Հաղորդագրութիւն

«Հայաստան» համահայկական հիմնադրամի Լիբանանի գործադիր մարմինը չորեքշաբթի, 29 նոյեմբեր 2017-ին կը կազմակերպէ իր տարեկան դրամահաւաք-ռատիոթոնը, որ այս տարի կ՛ընթանայ «Բերքառատ Արցախ» կարգախօսով:

Տրուած ըլլալով, որ արցախցի ժողովուրդին մեծամասնութիւնը կը զբաղի հողագործութեամբ, «Հայաստան» համահայկական հիմնադրամը այս տարուան համար մշակած է ծրագիր մը, որուն շնորհիւ կարելի պիտի ըլլայ լուծել հայ հողագործին գլխաւոր հարցը` ոռոգման ջուրի ապահովումը. հակառակ անոր որ Հայաստանն ու Արցախը հարուստ են ստորգետնեայ ջուրերով, սակայն որպէսզի այդ ջուրը հասնի հողագործին,  պէտք է արթեզեան ջրհորներ հորատել եւ ոռոգման ցանց կառուցել. ծրագիր մը, որ բաւական դժուար իրագործելի եւ ծախսալից է արցախցիին համար: Արդարեւ, «Հայաստան» համահայկական հիմնադրամը այս տարուան իր դրամահաւաքին հասոյթը պիտի յատկացնէ այս ծրագիրին, որուն կողքին պիտի ստանձնէ նաեւ Արցախի տարածքին զանազան հանրային կառոյցներու (հիւանդանոցներու, դպրոցներու, բնակելի շէնքերու) վրայ արեւային ուժանիւթով բանող վահանակներ զետեղելու ծրագիրի իրականացումը, որպէսզի կարելի ըլլայ անվճար տաք ջուր եւ ելեկտրականութիւն ապահովել ամբողջ տարուան ընթացքին:

«Հայաստան» համահայկական հիմնադրամը այս տարի կը նշէ իր հիմնադրութեան 25-ամեակը: Անցնող  25 տարիներուն ընթացքին, համահայկական ջանքերով հիմնադրամը Հայաստանի ու Արցախի տարածքին իրականացուցած է այնպիսի ծրագիրներ, որոնք յաջողած են մեր հայրենակիցներուն առօրեայ դժուարութիւնները մեղմացնել:

Հետեւաբար, ինչպէս ամէն տարի, այս տարի եւս բոլորս միասնաբար ազգային պարտականութեան բարձր գիտակցութեամբ, մասնակցի՛նք այս տարուան դրամահաւաք-ռատիոթոնին, չորեքշաբթի, 29 նոյեմբեր 2017-ին, առաւօտեան ժամը 10:00-էն սկսեալ եւ թէկուզ մեր փոքր նուիրատուութիւններով աջակցինք Արցախի ժողովուրդին համար օգտակար այս ծրագիրին իրականացման, որ մեծապէս պիտի օգնէ Արցախի բարգաւաճման եւ ինքնաբերաբար պիտի նպաստէ անոր պետութեան հզօրացման եւ անկախութեան ամրագրման:

Միասնաբար կանգնի՛նք Արցախի մեր քոյրերուն եւ եղբայրներուն կողքին, որպէսզի մեր հայրենիքը դարձնենք աւե՛լի բերքառատ եւ ունենանք «Բերքառատ Արցախ»:

«ՀԱՅԱՍՏԱՆ» ՀԱՄԱՀԱՅԿԱԿԱՆ ՀԻՄՆԱԴՐԱՄԻ
ԼԻԲԱՆԱՆԻ ԳՈՐԾԱԴԻՐ ՄԱՐՄԻՆ

Պէյրութ, 10 նոյեմբեր 2017

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button