«Ամերիքանա»ն Կը Մերժէ Ծանուցել Ցեղասպանութեան Մասին Ֆիլմը

ԿԼԵՆՏԷՅԼ.- Կլենտէյլի Հայ Դատի յանձնախումբը կը տեղեկացնէ, թէ Պրենտ պողոտային վրայ գտնուող «Ամերիքանա» շուկային տնօրէնութիւնը մերժած է Հայոց Ցեղասպանութեան ուրացման արշաւին մասին պատրաստուած՝ «Ուրացման Ճարտարապետները» ֆիլմը ծանուցող պաստառներ ցուցադրել իր ցուցատախտակներուն վրայ։

Ֆիլմի տարածման պատասխանատուներուն տրուած է բացասական պատասխան, երբ անոնք փորձած են նշեալ ցուցատախտակներուն վրայ ծանուցումներ գնել, ա՛յն պատճառաբանութեամբ, որ ֆիլմը «շատ քաղաքական է»։

Կլենտէյլի Հայ Դատի յանձնախումբը անընդունելի կը համարէ տրուած այս պատճառաբանութիւնը, միաժամանակ յիշեցնելով, որ Ցեղասպանութեան ուրացումը պարզապէս շարունակութիւն է 1915-ին սկսած ցեղասպանական արշաւին։

«Ամերիքանա»ի որոշումը «դաւաճանական» եւ «պատմական իրականութիւնները գրաքննելու փորձ» որակելով՝ Կլենտէյլի Հայ Դատի յանձնախումբը կը շեշտէ, թէ քաղաքին հայ համայնքը իր քուէներով, իր վճարած տուրքերով եւ գնումներով յատկանշական ներդրումներ ունի այդ կեդրոնի կառուցման աշխատանքներուն եւ ամէնօրեայ առեւտուրին մէջ։

Կլենտէյլի Հայ Դատի յանձնախումբը արդէն իսկ իր բողոքը յայտնեց Կլենտէյլի քաղաքապետական խորհուրդին եւ «Ամերիքանա»ի սեփականատէր «Քարուսօ Ըֆիլիէյթըտ» հաստատութեան՝ պահանջելով վերատեսութեան ենթարկել այս վիրաւորական որոշումը։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button