Թրքական PR Գործակալ Ռոն Թորոսեանի Հայրը եւ Նախնիները Հայեր են

«Քալիֆորնիա Քուրիըր» թերթի (www.TheCaliforniaCourier.com) հրատարակիչ եւ խմբագիր Յարութ Սասունեան

Անցեալ շաբաթ ես յօդուած մը գրած էի Նիւ Եորքի 5W հանրային կապերու ընկերութեան նախագահ Ռոն Թորոսեանի մասին, որ 60 հազար տոլարի պայմանագիր կնքած էր, որպէսզի PR աշխատանքներ կատարէ Թուրքիոյ Հանրապետութեան համար Միացեալ Նահանգներու մէջ:

Ես գրած էի, որ չեմ գիտեր, թէ արդեօք Թորոսեանը հայ է, թէ պարզապէս կը կրէ հայկական մականուն, քանի որ որոշ հրեաներ եւ իրանցիներ նոյնպէս ունին հայկական մականուններ: Նախքան նախորդ յօդուածիս գրելը ես փորձած էի կապուիլ անոր հետ եւ երկու ձայնային հաղորդագրութիւն ձգած անոր գրասենեակը, սակայն ան չէր պատասխանած իմ հեռաձայններուն:

Այդ յօդուածը գրելէս ետք, ես Ռոն Թորոսեանէն քանի մը ելեկտրոնային նամակ եւ հեռաձայն ստացայ: Սակայն, ան խնդրեց չհրապարակել մեր հեռախօսազրոյցները: Ես նաեւ բազմաթիւ նամակներ եւ հեռախօսազանգեր ստացած եմ տարբեր երկիրներու հայերէ, որոնք ծանօթ էին Թորոսեաններու ընտանիքին:

Միաժամանակ նկատեցի, որ որոշ ընթերցողներ մեկնաբանութիւններ ձգած էին որոշ կայքերու մէջ տեղադրուած իմ յօդուածի տակ` պնդելով, որ Թորոսեանը հայ չէ, այլ պարզապէս հրէայ կամ իրանցի, որ կը կրէ հայկական մականուն: Այս մեկնաբաններու ենթադրութիւններուն հիմքը այն փաստն է, որ համացանցի վրայ բոլոր յօդուածներուն մէջ Թորոսեանի մասին կը յիշատակեն իբրեւ հրէայ եւ կը նշեն անոր աշխոյժ գործունէութիւնն ու մասնակցութիւնը հրէական հարցերու եւ կազմակեպութիւններու մէջ:

Սակայն, գանատահայ մը, որ նախապէս ապրած է Երուսաղէմի մէջ, տեղեկացուց, որ ինքը այդ քաղաքին մէջ մեծցած է Ռոնի հօր` Յարութ Թորոսեանի հետ, որ այժմ կը բնակի Նիւ Եորքի մէջ: Ռոնի մեծ հայրը Ոսկան Թորոսեանն էր, իսկ մեծ մայրը` Մարիամը:

Ոսկանն ու անոր ընտանիքը ապրած են Երուսաղէմի Հայոց պատրիարքարանի տարածքին մէջ: Ոսկանը, իբրեւ վարպետ աշխատած է պատրիարքարանի մէջ։ Ռոնի հայրը յաճախած է Սրբոց Թարգմանչաց հայկական վարժարան: Ե՛ւ հայրը, ե՛ւ մեծ հայրը եղած են ՀՄԸՄ-ի անդամ (հայկական մարմնամարզական եւ սկաուտական կազմակերպութիւն): Ոսկանը եղած է նաեւ ՀՅԴ-ի հաւատարիմ անդամ:

Քանի որ Ռոնի հայրը ամունացած էր հրէայ կնոջ հետ, ուստ հրէական համայնքը Ռոնը կը համարէ հրէայ: Ան մեծցած է իբրեւ հրէայ եւ ինքզինք համարէ հրէայ եւ ո՛չ թէ հայ: Ես շատ բան գիտցայ Ռոնի ընտանեկան ընկերներէն եւ հօր դասընկերներէն անոր հարազատներուն եւ անոնց կեանքին մասին, սակայն Ռոնի անձնական կեանքի գաղտնիութեան պահպանման համար, ես որոշեցի այլ մանրամասներ չհրապարակել: Միայն նշեցի անոր հայրն ու նախնիները, որպէսզի ապացուցեմ, որ ան մասնակիօրէն հայկական ծագում ունի, այլ ո՛չ թէ իրանցի է, կամ ամբողջովին հրէայ:

Հետաքրքրական է, որ ելեկտրոնային նամակներէն մէկուն մէջ, որ Ռոն Թորոսեանը ուղարկած էր առաջին յօդուածէս ետք, ան յայտարարած է. «Ես հրէայ էմ: Ես ծնած եմ Ամերիկայի մէջ եւ մեծցած հրէական ընտանիքի մէջ, իսկ իմ երեխաները հպարտութեամբ կը կրթեմ հրէական ցերեկային դպրոցներու մէջ: Ես զիս երբեք հայ չեմ համարած: Դուք կ՝իրականացնէք զաւեշտալի, անհեթեթ եւ քայքայիչ տգեղ լակմուսային քննութիւն»: Ան խնդրած է, որ իր նամակի մնացած հատուածը չհրապարակեմ:

Ես պատասխանեցի Թորոսեանի նամակին. «Շնորհակալ եմ, որ վերջապէս կապ հաստատեցիք հետս: Կը փափաքէի, որ Դուք պատասխանած ըլլայիք երկու հեռախօսային հաղորդագրութիւններուն, որոնք ես ուղարկած էի անցեալ ամիս: Հրէայ զգալը Ձեր ընտրութիւնն ու որոշումն է, որ ես կը յարգեմ: Այնուամենայնիւ, հրէայ ըլլալը չ՝ազատեր Ձեզ Ցեղասպանութիւնը ժխտող երկրի համար PR ընելու անընդունելիութենէն, անկախ անկէ, թէ Դուք հրէայ էք, հայ կամ այլ ազգի ներկայացուցիչ: Հայկական եւ հրէական ցեղական ծագում ունենալը Ձեզ կը դարձնէ ինչպէս Հոլոքոսթի, այնպէս ալ Հայոց Ցեղասպանութեան զոհերու ժառանգորդ, որ կրկնակի բեռ կը դնէ Ձեր վրայ` յատկապէս զգայուն ըլլալու Ցեղասպանութիւնը ժխտողներուն հանդէպ: Միայն այն պատճառով, որ դուք դրամ կը շահիք PR ընելով Ցեղասպանութիւնը ժխտողներուն համար, չ՝արդարացներ Ձեր մասնագիտական գործունէութիւնը: Ինչպէս նշած էի յօդուածիս մէջ, Դուք քննադատած էիք անոնց, որոնք PR կ՝ընէին բռնապետերուն համար: Մինչդեռ հիմա Ձեզ կը վճարեն PR ընելու բռնապետ Էրտողանին համար: Եթէ Դուք կը կարծէք, որ Էրտողանը բռնապետ չէ, ուրեմն Դուք այն սակաւաթիւ մարդոցմէ մէկն էք, որոնք  այդպէս կը մտածեն…»:

Ռոն Թորոսեանը պատասխանեց նամակիս. «Քննադատեցէք զիք որքան կ՝ուզէք: Սակայն, կը խնդրեմ մի ներկայացնէք ընտանիքիս կամ իմ ազգային պատկանելութեան մասին Ձեր տեսակէտները: Ես զիս երբեք հայ չեմ համարած իմ ամբողջ կեանքի ընթացին»:

Պէտք է տեղեկացնեմ Ռոն Թորոսեանին, որ ես տարիներ շարունակ տասնեակ յօդուածներ գրած եմ՝ քննադատելով բոլոր անոնց, անկախ անոնց ազգութենէն, որոնց թրքական իշխանութիւնները վարձած են լոպպինկի կամ հանրային կապերու նպատակով: Անընդունելի է դրամի համար ներկայացնել Թուրքիան, երկիր մը, որ կը ղեկավարէ բռնապետը, կ՝ոտնահարէ իր քաղաքացիներուն իրաւունքները եւ կը ժխտէ Հայոց Ցեղասպանութիւնը։

Հետաքրքրական է, որ 2010 Յունիսին, մինչ Թուրքիոյ հետ Թորոսեանի PR պայմանագրի ստորագրումը, ան հակաթրքական բողոքի ցոյց կազմակերպած էր Մանհեթընի մէջ, թրքական մարդասիրական նաւատորմին վրայ իսրայէլցի զինուորներուն յարձակումէն ետք: Կը մէջբերուի անոր յայտարարութիւնը. «Այն, ինչ այսպէս կոչուած խաղաղ ակտիւիստները ըրին թրքական նաւուն վրայ, ուրիշ բան չէր, քան խորամանկօրէն մշակուած հակահրէական մաքրագործում»:

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button