«Արէնին» Միշտ Պատրաստ Է Օգտակար Ըլլալու Հայրենիքին».Արմինէ Վարդանեան

Նիւ Եորքի մէջ գործող «Արէնի» երգչախումբը տարիներ շարունակ իր աշխոյժ գործունէութեամբ կը նպաստէ Սփիւռքի մէջ հայկական մշակոյթի պահպանման ու տարածման, ինչպէս նաեւ Հայաստան-Սփիւռք կապերու ամրապնդման:

«Հայերն այսօր»-իհետ զրոյցին երգչախումբի գեղարուեստական ղեկավար Արմինէ Վարդանեան կը ներկայացնէ «Արէնի»-ի անցած ուղին, ձեռքբերումները,  ներկայ ու ապագայ ընելիքները:

Տիկի՛ն Արմինէ, մինչ  «Արէնի» երգչախումբին անդրադառնալը, կը ցանկայի քիչ մը  Ձեր մասին պատմէիք. ստեղծագործական ի՞նչ ճանապարհ  անցած էք, մասնագիտական կրթութիւն ո՞ւր ստացած էք:

-Մասնագիտութեամբ  դաշնակահար եմ, իսկ խմբավարութեամբ հետաքրքրուած եմ ուսանելու տարիներուն: Մասնագիտական կրթութիւնս ստացած եմ Երեւանի Կոմիտասի անուան պետական երաժշտանոցին մէջ` ներառեալ ասպիրանտուրական կրթութիւնս: Այնուհետեւ տաս տարի աշխատած եմ նոյն բարձրագոյն հիմնարկին մէջ: Նիւ Եորք տեղափոխուելէ յետոյ անմիջապէս աշխատած եմ օժտուած երեխաներու յատուկ մասնագիտացուած  երաժշտական դպրոցին մէջ (Special Music School), որ համարժէք է Երեւանի Չայկովսկիի անուան երաժշտական դպրոցին: Զուգահեռաբար աշխատած եմ Long Island երաժշտանոցին մէջ, ուր այժմ դաշնամուրային բաժինի վարիչն եմ: Շարք մը միջազգային մրցոյթներու ժիւրիի կազմին մէջ եմ, մասնաւորապէս` «LISMA» հինադրամի, «LIC» ամէնամեայ մրցոյթներու:

Եր՞բ  ստեղծուած է «Արէնի» երգչախումբը:

-«Արէնի» երգչախումբը կազմաւորուած է 2013թ.` Նիւ Եորքաբնակ խումբ մը երաժշտասէր մարդոց, իմ եւ վաղամեռիկ ամուսնուս` Սամուէլ Ներսիսեանի նախաձեռնութեամբ, որ արդէն ստեղծած էր եւ կը ղեկավարէր  «Հայեր» փողային նուագախումբը: Երգչախումբի ստեղծման նպատակն է` պահպանել եւ սերունդներուն փոխանցել հայ ժողովուրդի` դարերով կուտակուած հսկայական մշակութային ժառանգութեան բացառիկ նմուշները, ինչպէս նաեւ այն ճանաչելի դարձնել օտարազգի ունկնդիրներուն:

Երգչախումբի կազմաւորման օրէն  քանի մը ամիս ետք տեղի ունեցաւ անդրանիկ ձեռնարկը, որ կոչուեցաւ  «Musical Extravaganza»:

Քանի՞ անդամէ  բաղկացած է երգչախումբը, եւ ինչպէ՞ս  կատարուած է կատարողներու ընտրութիւնը:

-Երգչախումբը բաղկացած է 25 կատարողէ, սակայն յետագային գուցէ կազմը աւելի ընդարձակուի եւ համալրուի. գործընթացը արդէն սկսած է: Երգչախումբին մէջ ընդգրկուած են տարբեր տարիքի եւ տարբեր մասնագիտութիւն ունեցող մարդիկ, որոնցմէ շատերը երաժշտական կրթութիւն չունին, սակայն մեծ նուիրուածութեամբ կը մասնակցին երգչախումբի աշխատանքներուն` ապահովելով երգչախումբի յաջողութիւնը: Թերեւս ասիկա է պատճառը, որ երգչախումբը օրէ օր  կը կատարելագործուի` հասնելով գրեթէ արհեստավարժութեան:

