ՀԱՊԿ. «Մինսքի Խմբակի Համանախագահութիւնը Լեռնային Ղարաբաղի Խնդիրի Լուծման Լիազօրութիւն Ունեցող Միակ Միջազգային Ձեւաչափն Է»

Հաւաքական անվտանգութեան պայմանագիրի կազմակերպութեան (ՀԱՊԿ) անդամ երկիրներու ղեկավարները որդեգրած են Լեռնային Ղարաբաղի հիմնահարցի լուծման գործին մէջ միջնորդներու` ԵԱՀԿ-ի Մինսքի խմբակի համանախագահութեան ջանքերուն սատարելու մասին յայտարարութիւն: Այս մասին կը հաղորդէ «Արմէնփրես»:

«ԵԱՀԿ-ի Մինսքի խմբակի համանախագահութիւնը` ի դէմս Ռուսիոյ, Ֆրանսայի եւ Միացեալ Նահանգներու, համապատասխան լիազօրութիւն ունեցող միակ միջազգային կառոյցն է, որուն առաքելութիւնն է կողմերուն աջակցութեան ցուցաբերումը` հասնելու ղարաբաղեան տագնապի լուծման քաղաքական-դիւանագիտական միջոցներով: Համանախագահող երեք պետութիւններու ջանքերուն շնորհիւ, իբրեւ խնդիրի լուծման հիմք, մշակուած է ամբողջականութիւնը սկզբունքներու եւ տարրերու, որոնք արտացոլուած են Ռուսիոյ, Ֆրանսայի, Միացեալ Նահանգներու նախագահներուն միացեալ յայտարարութեան մէջ», նշած են ՀԱՊԿ-ի անդամ երկիրներուն ղեկավարները:

ՀԱՊԿ-ի անդամ երկիրներու ղեկավարները` հաստատելով Լեռնային Ղարաբաղի հիմնախնդիրի բացառապէս խաղաղ ճամբով լուծումը, կը յայտնեն իրենց աջակցութիւնը ԵԱՀԿ-ի Մինսքի խմբակի համանախագահներու` տագնապի լուծման ուղղուած ջանքերուն` հիմք ընդունելով միջազգային իրաւունքի արժեչափերը եւ սկզբունքները, որոնք գոյութիւն ունին ՄԱԿ-ի կանոնադրութեան մէջ, Հելսինքեան եզրափակիչ հռչակագիրին մէջ, մասնաւորաբար վերաբերելով ուժ կամ ուժի սպառնալիք չկիրարկելու, պետութիւններու տարածքային ամբողջականութեան, ազգերու ինքնորոշման եւ իրաւահաւասարութեան:

«Մենք հանդէս կու գանք ի նպաստ 2016-2017 թուականներուն Վիեննայի, Ս. Փեթերսպուրկի եւ Ժընեւի մէջ տեղի ունեցած վեհաժողովներուն ղարաբաղեան խնդիրով ձեռք բերուած համաձայնութիւններուն, որոնք ուղղուած են զինադուլի պահպանման, տագնապի գօտիին մէջ լարուածութեան թուլացման ու բանակցային հոլովոյթի աշխուժացման համար լրացուցիչ միջոցներու ձեռնարկման, ինչպէս նաեւ իրավիճակի մագլցում չարտօնելուն», ըսուած է յայտարարութեան մէջ:

Յայտարարութիւնը որդեգրուած է Մինսքի մէջ 30 նոյեմբերին Հաւաքական անվտանգութեան պայմանագիրի կազմակերպութեան (ՀԱՊԿ) Հաւաքական անվտանգութեան խորհուրդի նստաշրջանին ընթացքին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button