Նոր Կառավարութեան Ծրագիրը Չի Նախատեսեր Արտաքին Քաղաքականութեան Փոփոխութիւն

0
27

ՍՈՉԻ, «Արմէնփրէս».- Երկուշաբթի, 14 Մայիսին, Սոչիի մէջ Եւրասիական տնտեսական միութեան (ԵԱՏՄ) բարձրագոյն խորհուրդի լայն կազմով գումարուած նիստին ընթացքին, Հայաստանի վարչապետ Նիկոլ Փաշինեան յայտարարեց, որ Հայաստան տրամադրուած է շարունակել աշխոյժ փոխգործակցութիւնը ԵԱՏՄ գործընկերներուն հետ:

Փաշինեան յիշեցուց, որ Հայաստանի մէջ տեղի ունեցած է իշխանութեան խաղաղ փոփոխութիւն, իսկ նոր ձեւաւորուած կառավարութեան ծրագիրը հայեցակարգային առումով չի նախատեսեր արտաքին քաղաքական ուղենիշի փոփոխութիւն:

«Հաստատում եմ Հայաստանի Հանրապետութեան ստանձնած միջազգային պարտաւորութիւններին լիակատար յանձնառութիւնը, այդ թւում՝ Եւրասիական տնտեսական միութեան շրջանակում», յայտարարեց Նիկոլ Փաշինեան:

ԵԱՏՄ բարձրագոյն խորհուրդի այս նիստը անդամ-պետութիւններու ղեկավարներու 2018ի առաջին հանդիպումն է: Բարձրագոյն խորհուրդը միութեան բարձրագոյն մարմինն է, որուն կազմին մէջ կը մտնեն անդամ պետութիւններու ղեկավարները: Եւրասիական տնտեսական միութիւնը կը գործէ 1 Յունուար 2015էն ի վեր: Անոր մաս կը կազմեն Հայաստան, Պելոռուս, Ղազախստան, Ղրղզիստան եւ Ռուսիա:

LEAVE A REPLY

Please enter your comment!
Please enter your name here