Թուրք Դեսպանին Վրայ Յարձակած Հայ Երիտասարդները Դատապարտուած են Պայմանական Ազատազրկման

Փարիզի մէջ Թուրքիոյ նախկին դեսպան Հաքքը Աքիլի վրայ հիւթ թափած ֆրանսահայ ուսանողները դատապարտուած են պայմանական ազատազրկման:

«Էրմենիհապեր»-ի փոխանցմամբ, Նանթերի դատարանը Փարիզի Տեկարթ համալսարանին մէջ թուրք դեսպանին վրայ յարձակած հայ ուսանողը դատապարտած է 3 ամսուան պայմանական ազատազրկման, իսկ յարձակման տեսագրութիւնը ընկերային ցանցերու մէջ հրապարակած անձին` 1 ամսուան պայմանական ազատազրկման:

Եթէ վերջիններս սահմանուած փորձաշրջանի ընթացքին օրինակելի վարք դրսեւորեն, ապա պիտի ազատուին բանտի մէջ իրենց պատիժը կրելու անհրաժեշտութենէն, միաժամանակ, ինչպէս մեկնաբանած են փաստաբանները, այդ պատիժը պիտի չարձանագրուի որպէս դատուածութիւն:

Աղբիւրը կը յիշեցնէ, որ 2015-ի Մարտին Փարիզի Տեկարթ համալսարանի իրաւագիտութեան բաժանմունքին մէջ կազմակերպուած «Աշխարհիկութիւնը Թուրքիոյ եւ Ֆրնասայի մէջ» խորագիրով գիտաժողովի ժամանակ ելոյթ ունեցող թուրք դեսպանին մօտեցած էր երիտասարդ մը եւ անոր վրայ ներկուած հեղուկ, իսկ որոշ աղբիւրներու համաձայն` նուռի հիւթ թափած էր: Աւելի ուշ ոստիկանութիւնը պարզած էր, որ յարձակումը իրականացուցած եւ զայն տեսագրած երիտասարդները ազգութեամբ հայ Ֆրանսայի քաղաքացիներ են:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button