«Ելք»-ը Միաձայն Որոշեց Վարչապետի Թեկնածու Առաջադրել Նիկոլ Փաշինեանը

0
41

Այսօր առաւօտեան մեկնարկեց Ազգային ժողովի «Ելք» խմբակցութեան նիստը` խմբակցութեան ղեկավար, Հայաստանի երրորդ նախագահ Սերժ Սարգսեանի եւ Հանրապետական կուսակցութեան յետագայ իշխանավարման դէմ պայքարը գլխաւորող Նիկոլ Փաշինեանի մասնակցութեամբ: Օրակարգի վրայ Հայաստանի վարչապետի թեկնածու առաջադրելու հարցն էր:

Նիստէն ետք խմբակցութեան պատգամաւոր Արարատ Միրզոյեան «Ազատութիւն» ռատիօկայանին  յայտնեց, որ միաձայն որոշած են վարչապետի թեկնածու առաջադրել Նիկոլ Փաշինեանը: Միրզոյեան նաեւ կարծիք յայտնեց, որ իրենց թեկնածուին համար խորհրդարանական մեծամասնութեան` Հանրապետական խմբակցութեան աջակցութեան հարցով խնդիր պիտի չունենան:

Այսօր նախատեսուած են Փաշինեանի հանդիպումները նաեւ Ազգային ժողովի միւս խմբակցութիւններու` Հանրապետականի, «Ծառուկեան» դաշինքի եւ ՀՅ Դաշնակցութեան հետ:

Յիշեցնենք, երէկ երեկոյեան Հանրապետութեան հրապարակի վրայ կայացած հանրահաւաքի ընթացքին Նիկոլ Փաշինեան յայտարարեց, որ պատրաստ է «պատասխանատու ձեւով ստանձնելու Հայաստանի Հանրապետութեան վարչապետի պաշտօնը»: Անոր այս յայտարարութիւնը ջերմ ընդունելութեան արժանացաւ հրապարակի վրայ հաւաքուած հազարաւոր աջակիցներու կողմէ:

Խորհրդարանը Մայիս 1-ին նշանակուած յատուկ նիստի ընթացքին նոր վարչապետ պիտի ընտրէ:

Սերժ Սարգսեանը Հայաստանի վարչապետի պաշտօնէն հրաժարական տուաւ Ապրիլ 23-ին` ընտրուելէն եւ նշանակուելէն քանի մը օր անց:

LEAVE A REPLY

Please enter your comment!
Please enter your name here