ՊԱՐՉԵԼՈՆԱ ՇԱԲԱԹ ՄԸ ԵՒՍ ՊԻՏԻ ՍՊԱՍԷ ՏԻՏՂՈՍԱԿԻՐ ԴԱՌՆԱԼՈՒ ՀԱՄԱՐ

Եւրոպական երկիրներու ազգային ախոյեանութիւնները  կը  մօտենան  ոիրենց աւարտին: Անգլիոյ ախոյեանութեան 35-րդ  հանգրուանի մրցումներուն գծով, ախոյեանութեան տիտղոսակիր  Մանչեսթըր Եունայթըտ  Լոնտոնի մէջ  մրցեցաւ Արսենալի դէմ:Հանդիպման երկրորդ  վայրկեանին  Թէօ Ուոլքոթ  յառաջ  մղեց  «Կանըրզ»ները:  Ա. կիսախաղի աւարտէն մէկ վայրկեան առաջ, Արսենալի  նախկին աստղերէն՝ Ռոպին Վան Փըրսի, որ  Եունայթտի միանալէ ետք  առաջին անգամ ըլլալով կը վերադառնար  Լոնտոն, փենալթի հարուածի մը  շնորհիւ   հաւասարեցուց  արդիւնքը:  Մրցումը վերջ  գտաւ 1-1  հաւասարութեամբ:   Եունայթըտի մարզիչ Սըր Ալեքս Ֆերկըսըն  իր գոհունակութիւնը յայտնեց  արդիւնքէն եւ  աւելցուց, թէ    յառաջիկայ  տարեշրջանի համար  «Կարմիր Սատանաներ»ը պիտի ունենան  երկու նորեկ ֆութպոլիստներ:   Երկրորդ  դիրքի վրայ գտնուող  Մանչեսթըր Սիթի,  սեփական դաշտին մէջ  2-1 արդիւնքով պարտութեան  մատնեց  Ուեսթ  Համ Եունայթըտը: Սերժիօ Ակուերօ եւ Գոլօ Թուրէ նշանակեցին «Սիթիզընզ»ներուն  կոլերը,  Էնտի Գարոլ՝  Ուեսթ Համի:  Չելսի երկու անպատասխան գնդակ զետեղեց  Սուանսիի  բերդին մէջ: Օսքար եւ Լամփարտ նշանակեցին «Կապոյտներ»ուն կոլերը: Ի դէպ,  Լամփարտ  201-րդ կոլը կը նշանակէր  Չելսիի շապիկով:   Լիվըրփուլ  վեց անպատասխան գնդակ  զետեղեց Նիուքասլ Եունայթըտի  բերդէն ներս, այս վերջնոյն  դաշտին մէջ:  Ճորտըն  Հենտըրսըն եւ Տանիէլ Սթարիճ նշանակեցին  երկուքական կոլ,  Տանիէլ Ակէր եւ Ֆապիօ Պորինի ամբողջացուցին  «Մակբայզ»ներուն   խայտառակութիւնը:   «Կարմիրներ»ը ներկայիս  54  կէտով, ընդհանուր դասաւորման   7-րդ դիրքը կը գրաւեն: Միւս կողմէ,  Կարէթ Պէյլի «տուպլ»ը Թոթենհամը  փրկեց  Ուիկանի դէմ ստոյգ պարտութենէն:  Մրցումը աւարտեցաւ  2-2 հաւասարութեամբ: Մրցումէն  ետք, Թոթենհամի աստղ՝ Կարէթ  Պէյլ, լոնտոնեան խումբին  հետ  մնալու պատրաստակամութիւն  յայտնեց, եթէ վերջինս  ձեռք բերէ «Չեմփիընզ Լիկ»ի մրցաշարքին մասնակցելու  իրաւունք:

