ԱՐՔԱՅԱԶՆ ՉԱՐԼԶ ԱՅՑԵԼԵՑ ԷՋՄԻԱԾԻՆ

Ուէյլզի արքայազն Չարլզ, որ Հայաստան կը գտնուի «Երեւան, իմ սէր» բարեգործական հիմնադրամի հրաւէրով,  այցելեց  Մայր Աթոռ Սուրբ Էջմիածին: Մայր Տաճարին մէջ արքայազնին ողջունեց  Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը: Վեհափառ Հայրապետը արքայազնին ներկայացուց  Հայոց Եկեղեցւոյ պատմական առաքելութիւնը հայ ժողովուրդի կեանքին մէջ եւ կարեւոր դերակատարութիւնը ազգային ինքնութեան պահպանման, անկախ պետականութեան վերականգնման գործին: Նորին Սրբութիւնը նաեւ անդրադարձաւ  միջեկեղեցական յարաբերութիւններուն` մասնաւորապէս ներկայացնելով Հայ եւ Անգլիկան Եկեղեցիներու միջեւ առկայ համագործակցութիւնը:

Այնուհետեւ Ամենայն Հայոց Կաթողիկոսը եւ արքայազն Չարլզը այցելեցին Մայր Տաճարի աւանդատուն-թանգարան, ուր Ուէյլզի արքայազնը ծանօթացաւ  Հայ Եկեղեցւոյ կողմէ պահպանուող հոգեւոր եւ մշակութային արժէքներուն:

Ուէյլզի արքայազն Չարլզը եղաւ  նաեւ «Վաչէ եւ Թամար Մանուկեան» մատենադարան, ուր ի պատիւ արքայազնին տեղի ունեցաւ ընդունելութիւն, որուն ներկայ գտնուեցան  Մայր Աթոռ Ս. Էջմիածինի բարերարներ, տէր եւ տիկին Վաչէ եւ Թամար Մանուկեաններ, տիար Արմէն Սարգսեան, տէր եւ տիկին Հայկ եւ Էլզա Թիթիզեաններ:

Հայաստան այցելութեան ընթացքին արքայազն Չարլզ այցելեց  Խոր Վիրապ , Ս. Գեղարդաւանք եւ Ս. Հռիփսիմէ եկեղեցիները:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button