Հայաստանի Պետական Ազգային Ակադեմիական Երգչախումբը Կը Տօնէ Իր Հիմնադրութեան 80-ամեակը

Հայաստանի պետական ազգային ակադեմիական երգչախումբը կը նշէ իր հիմնադրութեան 80- ամեակը: «Արմենփրես»-ի հաղորդմամբ` այդ առիթով Դեկտեմբեր 5-ին երգչախումբը կը պատրաստուի յոբելեանական համերգի:

Հայաստանի պետական ակադեմիական երգչախումբը հիմնադրուած է 1937 թուականին: 1961 թուականի Սեպտեմբերէն երգչախումբի գեղարուեստական ղեկավարն ու գլխաւոր խմբավարն է մայեսթրօ Յովհաննէս Չէքիջեանը:

 Երգչախումբը գործունէութիւն կը ծաւալէ Հայաստանի բոլոր շրջաններուն մէջ: Հայաստանէն դուրս հանդէս եկած է 180 քաղաքներուն մէջ` 820 համերգով: Նիւ Եորքի, Լոնտոնի, Փարիզի, Պրահայի, Պէյրութի մէջ եւ այլուր 27 լեզուներով երգած է հայ եւ համաշխարհային դասական երգահաններու ստեղծագործութիւններ: Համաշխարհային համբաւ ձեռք բերած է Կոմիտասի, հայ եւ համաշխարհային դասական երգահաններու  բազմաթիւ ստեղծագործութիւններու կատարումներով: Երգացանկը հարուստ է Պախի, Հենտըլի, Մոցարթի, Վերտիի, Պեթհովընի, Չայկովսքիի եւ ուրիշներու ստեղծագործութիւններով:

Երգչախումբը ձայնագրած է Եկմալեանի եւ Կոմիտասի պատարագներու սկաւառակներ: 1969-ին երգչախումբին շնորհուած է «Ակադեմիական» կոչումը, իսկ 2012-ի Նոյեմբեր 15-ին ՀՀ կառավարութեան որոշումով` «Ազգային» կոչում:

 1980 թուականին Մոսկուայի մէջ ողիմպիական խաղերու մշակութային ծեռնարկներու ծիրէն ներս, միութեան բոլոր անուանի խումբերու մրցակցութեան արդիւնքով երգչախումբի կատարումով հնչեցուած Պեթհովընի 9-րդ սիմֆոնիան ճանչցուած է լաւագոյնը, իսկ խմբավար Յովհաննէս Չէքիջեան արժանացած է «Ժողովուրդներու բարեկամութիւն» շքանշանին:

Հայաստանի պետական ազգային ակադեմիական երգչախումբի եւ Ռուսիոյ սիմֆոնիկ նուագախումբերու համատեղ գործունէութեան ձայնագրութիւններէն մէկը Փարիզի մէջ արժանացած է Կրան Փրիի: Երգչախումբը արժանացած է նաեւ ԽՍՀՄ եւ ՀԽՍՀ պետական մրցանակներու, Մխիթարեան միաբանութեան եւ ՀՀ մշակոյթի նախարարութեան ոսկէ մետալներու, ՀՀ սփիւռքի նախարարութեան «Կոմիտաս» մետալի եւ շատ այլ շքանշաններու:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button