ՀԱՄԵՄԱՏԱԿԱՆ ՀԱՆԴԱՐՏՈՒԹԻՒՆ ՀԻՒՍԻՍԻ ՄԷՋ

 Երէկ  համեմատական   հանդարտութիւն կը  տիրէր Ուատի  Նահլէի եւ Պատաուի քաղաքի արուարձաններուն  մէջ: Նշենք, թէ  Կիրակի  երեկոյեան, ապահովական   ուժերու եւ  խնդրոյ առարկայ  շրջաններու  բնակիչներուն միջեւ բախումներ տեղի ունեցան, երբ ապահովական ուժերու միաւորներ  փորձեցին  քանդել ապօրէն  կառուցուած  կարգ մը շինարարութիւններ:  Ապահովական ուժեր  դժուարութեամբ վերաբացին շրջանի  բնակիչներուն կողմէ փակուած  ճանապարհները: Բախումներուն ընթացքին   սպաննուեցան երեք անձեր, որոնցմէ մին՝  ապահովական ծառայող մը:  Երեսփոխան   Մուհամմէտ Քապարա յայտարարեց, թէ ապահովական անիշխանութիւնը  անընդունելի  հանգրուան մը  թեւակոխած է  Թրիփոլիի մէջ:  Քապարա  յայտնեց, թէ ապահովական միջադէպերը  իրենց  ժխտական անդրադարձը կ’ունենան     Թրիփոլի քաղաքի տնտեսութեան վրայ: Ան նշեց, թէ բանակը եւ ապահովական  կառոյցներ  միասնաբար կը  փորձեն  վերականգնել Թրիփոլիի   ապահովական կայունութիւնը:  Նախկին երեսփոխան   Մուսթաֆա Ալլուշ մտահոգութիւն յայտնեց, որ  Թրիփոլիի   միջադէպերը  կրնան  տարածուիլ  լիբանանեան այլ  շրջաններու մէջ:

Թրիփոլիի ապահովական կացութեան  վերաբերեալ, հրաժարեալ   պետական նախարար Ահմէտ Քարամէի բնակարանին մէջ  տեղի ունեցաւ ընդլայնուած նիստ մը  քաղաքական  տարբեր հոսանքներու, ապահովական կառույցներու  մասնակցութեամբ:

Երէկ  տեղի ունեցաւ Կիրակի օրուան  բախումներուն հետեւանքով  զոհերուն  յուղարկաւորութիւնը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button