Սպանիոյ  ախոյեանութեան 33-րդ  հանգրուանի   մրցումներուն, Լիոնէլ Մեսի նշանակեց յաջորդական իր  20-րդ  կոլը, երբ  Պարչելոնա 2-2 արդիւնքով հաւասարութիւն մը արձանագրեց  Աթլեթիք Պիլպաոյի  դէմ: Մեսիի կոլը ընթացիկ  տարեշրջանին անոր 44-րդն էր: Ալեքսիս  Սանչէզ  նշանակեց «Պարչա»յի երկրորդ  կոլը: Պարչելոնա իր  կէտերուն  քանակը բարձրացուց 85-ի: Ռէալ Մատրիտ  մրցակիցի դաշտին մէջ 2-1 արդիւնքով պարտութեան մատնեց Աթլեթիքօ  Մատրիտը:  Նշենք, թէ  Աթլեթիքօ վերջին անգամ 1999-ին  յաղթած է  Ռէալին:  Մրցումին առաջին կոլը նշանակեցին դաշտին տէրերը՝ Ռատամէլ Ֆալքաոյի միջոցաւ (եղանակի անոր 26-րդը): Սակայն, շնորհիւ   Խուան Ֆրանի (սեփական  բերդէն ներս)  եւ Անխէլ  Տի Մարիայի  կոլերուն, Ռէալ  Մատրիտ երեք կէտ եւս աւելցուց իր  հաւաքած միաւորներուն վրայ:  Ռէալ Մատրիտ ներկայիս  74 կէտով կը գրաւէ  ընդհանուր դասաւորման  երկրորդ դիրքը: Աթլեթիքօ  Մատրիտ՝ երրորդ:

Գերմանիոյ ախոյեանութեան  31-րդ  հանգրուանի մրցումներուն, Պայերն Միւնիխ արձանագրեց երկու   նոր մրցանիշ:  Արդարեւ Ֆրայպուրկի  դէմ արձանագրած յաղթանակը եղանակի անոր 27-րդն էր եւ անընդմէջ՝ տասնչորրորդը: Բացի այդ,  Պայերն գերազանցեց  Գերմանիոյ ախոյեանութեան  կէտերու մրցանիշը, հաւաքելով  84  կէտ: Պորուսիա Տորթմունտ 2-1  արդիւնքով   յաղթանակ մը արձանագրեց Ֆորթունա Տիւսելտորֆի դէմ, այս վերջնոյն դաշտին մէջ:  Նուրի Շահին եւ  Եաքոպ Պլաշչիքովսքի   նշանակեցին Տորթմունտի կոլերը:  Տորթմունտ կը գրաւէ ընդհանուր դասաւորման  երկրորդ դիրքը:

Ֆրանսայի ախոյեանութեան 34-րդ  հանգրուանի մրցումներուն,  Լիոն  երկու կարեւոր միաւոր  կորսնցուց երբ  սեփական դաշտին մէջ,  երբ 1-1 արդիւնքով հաւասարութիւն  մը արձանագրեց  Սէն Թեթիէնի  դէմ: Վերջինս՝  Քուրթ  Զումայի  միջոցաւ նշանակեց   մրցումին առաջին կոլը:  Ֆրանսայի  հաւաքականի կիսապաշտպան Եոան Քուրքոֆ հաւասարեցուց   հաշիւը:  Լիոն՝  60 կէտով կը գրաւէ ընդհանուր դասաւորման  երրորդ  դիրքը:  Սէն Թեթիէն՝  58 կէտով կը գտնուի  չորրորդ  դիրքի վրայ:  Սէն Ժերմէնի  մարզիչ  Գառլօ  Անճելոթի յայտարարեց, թէ  ընթացիկ  մրցաշրջանի վերջաւորութեան պիտի որոշէ  ապագայի իր  քայլերը: Սպանական մամուլին համաձայն, Անճելոթի պիտի ստանձնէ  Ռէալ Մատրիտի  գլխաւոր  մարզիչի պաշտօնը: Մարսէյ, մրցակիցի դաշտին մէջ 1-0 արդիւնքով պարտութեան մատնեց  Լօրիանը: Մաթիյէ  Վալպուենա նշանակեց մրցումին միակ կոլը: Մարսէյ 64 կէտով  կը գրաւէ ընդհանուր դասաւորման  երկրորդ  դիրքը: Փարի Սէն Ժերմէն արձանագրեց  հերթական  իր յաղթանակը երբ 1-0 արդիւնքով պարտութեան մատնեց  Էվիանը:   Խաւիէ   Փասթորէ  նշանակեց մայրաքաղքի  խումբին  կոլը:   Սէն Ժերմէն  ինը մարզիկով  աւարտեց մրցումը, որովհետեւ  իրաւարարը կարմիր քարտով դաշտէն հեռացուց   Մարքօ Վերաթին եւ Տէյվիտ Պեքհամը:  Գառլօ Անճելոթիի խումբը ներկայիս ունի  73 կէտ: 

