Համազգայինի «Գասպար Իփէկեան» Թատերախումբը Սկսաւ Ներկայացնել Հենրիք Իբսենի «Ժողովուրդի Թշնամին» Թատերախաղը

Անցնող շաբաթավերջին` Լիբանանի Համազգայինի «Գասպար Իփէկեան» թատերախումբը «Յակոբ Տէր Մելքոնեան» թատերասրահին մէջ երկու ելոյթներով ներկայացուց Լեւոն Շանթի թարգմանութեամբ Հենրիք Իբսենի «Ժողովուրդի թշնամին» թատերախաղը` բեմադրութեամբ Սուրէն Խտըշեանի, կը հաղորդէ “Ազդակ”-ը:

Այս այժմէական թատերախաղը կը ներկայացնէ ընկերութեան բարոյական անկումները եւ  ցոյց կու տայ, թէ ինչպէ՛ս անհատ մը կը մեկուսացուի, երբ սկսի բացայայտել իշխանութիւններուն թերութիւնները:

Ներկայացումին մէջ դերեր ստանձնած էին Վարդան Մկրտիչեան (բժիշկ  Թոմ Շթոքման), Գէորգ Նալպանտեան (քաղաքապետ Փիթըր Շթոքման), Սիլվա Ատուրեան ( Քաթրինա), Զաւէն Պաաքլինի (Քիիլ), Խաչիկ-Հրակ Տեմիրճեան (խմբագիր Հովսթատ), Նժդեհ Մկրտիչեան (տպարանատէր Թոմսըն), Ժան Պէքերէճեան (նաւապետ Հոլսթըր), Լիլիթ Գույումճեան (Փեթրա), Դրօ Միրզայեան (թղթակից Պիլլինկ), Յովսէփ Գաբլանեան (գինով), եւ ցուցարարներ Յակոբ Մարկարոսեան, Աբրահամ Պալթայեան, Մանուէլ Թոքմաքճեան, Կարօ Բանողլեան եւ Սարգիս Տօնիկեան:

Յայտնենք, որ ներկայացումները կը շարունակուին յառաջիկայ ուրբաթ, 17, շաբաթ, 18 (կալա) եւ կիրակի, 19 նոյեմբերին, երեկոյեան ժամը 8:30-ին, «Յակոբ Տէր Մելքոնեան» թատերասրահին մէջ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button