Հպարտութեամբ պէտք է նշեմ, որ երգչախումբի կազմին մէջ ընդգրկուած են նաեւ երեք հոգիէ բաղկացած ամերիկեան ընտանիք մը եւ մէկ հոգի Տոմինիքեան Հանրապետութենէն: Անոնք ջերմօրէն համալրած են «Արէնի» ընտանիքի շարքերը, սիրով, պատասխանատուութեամբ կ’ուսումնասիրեն եւ կ’երգեն հայերէն երգերը:

 

–«Արէնի»-ի երգապնակին մէջ ժանրային բազմազանութիւն կը  նկատուի:

-Երգչախումբի երգացանկը, իրօք, բազմազան է. 80-է աւելի երգեր  ընդգրկուած են: Հիմնականին մէջ հայ երգահաններու` Կոմիտասի, Կարա-Մուրզայի, Սայաթ-Նովայի, Արամ Խաչատրեանի, Ալեքսանդր Յարութիւնեանի, Առնօ Բաբաջանեանի, Էդգար Յովհաննիսեանի, Թաթուլ Ալթունեանի, Տիգրան Մանսուրեանի, Ռուբէն Ալթունեանի եւ ժամանակակից այլ երգահաններու ստեղծագործութիւններ կը հնչեն: Երգացանկին մէջ ընդգրկուած են նաեւ անգլերէն, գերմաներէն, յունարէն, լեհերէն, վրացերէն երգեր:

Բեմական գործունէութեան տարիներուն երգչախումբը ի՞նչ յաջողութիւններ  գրանցած է:

-Գոյութեան 4 տարիներուն ընթացքին երգչախումբը հասցուցած է բաւականին աշխոյժ գործունէութիւն ծաւալել` իր կենսագրութեան մէջ գրանցելով երեք խոշոր համերգներ Նիւ Եորքի «Queens Theatre» համերգասրահին, Ֆիլատելֆիոյ, Ուաշինկթընի, Միացեալ Ազգերու Կազմակերպութեան մէջ: Այս համերգներուն մեզի հետ համագործակցած են անուանի երգիչ-երգչուհիներ Եղիշէ Մանուչարեան, Վիքթորիա Աւետիսեան, Նարինէ Օջախեան, Միխայիլ Սուետլով, ինչպէս նաեւ ճազ- դաշնակահար Տիգրան Մարտիկեան, քլարնետահար Վասկօ Տուկովսկին, բուզուկահար Եանիս Ստայկոսը, լարային քառեակ, կամերային նուագախումբ: Մասնակցած ենք նաեւ միջազգային փառատօնի, ուր շարք մը երկիրներու կողքին` Չինաստան, Քորէա, Մեքսիքա եւ այլն, Հայաստան  ներկայացուցած ենք:

Երգչախումբը, բացի համերգային գործունէութենէն, նաեւ ձեռնամուխ  եղած է հիմնադրելու երկու խոշոր ամէնամեայ աւանդական` «Տոլմայի» եւ «Ղափամայի» փառատօները, որոնք, որպէս կանոն, կ’անցնին լեփ-լեցուն սրահներու մէջ: Այդ ամէնէն շատ կ’ուրախանանք, որովհետեւ կը յաջողինք աշխարհի տարբեր անկիւններէ հաւաքուած մեծ թիւով հայ մարդոց հետ միասնաբար ձեռնարկները տօնի վերածել` ճաշակելով համեղ ուտեստներ, երգել, պարել, որ կը նպաստէ մեր ինքնութեան եւ արմատներու պահպանման:

Կազմակերպուող ձեռնարկներուն սիրով եւ մեծ հետաքրքրութեամբ կը մասնակցին  նաեւ օտարազգիները, որոնք հիացմունքով  կ’արտայայտուին հայկական մշակոյթին եւ աւանդոյթներուն մասին:

Վերջերս «Ղափամայի» փառատօնին ժամանակ լեհական համայնքի ներկայացուցիչները զարմանքով նշած էին, որ հայկական համայնքը թէպէտ աւելի փոքրաթիւ է, սակայն աւելի կուռ, միասնական եւ աւանդապաշտ է: Այս արձագանքը մեզի որքան կը հպարտացնէ, այնքան ալ աւելի կը պարտաւորեցնէ:

 

