ԲԱԿՕ ՍԱՀԱԿԵԱՆ ԸՆԴՈՒՆԵՑ ԵՒՐՈՊԱԿԱՆ ԽՈՐՀՐԴԱՐԱՆԻ ՊԱՏԳԱՄԱՒՈՐՆԵՐԸ

Լեռնային Ղարաբաղի նախագահ Բակօ Սահակեան յայտարարեց, որ Եւրոպայի հետ յարաբերութիւններու զարգացումը Արցախի արտաքին քաղաքականութեան կարեւոր ուղղութիւններէն մէկն է:
Ան այս մասին խօսած է Երեւանի մէջ, Եւրոպական Խորհրդարանի ԵՄ-Հայաստան բարեկամութեան խումբի ներկայացուցիչներուն հետ հանդիպման ընթացքին:
Բակօ Սահակեան արժեւորած է եւրոպական տարբեր կառոյցներու, որոնց կարգին նաեւ Եւրոպական Խորհրդարանին հետ կապերու հաստատումն ու խորացումը։

ԵՒՐՈԽՈՐՀՐԴԱՐԱՆԻ  ՊԱՏԳԱՄԱՒՈՐԸ ԿՈՉ Կ’ՈՒՂՂԷ ՅԱՐԳԵԼՈՒ ԱՐՑԱԽԻ  ԺՈՂՈՎՈՒՐԴԻՆ  ԻՆՔՆՈՐՈՇՄԱՆ ԻՐԱՒՈՒՆՔԸ

Եւրոմիութիւն–Հայաստան բարեկամական նորաստեղծ խումբի նախագահ Էլենի Թէօխարուսը Լեռնային Ղարաբաղ այցելած է 20 անգամ։ «Սովորաբար մարդիկ որեւէ երկրի նկատմամբ յատուկ զգացում կը տածեն՝ նշելով մայրենի կամ հայրենի հող։ Ինծի համար Լեռնային Ղարաբաղը երեխայ է՝ փոքրիկ երեխայ, որուն կ՛ուզեմ հոգ տանիլ եւ անոր հետ լաւապէս վերաբերիլ», «Արմէնփրէս»ին հետ ունեցած զրոյցին ընթացքին յայտնած է Թէօխարուսը։
Էլենի Թէօխարուս Լեռնային Ղարաբաղի պատուաւոր քաղաքացի է։ Անոր 19-րդ այցելութիւնը նախորդ տարուան ամրան էր, երբ Արցախի նախագահի ընտրութիւններուն դիտորդական առաքելութիւն ստանձնած էր։ «Ես ուրախ էի, որ իմ գործընկերներուս հետ մասնակցեցայ այդ գործընթացին։ Կարելի է ըսել, որ ժողովրդավարութիւնը իսկապէս կը ծաղկի այնտեղ։ Ասիկա բաւական տպաւորիչ գործընթաց էր, ես հիացած եմ Արցախի ժողովուրդով՝ ո՛չ միայն անոր համար, որ անոնք կը պայքարին իրենց անկախութեան համար, այլ նաեւ այն պատճառով, որ կրցան ստեղծել ծաղկող ժողովրդավարութիւն իրենց երկրին մէջ», յայտնած է ան։
Է. Թէօխարուս շեշտը դրած է Արցախի ժողովուրդին ինքնորոշման իրաւունքին վրայ՝ նկատել տալով, որ բոլորը պէտք է յարգեն այդ իրաւունքը եւ հաշուի նստին անոր հետ։ «Անոնց հիմնարար ազատութիւնն ու իրաւունքն է ինքնորոշումը. անհրաժեշտ է հանրաքուէ կատարել եւ ճշդել, թէ անոնք ի՛նչ կը գերադասեն՝ անկա՞խ ըլլալ, միաւորուի՞լ Հայաստանի հետ։ Կամքը պէտք է յարգուի», դիտել տուած է ան։
Եւրամիութիւն–Հայաստան բարեկամական նորաստեղծ խումբի անդամները՝ բարեկամական խումբի նախագահ Էլենի Թէօխարուսի գլխաւորութեամբ, այցելած են Երեւան եւ 24 Ապրիլին յարգանքի տուրք մատուցած են Հայոց Ցեղասպանութեան զոհերու յիշատակին։ 25 Ապրիլին անոնք հանդիպում ունեցած են Հայաստանի նախագահին հետ, իսկ 26 Ապրիլին մեկնած են Լեռնային Ղարաբաղ։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>