Հանդիպման Չներկայանալու Կարապետեանի Որոշումէն Ետք՝ Փաշինեան Կոչ Կ՛ընէ 1 Մայիսին «Հեղեղելու» Երեւանը

0
41

ԵՐԵՒԱՆ, «Երկիր», «Նիուզ».- Ազգային ժողովի պատգամաւոր, ընդդիմադիր շարժման առաջնորդ Նիկոլ Փաշինեան մամլոյ ասուլիսի մը ընթացքին ըսաւ, որ վարչապետի պաշտօնակատար Կարէն Կարապետեանի հետ 27 Ապրիլին հրաւիրուած հանդիպումը չէ կայացած, քանի որ Հանրապետական կուսակցութեան մէջ լիակատար շփոթ կը տիրէ, իսկ Կարապետեան չի վստահիր բանակցային իր ուժերուն։

«Եթէ նա վստահ չէ իր բանակցային ուժերին՝ երկրի ներսում, ապա ինչպէ՞ս է բանակցելու Արցախի հարցում», աւելցուց ան:

Փաշինեան խոստացաւ շարունակել ցոյցերը, մինչեւ կարելի ըլլայ Հայաստանի քաղաքական ճգնաժամին լուծում մը գտնել։ «Մենք պէտք է աշխատենք լուծման ուղղութեամբ՝ ցոյցերի եւ բանակցութիւնների միջոցաւ», յայտարարեց Նիկոլ Փաշինեան: Ան նաեւ կոչ ըրաւ Հայաստանի քաղաքացիներուն, որ  1 Մայիսին, առաւօտեան ժամը 8-ին, «հարիւր հազարաւոր»ներով հեղեղեն Երեւանի փողոցները, հրապարակները եւ Ազգային ժողովի յարակից փողոցները:

Անդրադառնալով վարչապետի պաշտօնին ՀՀԿի ներկայացուցիչի ընտրութեան հնարաւորութեան՝ Նիկոլ Փաշինեան ըսաւ, որ այդ պարագային ճգնաժամը պիտի չլուծուի։

Այն հարցումին, թէ ինչո՛ւ «Ծառուկեան» դաշինքին եւ ՀՅԴ-ին հետ կը բանակցի փակ դռներու ետին, իսկ Կարէն Կարապետեանի հետ կը մերժէ այդ մէկը կատարել՝ Փաշինեան պատասխանեց. «ՀՅԴ-ն եւ «Ծառուկեան» դաշինքն այս քաղաքական ճգնաժամին կողմ չեն: Հանրապետականը տուեալ դէպքում այս քաղաքական ճգնաժամին կողմ է, եւ մենք պատկերացնում ենք բանակցութիւնները միայն այս ձեւով՝ լրագրողների մասնակցութեամբ, բա՛ց»:

Ան աւելցուց, թէ ՀՅԴ եւ «Ծառուկեան» խմբակցութիւնները պէտք է յայտարարեն, թէ որուն ի նպաստ պիտի քուէարկեն Մայիս 1ին։ «Պէտք է այսօր կամ վաղը յայտարարեն», պնդած է ան:

Նշենք, որ նախապէս Կարէն Կարապետեանի մամլոյ խօսնակ Արամ Արարատեան յայտարարութիւն մը տարածած էր՝ նշելով, որ Փաշինեանի հերթական հրաւէրը նախորդէն չի տարբերիր՝ բացի անկէ, որ այս անգամ ան չի թելադրեր, թէ որո՛ւն հետ պէտք է գալ բանակցութիւններու: Արարատեան աւելցուց. «Կարէն Կարապետեանի պատասխանը նո՛յնն է, ինչ նախորդ անգամ: Բանակցութիւնները, ուր մէկ կողմը բացառապէս կը թելադրէ իր օրակարգը, իսկ միւսը չի կրնար օրակարգ ներկայացնել՝ չեն կրնար համարուիլ բանակցութիւններ: Առաւել, Կարէն Կարապետեան կը մնայ այն տեսակէտին, որ լրատուամիջոցներուն առջեւ բանակցութիւններու իրականացումը արդէն իսկ կ՛ենթադրէ, որ բանակցութիւններուն նպատակը որեւէ արդիւնք մը արձանագրել չէ՛: Այդ իսկ պատճառով, մասնակցիլը այնպիսի «բանակցութիւններ»ու, որոնք լուծումներ գտնելու հաւանականութիւն չունին, վարչապետի պաշտօնակատարը կը համարէ անհեռանկարային: Ըստ Կարէն Կարապետեանի՝ կ՛արժէ, որ պարոն Փաշինեան ընդունի բոլոր խորհրդարանական եւ արտախորհրդարանական ուժերուն ուղղուած Հանրապետութեան նախագահին առաջարկը՝ երկրին մէջ ստեղծուած իրավիճակը եւ անկէ դուրս գալու ուղիները համատեղ քննարկելու մասին»:

LEAVE A REPLY

Please enter your comment!
Please enter your name here