«Հանրութիւնը Պէտք Է Զգայ, Որ Այս Կառավարութիւն Առաջին Հերթին Հաշուետու Է Իր Առջեւ». Վաչապետ Փաշինեան՝ Նորանշանակ Նախարարներուն

0
31

ԵՐԵՒԱՆ.- Նախագահ Արմէն Սարգսեան շաբաթ օր հրամանագիրներ ստորագրեց կառավարութեան նոր անդամներ նշանակելու վերաբերեալ:

Այդ հրամանագիրներով Մհեր Գրիգորեան նշանակուեցաւ փոխվարչապետ: Զոհրապ Մնացականեան նշանակուեցաւ արտաքին գործոց նախարար, Մանէ Թանդիլեան՝ աշխատանքի եւ ընկերային հարցերու նախարար, Ատոմ Ջանջուղազեան՝ ելեւմուտքի նախարար, Արտակ Զէյնալեան՝ արդարադատութեան նախարար, Արսէն Թորոսեան՝ առողջապահութեան նախարար, Արթուր Խաչատրեան՝ գիւղատնտեսութեան նախարար, Լեւոն Վահրադեան՝ մարմնամարզութեան եւ երիտասարդութեան հարցերու նախարար:

Արծուիկ Մինասեան նշանակուեցաւ տնտեսական զարգացման եւ ներդրումներու նախարար, Էրիկ Գրիգորեան՝ բնապահպանութեան նախարար, Աշոտ Յակոբեան՝ փոխադրամիջոցներու, կապի եւ տեղեկատուական արհեստագիտութեան նախարար, Հրաչեայ Ռոստոմեան՝ արտակարգ իրավիճակներու նախարար, Արթուր Գրիգորեան՝ ուժանիւթի ենթակառոյցներու եւ բնական պաշարներու նախարար, Լիլիթ Մակունց՝ մշակոյթի նախարար:

Անցեալ շաբաթ տեղեկացուցած էինք արդէն, որ Աւելի կանուխ Արարատ Միրզոյեան նշանակուած էր առաջին փոխվարչապետ, իսկ Տիգրան Աւինեան՝ փոխվարչապետ: Դաւիթ Տօնոյեան նշանակուած էր պաշտպանութեան նախարար, Սուրէն Պապիկեան՝ տարածքային կառավարման եւ զարգացման նախարար, Արայիկ Յարութիւնեան՝ կրթութեան եւ գիտութեան նախարար, Մխիթար Հայրապետեան՝ սփիւռքի նախարար:

Անցեալ Շաբաթ օր վարչապետ Նիկոլ Փաշինեանի գլխաւորութեամբ տեղի ունեցաւ խորհրդակցութիւն մը, որուն մասնակցեցան կառավարութեան նորանշանակ նախարարները: Վարչապետը շնորհաւորեց զանոնք, կառավարութեան կազմին մէջ ընդգրկուելնուն առիթով եւ յայտնեց. «Կը խնդրեմ ձեզմէ այսօրուընէ անցնիլ աշխատանքի, ծանօթանալ ընթացիկ վիճակին, որպէսզի ընդհանրապէս ժամանակ չկորսնցնենք, որովհետեւ կան հարցեր, որոնք առաջնահերթ ու հրատապ են եւ լուծումի կը կարօտին: Մեր աշխատանքի տրամաբանութիւնը եւ փիլիսոփայութիւնը պէտք է ըլլայ հետեւեալը. մեր կոչումը եւ գերխնդիրը Հայաստանի քաղաքացիներու կեանքը առաւել յարմարաւէտ ու բարեկեցիկ դարձնելն է, անշուշտ, մեր կառավարութիւնը քաղաքական առումով ունի առաջնահերթութիւն՝ Հայաստանի Հանրապետութիւնը նախապատրաստել արտահերթ խորհրդարանական ընտրութիւններու, բայց այս ընթացքին պէտք է կարենանք արձանագրել լուրջ արդիւնքներ: Մեր կառավարութեան ոճը պէտք է ըլլայ մշտական երկխօսութիւնը հասարակութեան հետ: Հանրութիւնը պէտք է զգայ, որ այս այն կառավարութիւնն է, զոր ինք ձեւաւորած է եւ որ առաջին հերթին հաշուետու է իր առջեւ, ոչ միայն կ՛առաջարկէ գաղափարներ, այլ նաեւ ունի բոլոր փաստարկները զանոնք հիմնաւորելու եւ անոնց օգտակարութիւնը ընդգծելու համար», շեշտեց Նիկոլ Փաշինեան:

