Եւրոպական Միութեան Արեւելեան Գործընկերութեան Հռչակագիրը Ընդունուած Է. Նախագահ Սարգսեան. «Հայաստանը Պիտի Շարունակէ Հաւատարիմ Մնալ Խաղաղութեան Ամրապնդման Եւ Կայուն Զարգացման Իր Տեսլականին»

0
4

Եւրոպական Միութեան Արեւելեան գործընկերութեան վեհաժողովի մասնակիցները Պրիւքսելի մէջ իրականացուող աշխատանքին լոյսին տակ ընդունած են հռչակագիր:

Ըստ «Արմէնփրես»-ի` հռչակագիրը կը սահմանէ այն արժէքները, որոնցմով պէտք է առաջնորդուին Եւրոպական Միութիւնն ու Արեւելեան գործընկերութեան երկիրները յառաջիկայ տարիներուն, կը նախանշէ հետագայ գործակցութեան ուղիները տնտեսութեան, քաղաքականութեան, մարդասիրական եւ այլ բնագաւառներու մէջ: Այս անգամ հռչակագիրին մէջ չկայ որեւէ յղում այս կամ այն տագնապին` անուանական:

Ինչ կը վերաբերի տագնապներու լուծման վերաբերեալ ընդհանուր ձեւակերպումներուն, անոնք ամբողջովին կը համընկնին Հայաստանի դիրքորոշումներուն եւ տեսակէտներուն: Տագնապները պէտք է լուծուին միջազգային իրաւունքի չափանիշներու եւ սկզբունքներու հիման վրայ` նաեւ հաշուի առնելով գոյութիւն ունեցող ձեւաչափերն ու հոլովոյթները: Լեռնային Ղարաբաղի տագնապին առնչութեամբ Եւրոպական Միութեան դիրքորոշումը արտայայտուած է Համապարփակ եւ ընդլայնուած գործընկերութեան համաձայնագիրին մէջ: Այնտեղ անդրադարձ կայ տագնապի լուծման երեք հիմնական սկզբունքներուն եւ ԵԱՀԿ-ի Մինսքի խմբակի համանախագահութեան ձեւաչափին:

Համաձայնագիրը պիտի ունենայ օրէնքի ուժ, քանի որ պիտի վաւերացուի Եւրոպական Միութեան անդամ բոլոր երկիրներու խորհրդարաններուն կողմէ: Ընդունուած հռչակագիրին մէջ յղում կայ նաեւ Հայաստան-Եւրոպական Միութիւն համաձայնագիրին:

Նախագահի կայքին հաղորդումով` վեհաժողովին ելոյթ ունեցած է նախագահ Սերժ Սարգսեանը, որ իր խօսքին մէջ անդրադարձած է նաեւ ղարաբաղեան տագնապին: «Ազրպէյճանի նախագահը հերթական անգամ անհիմն մեղադրանքներ հնչեցուցած է Հայաստանի հասցէին: Որքան ալ Ազրպէյճանը պատեհ կամ անպատեհ կը փորձէ խեղաթիւրել Լեռնային Ղարաբաղի տագնապի եւ անոր խաղաղ լուծման էութիւնը, միեւնոյնն է, տագնապին լուծումը հիմնուած է միջազգային իրաւունքի 3 սկզբունքներուն վրայ, այն է` ուժ կամ ուժի սպառնալիք չկիրարկելու, տարածքային ամբողջականութեան եւ ժողովուրդներու ինքնորոշման իրաւունքի վրայ, որոնք առաջարկուած են ԵԱՀԿ-ի Մինսքի խմբակի համանախագահութեան կողմէ:

Միջազգային հանրութեան դիրքորոշումը Լեռնային Ղարաբաղի տագնապին առնչութեամբ արտայայտուած է նաեւ ԵԱՀԿ-ի Մինսքի խմբակի եռանախագահ երկիրներու ղեկավարներուն ընդունած յայտարարութեան մէջ: Այս շրջագիծին մէջ տագնապին լուծումը առանց Լեռնային Ղարաբաղի ժողովուրդի ազատ ինքնորոշման իրաւունքի գործադրութեան պարզապէս անկարելի է: Կ՛ուզեմ նաեւ ընդգծել, որ իւրաքանչիւր տագնապ առանձնայատուկ է իր բնոյթով, էութեամբ եւ լուծման հիմքերով, եւ այս առումով սխալ են տագնապները մէկ ընդհանրութեան մէջ դիտարկելու փորձերը:

Մէկ նկատառում եւս. ՄԱԿ-ը երբեք բանաձեւ չէ ընդունած Լեռնային Ղարաբաղի տագնապի խաղաղ լուծման վերաբերեալ: 1993-ին ՄԱԿ-ի կողմէ ընդունուած չորս բանաձեւերը կը վերաբերէին Լեռնային Ղարաբաղի հատուածին մէջ զինուորական գործողութիւնները դադրեցնելուն, որմէ Ազրպէյճանը հրաժարած է: Եւ հիմա` 25 տարի ետք, խօսիլ այն մասին, որ Հայաստանը իր պարտաւորութիւնները չի կատարեր, կը կարծեմ` այժմէական չէ:

Լիայոյս եմ, որ Արեւելեան գործընկերութեան շրջանին մէջ առկայ տագնապներու լուծումը թոյլ կու տայ ունենալ աւելի խաղաղ եւ բարեկեցիկ Եւրոպա: Հայաստանը պիտի շարունակէ հաւատարիմ մնալ խաղաղութեան ամրապնդման եւ կայուն զարգացման իր տեսլականին», ըսած է նախագահ Սերժ Սարգսեան:

LEAVE A REPLY

Please enter your comment!
Please enter your name here