Համայնքային կեանքին մէջ երգչախումբը ներգրաւուա՞ծ է:

-«Արէնին»  մշտապէս եւ սիրով կը մասնակցի Նիւ Եորքի հայկական համայնքին մէջ տեղի ունեցող բազմաբնոյթ ձեռնարկներուն, ինչպէս անհատներով, այնպէս ալ` ամբողջ խումբով: Ամէն տարի ապրիլ 24-ին կամ մօտակայ կիրակին, Նիւ Եորքի «Time Square» հրապարակին վրայ տեղի կ’ունենայ Հայոց ցեղասպանութեան սրբադասուած նահատակներու ոգեկոչման յիշատակին նուիրուած արարողութիւնը, որուն երգչախումբը երկու տարի շարունակ (99-րդ եւ 100-րդ տարելիցներուն) եղած է այլ ձեռնարկներու  երաժշտական մասը ապահովող կարեւոր օղակներէն մէկը:

Ձեր կարծիքով ամերիկահայ երիտասարդները որքանո՞վ  հետաքրքրուած են հայկական մշակոյթով, յատկապէս` երաժշտութեամբ:

-Նիւ Եորքը հսկայական քաղաք է, եւ շատ դժուար է ամբողջական պատկերի մասին խօսիլ: Կրնամ ըսել, որ մեզի յայտնի որոշ շրջանակ կայ, որոնք մշտապէս կը մասնակցին եւ կ’աջակցին  մեր գործունէութեան: Սակայն անով չենք բաւարարուիր. այժմ որոշակի ծրագիրներ կը մշակենք երիտասարդներուն աւելի համախմբելու եւ հայրենասիրութեամբ տոգորելու ուղղութեամբ: Հպարտութեամբ կրնամ փաստել, որ զաւակներս սիրով ընդգրկուած են երգչախումբի կազմին մէջ: Վստահ եմ` ամէն հայու արեան մէջ երաժշտութեան եւ, առհասարակ, մշակոյթի նկատմամբ մեծ հետաքրքրութիւն կայ: Մեզի կը մնայ միայն ամէն միջոց գործադրել` մեր հայրենակիցներուն քաջալերելու եւ ծանօթացնելու հայկական մշակութային արժէքներուն:

Երգչախումբը Հայաստանի մէջ երբեք համերգ ունեցա՞ծ է:

-Հայաստանի մէջ դեռեւս ելոյթ չենք ունեցած, սակայն ատիկա մեր յետագայ ծրագիրներուն մէջ  անպայման ներառած ենք: Մեծ ջանքեր ու պայմաններ պէտք են զայն իրականացնելու համար, որուն ուղղութեամբ ալ կ’աշխատինք:

 

Տեղեակ եմ, որ Նիւ Եորքի մէջ կը գործէ  «Հայ վիրաւոր հերոսներ» հիմնադրամը: «Արէնին» երբեք մասնակցա՞ծ  է հիմնադրամի աշխատանքներուն:

-Բոլորովին վերջերս Համազգային կրթական եւ մշակութային միութեան Նիւ Եորքի մասնաճիւղի կազմակերպած հերթական ձեռնարկներէն մէկուն ժամանակ պատահական տեղեկացանք «Հայ վիրաւոր  հերոսներ» (Armenian Wounded Heroes Fund) հիմնադրամի մասին: Այս նախաձեռնութիւնը շատ ոգեւորեց մեզի եւ անմիջապէս որոշեցինք աջակցիլ հիմնադրամին: Բացի մասնաւոր նուիրատուութիւններէն, երգչախումբի վերջին համերգէն գոյացած հասոյթէն գումար յատկացուեցաւ հիմնադրամին: Նմանատիպ գործունէութիւն ծաւալեցաւ նաեւ այս տարուան հոկտեմբերին, երբ Ֆիլատելֆիոյ մէջ երգչախումբի հիւրախաղի ժամանակ կազմակերպիչները եւս հիմնադրամին դրամական օգնութիւն ցուցաբերեցին:

Կը վստահեցնեմ, որ հիմնադրամին սատարելը շարունակական բնոյթ պիտի կրէ, քանի որ «Արէնին» միշտ պատրաստ է իր փոքրիկ լուման ներդնելու եւ օգտակար ըլլալու Հայրենիքին:

Հարցազրոյցը Գէորգ Չիչեանի

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button