Զարիֆ. «Հայաստանը Իրանին Համար Միշտ Շատ Լաւ Դրացի Եղած Է»

Նախագահ Սերժ Սարգսեան երէկ ընդունած է Իրանի արտաքին գործոց  նախարար Մոհամետ Ճաւատ Զարիֆը:

Ողջունելով հիւրը` հանրապետութեան նախագահը գոհունակութեամբ  խօսած է երկու երկիրներուն միջեւ բարձր մակարդակի աշխուժ  փոխադարձ այցելութիւններուն մասին եւ ընդգծած, որ անոնք կարելիութիւն կու տան աւելի մեծ հոգատարութեամբ զարգացնելու երկու ժողովուրդներու դարաւոր բարեկամութեան հիմքին վրայ կառուցուած միջպետական յարաբերութիւնները:

Նախագահ Սարգսեան հանդիպումին առիթով անգամ մը եւս իր զօրակցութիւնը յայտնած է Իրանի բարեկամ ժողովուրդին աւերիչ երկրաշարժին պատճառով կրած վնասներուն առիթով` վստահութիւն յայտնելով, որ Իրանը կարճ ժամանակի մը ընթացքին  պիտի վերացնէ աղէտին հետեւանքները:

Հանրապետութեան նախագահը նշած է, որ հայ-իրանական դիւանագիտական յարաբերութիւններու հաստատումէն ետք անցած 25 տարիներուն երկու երկիրները կառուցած են բարեկամական եւ փոխըմբռնման ու յարգանքի վրայ հիմնուած յարաբերութիւններ: Նախագահը յոյս յայտնած է, որ այդ յարաբերութիւնները նոյն ոգիով պիտի շարունակուին նաեւ ապագային: Նախագահ Սերժ Սարգսեան ընդգծած է, որ Հայաստանը իրանցի գործընկերներուն հետ միշտ կը վարէ անկեղծ ու բաց երկխօսութիւն եւ շահագրգռուած է բարեկամ Իրանի զարգացումով եւ շրջանի կայունութեամբ:

Շնորհակալութիւն յայտնելով ընդունելութեան համար` արտաքին գործոց նախարար Զարիֆ նախագահ Սերժ Սարգսեանին փոխանցած է Իրանի նախագահ Հասան Ռոհանիի ջերմ ողջոյնները եւ շնորհակալութիւն յայտնած թէ՛ նախագահ Ռուհանիի երդմնակալութեան ներկայ գտնուելուն, թէ՛ ալ աւերիչ երկրաշարժին առիթով ցաւակցական հեռագիր յղելուն համար:

Իրանի արտաքին գործոց նախարարը շեշտած է, որ իր երկրին համար դրացի պետութիւններուն հետ յարաբերութիւններու զարգացումը արտաքին քաղաքական առաջնահերթութիւններէն է, եւ Հայաստանը Իրանի համար միշտ եղած է շատ լաւ դրացի: Մոհամետ Ճաւատ Զարիֆի համաձայն, հակառակ անոր հայ-իրանական միջպետական յարաբերութիւնները  արդէն 25 տարեկան են` ամրապնդուած քաղաքական սերտ կապերով, սակայն երկու ժողովուրդներուն միջեւ յարաբերութիւնները դարաւոր են: Նախարար Զարիֆ ընդգծած է, որ Իրանի ժողովուրդը յատուկ յարգանք կը տածէ հայ ժողովուրդին եւ Իրանի հայ համայնքին նկատմամբ:

Զրուցակիցները երկուստեք կարեւոր նկատած են տնտեսական կապերու ամրապնդումն ու տարբեր բնագաւառներու մէջ փոխշահաւէտ համագործակցութեան զարգացումը: Արտաքին գործոց նախարար Զարիֆի գնահատումով` հայ-իրանական տնտեսական յարաբերութիւնները յարիր չեն երկու բարեկամ երկիրներու ներկայ քաղաքական յարաբերութիւններու բարձր մակարդակին: Իրանի արտաքին գործոց նախարարը նշած է, որ տնտեսական յարաբերութիւններու ընդլայնման ու խորացման ուղղուած է նաեւ Երեւանի մէջ որեւէ հայ-իրանական գործարար համաժողով:

Հանդիպումին նախագահ Սարգսեան եւ նախարար Զարիֆ գոհունակութեամբ խօսած են նաեւ միջազգային կառոյցներուն մէջ երկու երկիրներու փոխադարձ գործակցութեան մասին:

Տնտեսական Յարաբերութիւններու Ներկայ Վիճակի Քննարկում

Վարչապետ Կարէն Կարապետեան երէկ ընդունած է Իրանի արտաքին գործոց նախարար Մոհամետ Ճաւատ Զարիֆը:

Ողջունելով հիւրը` վարչապետը նշած է, որ Հայաստան-Իրան յարաբերութիւնները կը գտնուին բարձր մակարդակի վրայ, եւ այս տարի կը նշուի երկու երկիրներուն միջեւ դիւանագիտական յարաբերութիւններու հաստատման 25-ամեակը:

Վարչապետին համաձայն, հակառակ այն հանգամանքին, որ բաւական աշխատանք կատարուած է, բազմաթիւ միացեալ ձեռքբերումներ կան, այնուամենայնիւ ընելիքները տակաւին շատ են:

