«Մեր Զինծառայողները Կը Գիտակցին Իրենց Առաքելութեան». Տիգրան Աբրահամեան

0
54

Սահմանագիծին վրայ հակառակորդի տեղաշարժերուն, աշխուժացման, Հայաստանի մէջ ներքաղաքական իրավիճակին՝ պաշտպանութեան բանակին վրայ ունեցած հնարաւոր ազդեցութեան հարցերուն մասին «Փանորամա» խօսեցաւ Արցախի նախագահի խորհրդական Տիգրան Աբրահամեանի հետ:

«ՓԱՆՈՐԱՄԱ.- Սահմանի վրայ հակառակորդին կողմէ կուտակումները կը շարունակուի՞ն:

ՏԻԳՐԱՆ ԱԲՐԱՀԱՄԵԱՆ.- Հակառակորդին՝ տարբեր ուղղութիւններով շարժերն ու կուտակումները կը շարունակուին: ՊԲը կը հետեւի անոնց եւ ըստ անհրաժեշտութեան գործուն քայլերու կը ձեռնարկէ:

«ՓԱՆՈՐԱՄԱ.- Կուտակումներուն զուգահեռ ատրպէյճանական կողմէ աշխուժացում՝ յարձակման, հետախուզական խումբերու ներթափանցման կամ այլ փորձեր եղա՞ծ են:

ՏԻԳՐԱՆ ԱԲՐԱՀԱՄԵԱՆ.- Վերջին տարիներուն, առաջնագիծին վրայ իրականացած գիտարուեստական վերազինման իբրեւ արդիւնք՝ հակառակորդին կողմէ յարձակման գործողութիւններ իրականացնելու վտանգները կտրուկ կերպով նուազած են: Հակառակորդը առաջնագիծին վրայ աշխուժութիւն կը մտցնէ դիպուկահար խումբերու, ծանր գնդացիրներու, ինչպէս նաեւ առաջնագիծին վրայ կտրուկ տեղաշարժներու միջոցով:

«ՓԱՆՈՐԱՄԱ.- Հայաստանի մէջ ստեղծուած ներքաղաքական իրավիճակը որեւէ ազդեցութիւն կը ձգէ՞ ՊԲ մարտունակութեան վրայ:

ՏԻԳՐԱՆ ԱԲՐԱՀԱՄԵԱՆ.- Պաշտպանութեան բանակը իր ամէնօրեայ ծառայութեամբ անընդհատ կը ձգտի բարձրացնել իր մարտունակութիւնը: Տրամաբանօրէն հայաստանեան ներքաղաքական զարգացումները չեն կրնար ազդեցութիւն չունենալ առաջնագիծին վրայ տիրող իրավիճակին, մասնաւորապէս հակառակորդի վարքագիծին վրայ: Սակայն պէտք է ընդգծեմ, որ պաշտպանութեան բանակն ու անոր զինծառայողները չափազանց լրջօրէն կը գիտակցին իրենց առաքելութեան եւ պատիւով կը կատարեն իրենց վրայ դրուած մարտական խնդիրը: Մեր զինուորը իր տեղն է, լաւագոյնս կը տիրապետէ Արցախի շուրջ տեղի ունեցող զարգացումներուն եւ պատրաստ է որեւէ իրավիճակի մէջ զսպելու, հակազդելու Ատրպէյճանի որեւէ քայլ, որ վտանգ կը ներկայացնէ մեր անվտանգութեան:

LEAVE A REPLY

Please enter your comment!
Please enter your name here