ՏԵՐՍԻՄԻ ԲՆԱԿՉՈՒԹԵԱՆ 90 ՏՈԿՈՍԸ ՀԱՅԵՐ ԵՆ

Պոլսոյ պատրիարքական ընդհանուր փոխանորդ Արամ արք. Աթէշեան հիւրընկալուած է «Պուկիւն» պատկերասփիռի կայանին կողմէ. շարք մը այլ հարցերու կողքին, ան անդրադարձած է իսլամացած հայերու հարցին՝ յայտարարելով, թէ Տերսիմի բնակչութեան 90 տոկոսը իսլամութիւնը ընդունած հայեր են:
Ըստ «Սիվիլնեթ» կայքին՝ Աթէշեան ըսած է. «Տեսէք, 30ամեայ տղայ մը եկաւ Տերսիմէն եւ ըսաւ, թէ հայկական են իր արմատները, որոնց ինք կ՛ուզէ վերադառնալ: Ես ալ իրեն ըսի՝ «ապացուցէ»: Ան յամառօրէն գնաց-եկաւ, չհրաժարեցաւ այդ գաղափարէն ու սկսաւ զիս անհանգստացնելու իր երթալ-գալով: Այնուհետեւ, հայրը հեռաձայնեց ու ըսաւ, որ քաղաքապետարան կ՛աշխատի, ու երբ թոշակի անցնի, պիտի գայ Պոլիս եւ քրիստոնէութիւն ընդունի: Ան ըսաւ, որ տեղւոյն բնակչութեան 90 տոկոսը հայ է: Այն ատեն ես զայն ընդունեցի. ան դասընթացքներու մասնակցեցաւ, մկրտուեցաւ եւ դարձաւ մեր եկեղեցւոյ անդամը»:
Հաղորդման ընթացքին Աթէշեան պատմած է նաեւ, որ իր քոյրը բռնի իսլամացուած է, սակայն այժմ չի ցանկանար քրիստոնէութիւն ընդունիլ: Շատերը կը վախնան, որ քրիստոնէութիւն ընդունելով՝ պիտի հեռացուին իրենց աշխատանքէն: Ան պատմած է, որ իր քրոջ որդիներէն մէկը վերադարձած է քրիստոնէութեան, իսկ հինգ եղբայրները կ՛ապրին իբրեւ իսլամներ: Ան ըսած է նաեւ, որ ծպտեալ հայերը երբեմն թունդ իսլամներ կը դառնան:
Արամ արք. Աթէշեանի համաձայն՝ երկրին մէջ պայմանները կը փոխուին եւ կրօններու նկատմամբ յարգանքը կ՛ընդարձակի՝ համարձակութիւն ներշնչելով, որ ծպտեալ հայեր պատրիարքարան դիմեն, մկրտուին ու իրենց քրիստոնէական արմատներուն վերադառնան։ Սրբազանը ըսած է, որ ամէն տարի մօտաւորապէս յիսուն հոգի նման դիմում կը կատարէ պատրիարքարանին։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>