Վարչապետ Կարէն Կարապետեան նկատել տուած է, որ ըլլալով դրացի  բարեկամ երկիրներ` Հայաստանն ու Իրանը առեւտրական, տնտեսական գործակցութեան զարգացման մեծ ներուժ ունին, եւ հակառակ այս տարի արտահանում-ներմուծում ուղղութեամբ արձանագրուած աճին, առկայ  ցուցանիշները չեն արտացոլեր երկկողմանի տնտեսական կապերու զարգացման իրական ներուժն ու կարելիութիւնները:

Հայաստանի վարչապետին փոխանցելով Իրանի նախագահի առաջին տեղակալ Էսհաք               Ճահանկիրիի ջերմ ողջոյնները` նախարար Զարիֆ նշած է. «Ձեր այցելութիւնը Իրան շատ կարեւոր եւ յաջող էր: Մենք Հայաստանը կ՛ընկալենք իբրեւ լաւ դրացի: Մեր յարաբերութիւնները շատ աւելի երկար ժամանակահատուածի պատմութիւն ունին, քան 25 տարին, եւ այդ լաւ յարաբերութիւնները երկու երկիրներուն համար արժէքաւոր ներուժ են, որմէ պէտք է կարենանք օգտուիլ»:

Մոհամետ Ճաւատ Զարիֆ համակարծիք էր Հայաստանի վարչապետին  հետ, որ երկկողմանի տնտեսական յարաբերութիւններու ներկայ վիճակը չի համապատասխաներ Հայաստան-Իրան քաղաքական երկխօսութեան բարձր մակարդակին, եւ Իրանը եւս շահագրգռուած է բարեկամ Հայաստանի հետ առեւտրական, տնտեսական կապերու աշխուժացումով: Ան տեղեկացուցած է, որ իր գլխաւորութեամբ Հայաստան հասած պատուիրակութեան կազմին մէջ ընդգրկուած են փոխադարձ հետաքրքրութիւն ներկայացնող բնագաւառներու յառաջատար ներկայացուցիչներ` ձեռք բերուած պայմանաւորուածութիւններու կատարման հետագայ քայլերը եւ փոխադարձ գործակցութեան զարգացման հեռանկարները քննարկելու նպատակով:

Հայաստանի վարչապետը եւ Իրանի արտաքին գործոց նախարարը քննարկած են դեկտեմբերին հայ-իրանական սահմանին` Մեղրիի մէջ բացուելիք ազատ տնտեսական գօտիի շրջագիծին մէջ  համագործակցութեան վերաբերող հարցեր:

Զրուցակիցները միտքեր փոխանակած են նաեւ ուժանիւթի բնագաւառին մէջ  երկկողմանի եւ բազմակողմանի ձեւաչափերով փոխադարձ գործակցութեան շուրջ:

Էդուարդ Նալբանդեան. «Հայ-Իրանական Յարաբերութիւնները Աշխուժօրէն Զարգացած Են»

Հայաստանի արտաքին գործոց նախարար Էդուարդ Նալբանդեան երէկ հանդիպում ունեցած է Իրանի արտաքին գործոց նախարար Մոհամետ Ճաւատ Զարիֆի հետ: Հանդիպման աւարտին Նալբանդեան բանակցութիւններուն վերաբերեալ յայտարարութիւն մը կատարած է:

Ան իր խօսքին մէջ ըսած է. «Հայաստանի եւ Իրանի միջեւ գոյութիւն ունին բարի դրացիական, բազմաբովանդակ եւ փոխշահաւէտ յարաբերութիւններ, որոնք հիմնուած են մեր ժողովուրդներու բազմադարեան բարեկամութեան վրայ:

Մեր երկիրներու ղեկավարներուն միջեւ հաստատուած են ջերմ, վստահելի յարաբերութիւններ, անոնք պարբերաբար հանդիպումներ կ՛ունենան:

Մեր երկիրներուն միջեւ դիւանագիտական յարաբերութիւններու հաստատման 25-րդ յոբելենական տարուան ընթացքին կարելի է գոհունակութեամբ արձանագրել, որ հայ-իրանական յարաբերութիւնները աշխուժ ձեւով զարգացած են` ընդգրկելով նորանոր բնագաւառներ:

Սակայն կը գիտակցինք, որ առկայ է մեծ ներուժ, եւ մենք տրամադրուած ենք միացեալ ջանքերով խորացնել, ընդլայնել եւ ամրապնդել երկկողմանի բազմաոլորտ փոխադարձ գործակցութիւնը:

Այսօր տեղի ունեցած բանակցութիւններուն ընթացքին մենք քննարկեցինք Հայաստանի եւ Իրանի ղեկավարներուն միջեւ ձեռք բերուած պայմանաւորուածութիւններու կատարման ընթացքը, անդրադարձանք միացեալ ջանքերով իրականացուող շարք մը ծրագիրներու:

Կարեւոր նկատեցինք արտաքին գործոց նախարարութիւններուն միջեւ քաղաքական խորհրդատուութիւններու պարբերական կատարումը:

Մեր հանդիպումի օրակարգին վրայ էին առեւտրական եւ տնտեսական համագործակցութեան խթանման հարցերը: Եւրասիական տնտեսական միութիւն-Իրան համագործակցութեան հաստատումը, որ կրնայ յառաջընթաց ապահովել հայ-իրանական տնտեսական յարաբերութիւններու զարգացման գործին: Նշեմ նաեւ, որ այսօր պարոն Զարիֆին հետ պիտի մասնակցինք հայ-իրանական գործարար համաժողովի բացման հանդիսութեան»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button