Անկայուն Վիճակը Չի Կրնար Օգուտ Տալ Երկրին. Կարէն Կարապետեանի Կոչը

0
71

Հայաստանի Հանրապետութեան վարչապետի պաշտօնակատար Կարէն Կարապետեան երկրի մէջ ստեղծուած իրադրութեան անտրամաբանական լուծումը կը համարէ քաղաքական կուսակցութիւններու կողմէն սահմանադրութեան եւ օրէնքի ծիրէն ներս իրադրութեան քննարկումը: Ինչպէս կը հաղորդէ «Արմէնփրէս»-ը, այս մասին ան ըսաւ լրագրողներու հետ հանդիպման ժամանակ:

Կարապետեանը յիշեցուց  24 Ապրիլին տարածած յայտարարութիւնը՝ որով դիմած էր ՀՀ նախագահին՝ առաջարկելով  իր նախընտրած ձեւաչափով կազմակերպելու հանդիպում խորհրդարանական եւ արտախորհրդարանական քաղաքական ուժերու միջեւ: «Ընդ որում նշած ենք, որ որեւէ փակ օրակարգ չկայ: Ընդհուպ մինչեւ արտահերթ ընտրութիւններ, եթէ քաղաքական ուժերը համաձայնին»,- յիշեցուցած է ան:

Կարապետեանը, դիմելով լրագրողներուն, որպէս հասարակութեան, քաղաքացիներու վրայ չափազանց մեծ ազդեցութիւն ունեցող, ամենաագործուն քաղաքացիական շերտ, կոչ ըրաւ հանդէս գալ հանդուրժողականութեան կոչերով: «Մենք այսօր որեւէ սահմանափակում քաղաքական օրակարգի մէջ չենք դրած եւ չենք դներ: Հետեւաբար` կը կարծեմ, որ ամենատրամաբանական լուծումը այն է, քաղաքական կուսակցութիւնները մեր սահմանադրութեան, օրէնքի սահմաններուն մէջ նստին եւ քննարկեն իրադրութիւնը: Եթէ իրենք որոշեն, որ արտահերթ ընտրութիւններու անհրաժեշտութիւն կայ, որոշեն այն ժամկէտները, որոնք իրենք կ’ուզեն, որպէսզի պատրաստուինք, բոլորը ըլլան հաւասար խաղի պայմաններու մէջ, ըստ անոր արդէն կը շարժուինք առաջ»,- ըսաւ վարչապետի պաշտօնակատարը:

Ան շեշտեց, որ այսպէս շարունակելով պիտի ըլլան շատ տնտեսական խնդիրներ, խնդիրներ ներդրողներու հետ կապուած, զբօսաշրջիկները չեն գար:

«Ապակայուն վիճակը չի կրնար օգուտ տալ մեր երկրին, այդ իսկ պատճառով ես կը խնդրեմ մեր բոլոր քաղաքացիներուն՝ տատիկներուն, պապիկներուն , ծնողներուն, երեխաներուն, ուսանողներուն՝ առաւելագոյնս սթափ մտածել, թէ ինչ կ’ուզենք մենք: Շատ կը գնահատեմ եւ կը յարգեմ մեր քաղաքացիներու կարծիքը եւ դժգոհութիւնը: Ըստ անոր արդէն մենք համապատասխան արձագանգ տուած ենք, բաւարարուած են կէտեր, մենք կը յայտարարենք քաղաքացիական օրակարգ, կը յայտարարենք, որ քաղաքական ուժերը պիտի նստին եւ խօսին: Թող քաղաքական ուժերը նստին պայմանաւորուին, մէկս միւսի վրայ չճնշենք»,- ընդգծեց Կարապետեան:

Ան յայտնեց, որ մշտապէս ձեռքը կը պահէ զարկերակի վրայ եւ կը տեսնէ, թէ ինչքանով կը նուազի զբօսաշրջութիւնը, գործարարներու հետաքրքրութիւնը: «Մենք պիտի գանք վիճակի մը, որ այս տնտեսական վիճակը բարձրացնելը շատ դժուար պիտի ըլլայ: Չեմ գիտեր կը յիշէք, թէ չէ, մենք առաջին 3 ամիսը ունէինք 10.6 տոկոս տնտեսական աճ, լաւ միտում կայ: Շատ լաւ կը գիտակցինք, որ մեր քաղաքացիներու մեծ մասը դեռ իր վրայ անիկա չի զգար: Բայց մենք պէտք է նաեւ հասկնանք, որ այլ տարբերակ չկայ: Պէտք է այս ամէնը գայ, յանգի մէկ կէտի, որմէ յետոյ քաղաքացիները կը զգան այդ մէկը»,- նշեց Կարապետեան:

LEAVE A REPLY

Please enter your comment!
Please enter your name here