Հայկ Նահապետէն Մինչեւ Քառօրեայ Պատերազմի Հերոսներ. Ընթերցասէրներու Դատին Յանձնուեցաւ «Հերոսապատում» Գիրքը

Բանաստեղծ, լրագրող, խմբագիր Սամուէլ Մարգարեանի հայրենասիրական թեմայով գրուած «Հերոսապատում» գիրքի պոէմներն ու բանաստեղծութիւնները կ՝անդրադառնան Արցախի, Հայոց բանակի, Հայոց դատի նուիրեալներուն:

Ըստ Armenpress.am-ի՝ գիրքին շնորհանդէսը տեղի ունեցած է  5 Դեկտեմբերին Հայաստանի գրողներու միութեան տան մէջ:

«Գիրքին մէջ զետեղուած են հեղինակի տարբեր տարիներու ստեղծագործութիւնները: Յատկապէս ընդգծուած են արցախեան պատերազմի հերոսամարտի ե՛ւ զոհուած, ե՛ւ կենդանի հերոսներու մասին գործերը: Կայ անդրադարձ Սարդարապատի ճակատամարտին, ապրիլեան քառօրեայ պատերազմին»,- նշած է Հայաստանի գրողներու միութեան նախագահ Էդուարդ Միլիտոնեանը: Ան նաեւ ըսած է, որ պոէզիան ինքնին զինուոր է մարտադաշտի մէջ:

Գրականագէտ Պետրոս Տէմիրճեանի խօսքով` Սամուէլ Մարգարեանը իր տպագրած առաջին գիրքէն մինչեւ «Հերոսապատում» ժողովածուն հաւատարիմ մնացած է այն թեմաներուն, որոնք միշտ առկայ եղած են իր ստեղծագործութիւններուն մէջ:

«Անոնք են հայրենիքը, հերոսները, հայոց պատմութիւնը, քաղաքները, ի վերջոյ սէրը ո՛չ միայն հայրենիքի, այլեւ՝ կնոջ, սիրած աղջկայ եւ աշխարհի նկատմամբ»,-ըսած է Տէմիրճեանը:

«Ապրելով այս հողին վրայ`մենք երբեք չենք մոռնար յանուն հայրենիքի արիւն թափած հերոսները: Այս ժողովածուին մէջ անդրադարձած եմ Հայկ նահապետէն մինչեւ ապրիլեան պատերազմի հերոսները, փորձած եմ դէպքերն ու իրադարձութիւնները գեղարուեստօրէն, բանաստեղծական ներկայացնել: Հնարաւոր չեղաւ բոլորին մասին մէկ գիրքի մէջ գրել, հետեւաբար անիկա շարունակութիւն պիտի ունենայ»,- շեշտած է գիրքի հեղինակ Սամուէլ Մարգարեանը: Ան ընդգծած է, որ հայ ժողովուրդը իր ողջ պատմութեան ընթացքին ունեցած է քաջութեան բազում էջեր, սակայն իրեն համար վճռական, ճակատագրական սխրանքները Աւարայրի, Սարդարապատի հերոսամարտերն են եւ Արցախի ազատագրումը:

Շնորհանդէսին ներկայ եղած են ինչպէս գրողներ, այնպէս ալ` Արցախի ազատագրման մասնակցած հերոսներ եւ քառօրեայ պատերազմին զոհուած զինուորներու ծնողներ:

Նշենք, որ Սամուէլ Մարգարեանը ծնած է 1952-ին Ախուրեանի շրջանի Երազգաւորս գիւղին մէջ: Աւարտած է ԵՊՀ բանասիրական բաժանմունքը: «Շիրակ» թերթի խմբագիրն է: Հրատարակած է բանաստեղծական 21 ժողովածու: Անոր գործերը թարգմանուած են ռուսերէն, վրացերէն, անգլերէն, ուքրաներէն: Յայտնի գիրքերն են «Սրբազան լեռնաշխարհ»-ը, «Աշխարհի հուրիներին»-ը, «Մեղրագետ»-ը, «երազգաւորս»-ը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button