Այսօր Պրիւքսելի Մէջ Հայաստանի Հանրապետութիւնը Եւ Եւրոպական Միութիւնը Կը Ստորագրեն Համապարփակ Եւ Ընդլայնուած Գործակցութեան Համաձայնագիրը

Այսօր` 24 նոյեմբեր 2017-ն պատմական օր մը պիտի ըլլայ Հայաստան-Եւրոպական Միութիւն յարաբերութիւններու պատմութեան մէջ: Եւրոպական Միութեան եւ Արեւելեան գործընկերութեան վեց երկիրներու առաջնորդները այսօր հանդիպում պիտի ունենան Պրիւքսելի մէջ` նպատակադրելով աւելի խորացնել կապերը Միութեան եւ նախկին խորհրդային հանրապետութիւններուն միջեւ:

Եւրոպական Միութեան Արեւելեան գործընկերութեան ծրագիրը սկսած է 2009-ին` խթանելու տնտեսական համարկումի եւ եւրոպական արժէքներու տարածումը նախկին վեց խորհրդային հանրապետութիւններու` Հայաստանի, Ազրպէյճանի, Մոլտովայի, Ուքրանիոյ, Վրաստանի եւ Պիելոռուսիոյ մէջ:

Արեւելեան գործընկերութեան վեհաժողովի այսօրուան գլխաւոր իրադարձութիւնը թերեւս Հայաստանի հետ կնքուելիք Համապարփակ եւ ընդլայնուած գործակցութեան համաձայնագիրն է:

Նոր համաձայնագիրին մէջ կան բազմաթիւ կէտեր, որոնք կրնան  շատ նպաստաւոր ըլլալ Հայաստանի համար: Հայաստան կը պարտաւորուի բարեփոխել իր հաստատութիւնները, քաղաքական համակարգը, աւելի ամրապնդել մարդու պաշտպանուածութիւնը, մարդու իրաւունքը: Եւ եթէ Հայաստան կատարէ բոլոր պարտաւորութիւնները, ապա կրնայ տնտեսական լուրջ աջակցութիւն ստանալ Եւրոպական Միութենէն, այսպէս կոչուած` «աւելին աւելիին» դիմաց: Այսինքն, եթէ Հայաստան կատարէ համաձայնագիրով ստանձնած բոլոր պարտաւորութիւնները, ապա Եւրոպական Միութիւնը կը պարտաւորուի աջակցիլ եւ նպաստել, որ ներդրումներ կատարուին Հայաստանի մէջ:

Համաձայնագիրին մէջ հետաքրքրական նորութիւն կայ փոքր եւ միջին գործառնութեանց համար` այսպէս կոչուած, վարկաւորում տեղական տարադրամով: Ասիկա կրնայ խթան հանդիսանալ Հայաստանի տնտեսութեան զարգացման:

Այսօրուան վեհաժողովի հռչակագիրին մէջ կային որոշ չլուծուած խնդիրներ, յատկապէս` տագնապներու լուծման վերաբերեալ կէտը, որ  մինչեւ հիմա յստակացած չէ, այնտեղ չէ նշուած Լեռնային Ղարաբաղ եզրոյթը:

Շրջանին մէջ առկայ տագնապներու վերաբերեալ համաձայնագիրին մէջ  տեղ գտած է հետեւեալ ձեւակերպումը. «Վեհաժողովի մասնակիցները կոչ կ՛ուղղեն` աշխուժացնելու տագնապները լուծելու ջանքերը` հիմնուած միջազգային իրաւունքի սկզբունքներուն վրայ»:

«Տագնապներու լուծումը, վստահութեան կառուցումն ու լաւ դրացնութեան յարաբերութիւնները առանցքային են տնտեսական ու ընկերային զարգացման եւ համագործակցութեան համար», նշուած է Արեւելեան գործընկերութեան հռչակագիրի բնագիրին մէջ:

Եթէ ամէն ինչ լաւ ընթանայ, Եւրոպական Միութիւնը պիտի սկսի  Հայաստանի հետ երկխօսութեան` այցեգիրներու ազատականացման հարցին շուրջ:

Համաձայնագիրով կը նախատեսուի համագործակցութիւն ո՛չ միայն տնտեսական, քաղաքական, այլ նաեւ անվտանգութեան հարցերու մէջ: Ըստ էութեան, Եւրասիական տնտեսական միութեան շրջագիծին մէջ անվտանգութեան հարցով  ամրագրուած պարտաւորութիւններ չկան, այդ իմաստով Հայաստան կրնայ Եւրոպական Միութեան հետ նման համաձայնութիւններ գոյացնել: Եւրոպական Միութեան պարտաւորութիւնները` օգնել Հայաստանին, նաեւ անվտանգութեան ծիրին մէջ, բաւական շահեկան պիտի ըլլայ  Հայաստանի համար:

Յիշեցնենք` աւելի քան երեք տարի Եւրոպական Միութեան հետ քննարկումներէ ետք, սեպտեմբեր 2013-ին, Հայաստան ստորագրեց Մաքսային միութեան, ապա` Եւրասիական տնտեսական միութեան անդամակցութեան յուշագիրը: Տարիներ անց Հայաստանը եւ Եւրոպական Միութիւնը յարաբերութիւնները խորացնելու համար նախաստորագրեցին այլ` համապարփակ շրջանակային համաձայնագիրը: Կը սպասուի, որ կողմերը համաձայնագիրը ստորագրեն այսօր` 24 նոյեմբերին, Պրիւքսելի մէջ:

Նախագահ Սերժ Սարգսեան Հանդիպում Ունեցած Է Պելճիքայի Թագաւորին Հետ

 

Նախագահ Սերժ Սարգսեան Պելճիքա կատարած աշխատանքային այցելութեան շրջագիծին մէջ երէկ հանդիպում ունեցած է Պելճիքայի թագաւոր Ֆիլիփի հետ:

Հանրապետութեան նախագահն ու Պելճիքայի թագաւորը իրենց հանդիպումը եւ  նախագահ Սարգսեանին Պրիւքսել այցելութիւնը լաւ առիթ նկատած են ամփոփելու Հայաստանի եւ Պելճիքայի միջեւ դիւանագիտական յարաբերութիւններու հաստատումին յաջորդած 25-ամեայ ուղին, ինչպէս նաեւ  անդրադառնալու յարաբերութիւններու հետագայ զարգացման հեռանկարին: Զրուցակիցները յոյս յայտնած են, որ այցելութեան իբրեւ արդիւնք հայ-պելճիքական բարեկամական յարաբերութիւնները ամրապնդուին համագործակցութեան նոր նախաձեռնութիւններով:

Նախագահ Սերժ Սարգսեան գոհունակութեամբ արձանագրած է, որ այս տարիներուն երկու երկիրներու միջպետական յարաբերութիւններուն բնորոշ եղած է փոխադարձ վստահութիւնը, բոլոր հարցերուն մէջ փոխըմբռնման հասնելու եւ զիրար սատարելու ցանկութիւնը: Նախագահը նշած է, որ Պելճիքան Հայաստանի համար կարեւոր գործընկեր է ինչպէս երկկողմանի, այնպէս ալ  բազմակողմանի հարթակներուն վրայ, մասնաւորապէս` Եւրոպական Միութեան:

Այդ շրջագիծին մէջ Հայաստանի նախագահը եւ Պելճիքայի թագաւորը  անդրադարձած են Եւրոպական Միութեան Արեւելեան գործընկերութեան պրիւքսելեան վեհաժողովին քննարկուելիք հարցերու օրակարգին, Հայաստան-Եւրոպական Միութիւն յարաբերութիւններու զարգացման, նաեւ Արեւելեան գործընկերութեան վեհաժողովի շրջագիծին մէջ նախատեսուած` Հայաստանի եւ  Եւրոպական Միութեան յարաբերութիւններու նոր շրջանակային փաստաթուղթին` Համապարփակ եւ ընդլայնուած գործընկերութեան համաձայնագիրին:

 

 

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button