ՍԱԼԱՄ ԿԸ ՁԳՏԻ ՉԱՓԱՒՈՐԱԿԱՆ ԽՄԲԱԿ ՄԸ ՍՏԵՂԾԵԼ ՆՈՐ ԿԱՌԱՎԱՐՈՒԹԵԱՆ ՄԷՋ

Նոր կառավարութիւն կազմելու աշխատանքները լուրջ դժուարութիւններ կը  դիմագրաւեն:  Նորանշանակ վարչապետ Թամամ Սալամ կը  ձգտի   չափաւորական խմբաւորում  մը ստեղծել նոր կառավարութեան մէջ: Անոր կարծիքով,    չափաւորական խմբաւորումը կրնայ  կատարել  արգելակող մէկ   երրորդին դերակատարութիւնը, այնքան ժամանակ, որ օրէնքը  չի  թոյլատրեր  արգելակող մէկ երրորդ խմբաւորումի մը ստեղծումը կառավարութեան կազմին  մէջ,որովհետեւ առհասարակ  գոյութիւն  չունի նման հասկացողութիւն քաղաքական   բառարանին մէջ: «  Վարչապետ նշանակուելու առաջին օրէն որոշեցի  հաւասար հեռաւորութիւն  պահել բոլորէն». յայտնեց Սալամ,  հարց տալով՝ արդեօ՞ք  քաղաքական  կառավարութիւն  պահանջելու  ետին  պահուած է  ընտրութիւնները չկայացնելու ծրագիր: Ան նաեւ մերժեց կառավարութեան կազմին մէջ ընդգրկել խորհրդարանի  թեկնածուներ: Նորանշանակ  վարչապետը  նշեց, թէ  համապատասխան  քայլերու  պիտի դիմէ՝ համբերութեան  բաժակը  յորդելու պարագային: 

Սալամ երէկ ընդունեց  բանակի  գաղտնի սպասարկութեան տնօրէն  Էտմոն Ֆատէլը եւ անոր հետ  քննարկեց  երկրին  ապահովական կացութեան  վերաբերող հարցեր: Ան նաեւ ընդունեց Ազէզի մէջ առեւանգուած  լիբանանցիներուն հարազատներէն  բաղկացած  պատուիրակութիւն մը: 

ՀԸԶՊԱԼԼԱ ՏԱԿԱՒԻՆ  Կ’ՈՒՍՈՒՄՆԱՍԻՐԷ ԻՐ  ՔԱՅԼԵՐԸ

Հըզպալլայի  ընդհանուր քարտուղարի  խորհրդական  Հաժ Հիւսէյն Խալիլ  նշեց, թէ  Մարտ 8-ի ուժերը տակաւին   ոչ մէկ պատասխան տուած են Սալամի առաջարկներուն:  Հիւսէյն  ըսաւ, թէ կը սպասէ, որ   Սալամ աւարտէ իր խորհրդակցութիւնները, որպէսզի կարելի ըլլայ ընդլայնուած  նիստ մը  գումարել անոր հետ եւ    մանրամասնօրէն  քննարկել  հրատապութիւն ներկայացնող հարցերը: Մուսթաքպալ  Հոսանքի  մօտիկ աղբիւր մը  յայտնեց, թէ  Մարտ  8-ի ուժերը Սալամէն պիտի պահանջեն նոր կառավարութեան կազմին մէջ  արգելակող մէկ երրորդը ունենալու  լիազօրութիւն, ինչպէս նաեւ պիտի մերժեն   պաշտօնները փոփոխութեան ենթարկելու սկզբունքը:  Սալամի մօտիկ աղբիւրներ յայտնեցին, թէ խորհրդարանի նախագահ Նեպիհ Պըրրիի  քուլիսներու ետին օգնութեան ձեռք մեկնած է Սալամին, նոր կառավարութեան կազմութեան համար:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>