւնը, ինչ որ տեղի չունեցաւ, եւ անոր տրամաբանական շարունակութիւնն է այն, որ ատրպէյճանական կողմը հանդէս կու գայ այլեւայլ մեկնաբանութիւններով»:

Նշենք, որ ԵԱՀԿ Մինսկի խումբի համանախագահներու հերթական տարածաշրջանային այցը հաւանաբար կատարուի Յունիսին կամ Յուլիսին. այս մասին յայտարարած էր ԵԱՀԿ Մինսկի խմբակի ամերիկացի համանախագահ Ռիչըրտ Հոկլընտ՝ աւելցնելով. «Կողմերը պէտք է ոչ միայն վերահաստատեն իրենց հաւատարմութիւնը հրադադարի պահպանման գծով, այլեւ նշեն, որ ինչպէ՛ս կեանքի պիտի կոչեն վստահութեան ամրապնդման խիստ անհրաժեշտ միջոցառումները, որոնց շուրջ համաձայնութիւն ձեռք բերուած էր անցեալ տարի Վիեննայի եւ Ս. Փեթերսպուրկի մէջ: Երբ հասնինք այդ բանակցութիւններուն, մենք կրնանք արդէն սեղանին դնել գործնական հարցերու շատ աւելի ընդարձակ ցանկ մը, որ կը սկսի օգուտներ բերելու երկու կողմերուն: Անոնք կը ներառեն տնտեսական ու առեւտրական նախաձեռնութիւններ՝ տարածաշրջանային ուժանիւթի, փոխադրամիջոցները զարգացնելու եւ վերականգնելու, ինչպէս նաեւ զբօսաշրջութիւնն ու ժողովուրդներու միջեւ շփումները խթանելու ուղղութեամբ»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>