ՀԵԸ ԱՆԴՐԱՆԻԿ ՊԷՅՐՈՒԹ ԼԻԲԱՆԱՆԻ ՊԱՍՔԵԹՊՈԼԻ Բ. ԴԱՍԱԿԱՐԳԻ ԱԽՈՅԵԱՆ

0
70

ՀԲԸՄ- ՀԵԸ-ի   ընտանիքը  յիշատակելի օր մը արձանագրեց  Լիբանանի պասքեթպոլի  Բ. դասակարգի  ախոյեանութեան պատմութեան մէջ:

Արդարեւ, Չորեքշաբթի, 2 Մայիս 2018-ի երեկոյեան,  ի ներկայութիւն Լիբանանի պասքեթպոլի ֆետերասիոնի նախագահ  Փիռեռ Քախիայի եւ անդամներուն, ՀԵԸ-ի Կեդրոնական  Վարչութեան ատենապետ Վիգէն Չերչեանի եւ անդամներու, ՀԵԸ-ի «Անդրանիկ»  փողերախումբին,  ՀԵԸ Անդրանիկ Անթիլիասի եւ  ՀԵԸ Անդրանիկ Սեւանի  Գործադիրի անդամներու,մեծաթիւ  ՀԵԸ-ականներու, մարզասէրներու, ՀԵԸ  Անդրանիկ Պէրութ   պարտութեան  մատնեց  Հուփսը եւ արժանիօրէն շահեցաւ Լիբանանի պասքեթպոլի Բ. դասակարգի  ախոյեանութեան տիտղոսը:Մրցումը տեղի ունեցաւ ՀԲԸՄ-ի Տեմիրճեան կեդրոնի «Անդրանիկ» մարզադաշտին մէջ:

Նախքան  մրցումը, ՀԵԸ-ի «Անդրանիկ» փողերախումբը  նուագեց Լիբանանի եւ ՀԵԸ-ի  քայլերգները:  Մարզասէր  հասարակութիւնը,  Լիբանանի եւ ՀԵԸ-ի  դրօշները  բարձրացուցած յոտնկայս  ընկերակցեցաւ զոյգ  քայլերգներուն:

Դաշտի վրայ  ծաւալեցաւ  սուր եւ հաւասար պայքար: Աւարտականի համար նախատեսուած երեք  հանդիպումներէն ետք, ՀԵԸ Անդրանիկ կը վայելէր՝ 2-1 առաւելութիւն մը: Յաղթանակ մը եւս եւ ՀԵԸ Անդրանիկ պիտի  հռչակուէր ախոյեան:  Հուփս  դաշտ ներկայացած էր  յաղթանակ ապահովելու վճռակամութեամբ: Հակառակ այս իրողութեան,  մեր տղաքը ցուցադրեցին  տպաւորիչ  խաղ, անգամ մը եւս  ապացուցելով, թէ  առաջին իսկ  հանգրուանէն արժանիօրէն   գլխաւորած են ախոյեանութեան  ընդհանուր դասաւորոմը,անպարտելի  մնացած խմբային  եւ  կիսաւարտական  հանգրուանի բոլոր մրցումներուն: Կէտերու առաւելութիւնը միշտ կը մնար ի նպաստ ՀԵԸ  Անդրանիկին, սակայն Հուփս կը  մերժէր տեղի տալ եւ կը  փորձէր հաւասարիլ:  Վերջաւորութեան անոնք խոնարհեցան մեր  տղոց  վճռակամութեան առջեւ: Մեր  տղաքը՝ 66-61 արդիւնքով պարտութեան մատնեցին Հուփսը: Ի  հարկէ յաղթանակին մէջ  մեծ բաժին ունեցան  ՀԵԸ Անդրանիկի համակիրները, որոնք մրցումին առաջին իսկ վայրկեանէն   քաջալերեցին իրենց սիրելի խումբը:

Նշենք, թէ ՀԵԸ Անդրանիկ աւարտական մրցումին հասնելով, արդէն իսկ ապահոված էր Ա. դասակարգ  բարձրանալու ուղեգիրը, սակայն  նոյնքան  կարեւոր էր  յաղթանակով աւարտել  եզրափակիչ մրցումը եւ շահիլ ախոյեանութեան տիտղոսը:

Այս   ուրախ առիթով  կը  շնորհաւորենք ՀԵԸ-ի մարզական վարչութիւնը  գլխաւորութեամբ  պասքեթպոլի պատասխանատու Թոնի Ճունթոյեանին, խումբի  մարզիչ  Վինքօ Պաքիչը, օգնական մարզիչներ՝ Նարեկ Աւետիքեանը, Ճորճ Տաղէրը եւ   համայն խումբին  մարզիկները:

Կ’արժէ յիշել, որ  երէկ՝ Չորեքշաբթի ընդհանրապէս   մարզական պատմական  օր մըն էր լիբանանահայութեան համար՝ ՀՄԸՄ  շահեցաւ Լիբանանի պասքեթպոլի  բաժակը , իսկ  ՀԵԸ Անդրանիկ՝  Լիբանանի պասքեթպոլի Բ. դասակարգի ախոյեանութեան  տիտղոսը:

LEAVE A REPLY

Please enter your comment!
Please enter your name here