Իտալիոյ  ֆութպոլի ախոյեանութեան 34-րդ  հանգրուանի  մրցումներուն,  Նափոլի՝  3-0 արդիւնքով պարտութեան մատնեց  Փեսքարան:  Ինլէր, Փանտեւ եւ Ձեմայիլի նշանակեցին Նափոլիի կոլերը:  Ուտինեզէ մրցակիցի  դաշտին մէջ 1-0 արդիւնքով պարտութեան մատնեց  Գալիարին: Ռոմա սեփական դաշտին մէջ  չորս անպատասխան  գնդակ  զետեղեց Սիենայի բերդին մէջ:  Փապլօ Օսվալտօ նշանակեց«հեթ-թրիք» մը՝  երեք կոլ:  Առաջին  դիրքի վրայ  գտնուող Եուվենթուսի եւ  Թորինոյի   միջեւ, Թորինօ քաղաքի  «Տըրպի»ն  վերջ գտաւ   «Եուվէ»ի յաղթանակով՝ 2-0:  Արթուրօ  Վիտալ եւ  Գլաուտիօ   Մարքիզիօ նշանակեցին Անթոնիօ  Գոնթէի խումբին կոլերը:  Ինթէր Միլան  1-0 արդիւնքով խոնարհեցաւ  Փալերմոյի  համեստ  կազմին առջեւ: Ա.Սէ.  Միլան  4-2 արդիւնքով պարտութեան մատնեց  Գաթանիան:   Ֆլամինի,  Փացինի (2), եւ Մարիօ Պալոթելի նշնանակեցին  Միլանի  կոլերը:

Իտալական  մարզաթերթերուն համաձայն, Պայերն  Միւնիխի մարզիչ  Եուփ  Հէյնքէս  յառաջիկայ տարեշրջանի համար   Ա.Սէ.Միլանի գլխաւոր մարզիչի  պաշտօնին լուրջ  յաւակնորդ մըն է:

ՉԵՄՓԻԸՆԶ ԼԻԿ

ԱՅՍՕՐ՝  ՌԷԱԼ – ՏՈՐԹՄՈՒՆՏ

Այսօր՝ Երեքշաբթի եերկոյեան, Պէյրութի  ժամով՝ 21.45-ին, Եւրոպայի Ախոյեան Ակումբներու Ախոյեանութեան «Չեմփիընզ Լիկ» մրցաշարքի  կիսաւարտականի  դարձի մրցումներուն գծով,  Ռէալ  Մատրիտի կազմը Սանթիակօ  Պերնպաօ մարզադաշտին  մէջ  պիտի    ընդունի Պորուսիա Տորթմունտը: Երթի  հանդիպումը  Գերմանիոյ մէջ  վերջ գտաւ 4-1`  Տորթմունտի յաղթանակով:  Մրցումին իրաւարարը պիտի  ըլլայ  անգլիացի Հովարտ  Ուէպը:

ԿԱՐԷԹ ՊԷՅԼ  ԱՆԳԼԻՈՅ ԼԱՒԱԳՈՅՆ  ՖՈՒԹՊՈԼԻՍՏԸ

Ուէյլզի եւ  Թոթենհամի   միջնապահ Կարէթ Պէյլ,   տիրացաւ  Անգլիոյ Արհեստավարժ  Ֆութպոլիստներու՝  Տարուան Լաւագոյն  Ֆութպոլիստը եւ Տարուան   Լաւագոյն  Երիտասարդ ֆութպոլիստը  զոյգ մրցանակներուն:   Պէյլ  յաջողեցաւ   պարտութեան մատնել  Լուիս  Սուարէզի,  Ռոպին Վան Փըրսիի, Մայքըլ  Քերիքի եւ  Էտէն Հազարտի նման  յաւակնորդներ: Պէյլ  Քրիսթիանօ Ռոնալտոյէն ետք դարձաւ  զոյգ  տիտղոսները միաժամանակ   նուաճող  երկրորդ  ֆութպոլիստը:

