«Ուոլ Սթրիթ Ճըրնըլ»ը Կը Դատապարտէ Թուրքիոյ Մէջ Իր Թղթակիցը Բանտարկելու Որոշումը

ՈՒԱՇԻՆԿԹԸՆ.- Ամերիկեան հեղինակաւոր յայտնի «Ուոլ Սթրիթ Ճըրնըլ» օրաթերթը խմբագրականով մը խստօրէն քննադատած է Թուրքիոյ մէջ իր թղթակիցը՝ Այլա Ալպայրաքը, բանտարկելու թրքական ատեանին որոշումը։

«Թուրքիոյ նախագահ Ռեչեփ Թայիփ Էրտողան իրաւացի՛ է, երբ կը բողոքէ անմեղ մարդիկ սպաննող եւ կառավարութիւնը տապալել փորձող ահաբեկչական կազմակերպութիւններու դէմ: Սակայն, երբ թուրք իրաւապահ մարմինները կ՛որոշեն անմեղ լրագրողներ մեղադրել ահաբեկչութեան հետ կապ ունենալու յանցանքով, այն ատեն անոնք անգամ մը եւս կը վերահաստատեն, թէ Էրտողան Թուրքիան դարձուցած է բռնապետական երկիր մը», գրած է թերթը՝ անհիմն համարելով լրագրողին դէմ ամբաստանութիւնը:

Նշենք, որ Ալպայրաք թրքական դատարանի մը կողմէ 2 տարուան եւ 1 ամսուան բանտարկութեան դատապարտուած էր՝ «Քիւրտիստանի բանուորական կուսակցութեան ի նպաստ քարոզչութիւն կատարելու» ամբաստանութեամբ:

Այժմ, Նիւ Եորք գտնուող լրագրողը յայտարարած է, որ կը պատրաստուի վճիռը բողոքարկելու վճռաբեկ դատարանին մէջ: Ան մասնաւորապէս ըսած է. «Ականատես ըլլալով Թուրքիոյ մէջ այժմ տիրող մթնոլորտին՝ այս վճիռը պէտք է, որ զիս բոլորովին չզարմացնէր, բայց այնուամենայնիւ անակնկալի՛ եկայ»:

Թրքական դատարանին որոշումը քննադատած է նաեւ «Ուոլ Սթրիթ Ճըրնըլ»ի գլխաւոր խմբագիր Ճերըրտ Պէյքըր՝ նշելով. «Ասիկա անկողմնակալ եւ անկախ լրագրողի մը նկատմամբ անարդար եւ անպատեհ պատիժ է»:

Նշենք, որ Ալպայրաք թուրք իրաւապահ մարմիններուն կողմէ հետապնդումի թիրախ դարձած է այն օրէն ի վեր (2015ի Օգոստոս 19), երբ հրապարակուեցաւ անոր հեղինակած «Թուրքիոյ Քրտաբնակ Շրջանին Մէջ Քաղաքացիական Պատերազմը Կը Թէժանայ» խորագրեալ յօդուածը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button