ՇԵՐՊԷԼ ԳԼԽԱՒՈՐԵՑ ԱՊԱՀՈՎԱԿԱՆ ԿԵԴՐՈՆԱԿԱՆ ԽՈՐՀՈՒՐԴԻ ՆԻՍՏԻՆ

Ներքին գործոց նախարարի պաշտօնակատար  Մարուան Շերպէլ  գլխաւորեց ապահովութեան կեդրոնական  խորհուրդի նիստին:  Ան դիտել տուաւ, որ Թրիփոլիի մէջ կատարուածը  ողբերգութիւն մըն է:  Շերպէլ  յայտնեց, թէ քաղաքական  բոլոր հոսանքներուն միջեւ լարուածութիւնը  մեղմացնելու   համաձայնութիւն գոյացած է, սակայն դժբախտաբար, հակակշիռը դուրս  եկած է քաղաքական   կողմերէն եւ զինեալները  չեն ենթարկուիր  անոնց հրահանգներուն: « Թրիփոլիի մէջ  պատահածը գիտնալու համար, անհրաժեշտ է իմանալ, թէ ին՞չ տեղի կ’ունենայ Սուրիոյ մէջ».եզրակացուց նախարարը:  Շերպէլ   ըսաւ, թէ առնուազն հարիւր հազար բանակային անհրաժեշտ է   սուրիական սահմանը ամբողջութեամբ  փակելու համար: Նախարարը   նշեց, թէ  ոչ ոքի  ձեռնտու է խառնակութիւնը  եւ համայնքներուն միջեւ համերաշխութիւն կը տիրէ այս հարցին շուրջ:

 Երեսփոխան Սեմիր Ճըսր  զարմանք յայտնեց Թրիփոլիի մէջ բախումներու շարունակութեան: Ան ըսաւ,թէ  ժողովուրդը  կը վստահի բանակի կարողութեան եւ  համոզուած է, որ բանակը ի վիճակի է  վճռելու  կացութեան ելքը: Մուսթաքպալ Հոսանքի   քաղաքական  դիւանի անդամ Մուսթաֆա  Ալլուշ  յայտարարեց, թէ Թրիփոլիի ճակատը բռնկած պիտի  մնայ մինչեւ Սուրիոյ  վարչակարգին անկումը:

Թրիփոլիի  իրավիճակը կը մնայ մտահոգիչ:  Երթեւեկութիւնը   գրեթէ դադրած էր քաղաքին մէջ:  Քաղաքի կարգ մը  շրջաններ մուտքը անհնար դարձած է՝ արձակազէններու  գոյութեան պատճառով:   Կրթական եւ առեւտրական հաստատութիւններ կը մնան  փակ: Ճապալ Մըհսէնի եւ Պապ Թըպենիյի  միջեւ օրուան տարբեր  ժամերուն  տեղի կ’ունենան   հրթիռարձակումներ:

Թրիփոլիի մէջ  երեսփոխան Մուհամմէտ Քապարայի  բնակարանին մէջ տեղի ունեցաւ քաղաքական բոլոր հոսանքներուն մասնակցութեամբ ընդլայնուած նիստ մը: Նիստին  մասնակիցները  48 ժամուան զինադադար հաստատելու կոչ մը ուղղեցին  հակամարտութեան կողմերուն:

 

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button