ՌՈՒՆԻ   ՓԸՐՄԻՅԷՐՇԻՓԻ  ԱՄԵՆԱՀԱՐՈՒՍՏ   ՖՈՒԹՊՈԼԻՍՏԸ

Անգլիոյ ազգային խումբի  եւ Մանչեսթըր Եունայթըտի յարձակող  Ուէյն  Ռունի  կը գլխաւորէ  Փըրմիյէրշիփի ամենահարուստ ֆութպոլիստներուն ցանկը: 27-ամեայ Ռունիի հարստութիւնները կը գնահատուին 51  միլիոն սթերլին: Երկրորդ դիրքի վրայ  կու գայ Ռիօ  Ֆերտինանտը՝  42 միլիոն սթերլին: Երրորդ՝ Մայքլ Օուընը՝    38 միլիոն սթերլին:

ԳԱՎԱՆԻ ԿՐՆԱՅ  ՄԻԱՆԱԼ  ՄԱՆՉԵՍԹԸՐ  ՍԻԹԻԻ

Բրիտանական « Տէյլի Սթար»  օրաթերթը իր Կիրակի օրուան  համարով  կը գրէ, թէ   Նափոլի կանաչ լոյս   տուած է  յարձակող   Էտիսըն Գավանիի՝ Մանչեսթըր Սիթի փոխանցումին: Փոխանցման սակը կը գնահատուի  յիսուն  միլիոն սթերլին գումար մը:  Գավանիի  ծառայութիւններով նաեւ  հետաքրքրուած է  Ռէալ Մատրիտը: Նշենք, թէ   ընթացիկ տարուան Իտալիոյ  ֆութպոլի ախոյեանութեան  մրցումներուն  Գավանի  նշանակած է  23  կոլ:  

ՄԱՐԱՔԱՆԱ  ՊԱՏՐԱՍՏ Է  ԸՆԴՈՒՆԵԼՈՒ  2014-Ի ՄՈՆՏԻԱԼԸ

Պրազիլի մէջ կայացաւ  համաշխարհային ճանաչում ունեցող  Մարաքանա  մարզադաշտին  վերաբացումը: 2014-ի  Մոնտիալի  եզրափակիչը  ընդունող  մարզադաշտին  վերակառուցման աշխատանքները սկսան  2010-ին: Նախապէս ան կ’ընդունէր   200 հազար   հանդիսական: Ներկայիս  ան նախատեսուած է 79 հազար   մարզասէրներու  համար: Դաշտին վերաբացման  առիթով, ֆութպոլի  բարեկամական  մրցում մը տեղի ունեցաւ  Ռոնալտոյի եւ Պեպեթոյի կողմէ ընտրուած խումբերու միջեւ:

ՇԱՐԱՓՈՎԱ  ՇԱՀԵՑԱՒ  ՇԹՈՒԹԿԱՐԹԻ  ՄՐՑԱՇԱՐՔԸ

 Մարիա Շարափովա շահեցաւ  թենիսի  Շթութկարթի  միջազգային մրցաշարքը:  Աւարտական մրցումին,  Շարափովա 6-4, 6-3  արդիւնքով պարտութեան մատնեց  չին  Լի Նայը: Արհեստավարժ դառնալէ ետք, 26-ամեայ  Շարափովա կը  շահէր իր 29-րդ  տիտղոսը:  

ՆԱՏԱԼ ՇԱՀԵՑԱՒ  ՊԱՐՉԵԼՈՆԱՅԻ   ՕՓԸՆ-Ը

 Թենիսի  Պարչելոնայի   միջազգային մրցաշարքը վերջ գտաւ Ռաֆայէլ Նատալի յաղթանակով:  Աւարտական մրցումին Նատալ՝  6-4, 6-3 արդիւնով պարտութեան մատնեց իր հայրենակիցին  Նիքոլաս  Ալմակրոյին:

 

ԱՐՍԵՆԱԼ ԿԸ ՀԵՏԱՊՆԴԷ  ԳԱՍԻՅԱՍԸ

 Բրիտանական «Սանտէյ   Փիփըլ»  օրաթերթը կը գրէ, թէ  Արսենալ պատրաստ է  35 միլիոն սթերլին գումար  մը   վճարելու  սպանական  ֆութպոլի  հսկաներէն  Ռէալ Մատրիտին՝ բերդապահ   Իկէր  Գասիյասի  ստորագրութիւնը ունենալու համար: Փոխանցման գործառքին  նաեւ  մաս կրնայ Արսենալի յետսապահ  Փաքարի Սանիան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button