«Արմէնփրէս»ը կը տեղեկացնէ, որ վարչապետը յայտնեց, որ յառաջիկային կառավարութիւնը պէտք է իրականացնէ անհրաժեշտ բարեփոխումներ տարբեր ոլորտներու մէջ եւ այդ առումով կարեւոր համարեց հանրութեան աջակցութիւնը: Ըստ Նիկոլ Փաշինեանի՝ հանրային աջակցութիւնը այն հիմնական գործօնն է, որուն վրայ պէտք է յենուի կառավարութեան գործունէութիւնը:

«Մեր կառավարութեան հետ մեծ յոյսեր կը կապուին եւ մեր կարեւորագոյն հարցն է՝ արդարացնել Հայաստանի քաղաքացիներուն յոյսերը: Այս կ՛ենթադրէ նոր ոճ, նոր մօտեցում, նոր փիլիսոփայութիւն, նոր մշակոյթ: Կարեւոր չէ, թէ մինչեւ օրս Հայաստանի Հանրապետութեան մէջ ի՛նչ կը նշանակէր ըլլալ նախարար կամ փոխվարչապետ, հիմա այդ պէտք է նշանակէ բոլորովին այլ բան. կարեւոր չէ թէ մինչեւ այս պահը ի՛նչ կը նշանակէր Հայաստանի Հանրապետութեան վարչապետ, ես յոյս ունիմ, որ այդ 8 Մայիսէն ետք բոլորովին նոր բան պիտի նշանակէ», յայտնեց վարչապետը:

Նիկոլ Փաշինեան նորանշանակ նախարարներուն շնորհակալութիւն յայտնելէ ետք ըսաւ, որ այսպիսով ձեւաւորուած է համախոհական կառավարութիւն մը: «Գիտենք, որ կառավարութեան կազմին մէջ ընդգրկուած են տարբեր քաղաքական ուժերու ներկայացուցիչներ, բայց կառավարութիւնը պէտք է գործէ որպէս խումբ, հակառակ պարագային մենք չենք կրնար ըլլալ արդիւնաւէտ, եւ ես կ՛երաշխաւորեմ, որ կառավարութիւնը այդպէս ալ պիտի գործէ: Յոյս ունիմ, որ այս գծով ունինք լիարժէք եւ փոխադարձ հասկացողութիւն», ըսաւ վարչապետը:

Գործադիրի ղեկավարը յառաջիկայի կարեւոր հարցերէն համարեց կառավարութեան ծրագիրի մշակումն ու ներկայացումը Ազգային ժողովին: «Կը խնդրեմ, որ իւրաքանչիւր նախարար իր ոլորտի ուղղութեամբ ժամ առաջ սկսի կառավարութեան ծրագիրի մշակման աշխատանքներուն: Անշուշտ, այդ ծրագիրը պէտք է ըլլայ լաւատես, արտայայտէ այն բոլոր յոյսերը, զորս Հայաստանի քաղաքացիները կը կապեն կառավարութեան գործունէութեան հետ: Մենք պէտք է հաւաքենք մեր բոլոր ուժերը եւ անցնինք աշխատանքի», ըսաւ Նիկոլ Փաշինեան:

Խորհրդակցութեան ընթացքին վարչապետը անդրադարձաւ անեւ կառավարութեան հետագայ գործունէութեան՝ միջնաժամկէտ ծախսային ծրագիրին եւ փտածութեան դէմ պայքարին առնչուող այլ հարցերու:

LEAVE A REPLY

Please enter your comment!
Please enter your name here