Արցախի Տագնապին Կարգաւորումը Հայաստանի Համար Առաջնահերթութիւն Է. Մնացականեան

0
61

ԵՐԵՒԱՆ, «Արմէնփրէս».- Ռուսական «Քոմերսանթ» թերթին հետ հարցազրոյցի մը ընթացքին, Ռուսիա այցելած Հայաստանի արտաքին գործոց նախարար Զօհրապ Մնացականեան յայտնած է, թէ Արցախի հակամարտութեան կարգաւորումը եղած է ու կը մնայ ո՛չ միայն Հայաստանի արտաքին քաղաքականութեան, այլեւ պետականութեան ու ապահովութեան ամբողջ համակարգին առաջնահերթութիւնը:

«Լեռնային Ղարաբաղի անվտանգութիւնն ու կարգավիճակը մեզի համար կը շարունակէ մնալ կարեւորագոյն խնդիր: Լեռնային Ղարաբաղի 150 հազարանոց բնակչութեան անվտանգութեան հարցը կը միաւորէ ու կ՛ամրապնդէ Հայաստանի ու երկրի սահմաններէն դուրս գտնուող հայկական հասարակութիւնը: Մենք խելամիտ մարդիկ ենք եւ ունինք յստակ հիմնաւորումներ՝ առաջ տանելու մեր առաջնահերթ անհանգստութեան հարցերը՝ Լեռնային Ղարաբաղի անվտանգութեան ու կարգավիճակին վերաբերեալ: Մեզի պէտք է տարածաշրջան, որ կ՛ապրի խաղաղութեան մէջ, սակայն ատիկա պէտք չէ ըլլայ մեր մարդոց անվտանգութեան հաշուոյն», նշած է Մնացականեան եւ ընդգծած, որ հայկական կողմը կ՛ուզէ շարունակել բանակցային գործընթացը ա՛յդ իսկ շրջանակին մէջ՝ յանուն ամբողջ տարածաշրջանի խաղաղութեան ու անվտանգութեան:

Նախարարը նշած է նաեւ, որ հայկական կողմը կը շարունակէ խնդիրին խաղաղ կարգաւորման ընթացքը՝ ԵԱՀԿ Մինսկի խումբի համանախագահներուն ձեւաչափով:

Լրագրողի այն հարցումին, թէ արդեօք Հայաստան դէմ պիտի ըլլա՞յ Ատրպէյճանը Եւրասիական տնտեսական միութեան անդամ դարձնելու ջանքերուն՝ արտաքին գործոց նախարարը պատասխանած է. «Ատրպէյճան այն երկիրն է, որ շրջափակած է Հայաստանը. այդ երկիրը միակողմանիօրէն միջոցներու կը ձեռնարկէ ընդդէմ Հայաստանի: Պաքուն կը տանի այնպիսի քաղաքականութիւն, որուն նպատակը խոչընդոտելն է փոխգործակցութեան որեւէ գործընթաց, վստահութեան մթնոլորտի ստեղծումը եւ մարդկային շփումներու հաստատումը: Մենք գործ ունինք երկրի մը հետ, որ ամէն կերպ կը նպաստէ ատելութեան մթնոլորտի առաջացման: Տեսէ՛ք այն եզրոյթը, որ կ՛օգտագործուի Հայաստանի ու ամբողջ աշխարհի հայերուն դէմ: Իսկ ԵԱՏՄն համագործակցութեան կազմակերպութիւն է. ի՞նչ կ՛ա-կնկալէք մեզմէ»:

Նաեւ, կարեւոր համարելով տարածաշրջանին մէջ խաղաղութեան ու կայունութեան առկայութիւնը՝ ան ընդգծած է, որ Արցախի խնդիրի կարգաւորման բոլոր գործընթացները պէտք է տեղի ունենան խաղաղութեան նպաստող մթնոլորտի մէջ: «Կարեւոր է այն, որ ի՛նչ մթնոլորտի մէջ տեղի կ՛ունենան բանակցութիւնները։ Պէտք է մթնոլորտ, որ կը նպաստէ խաղաղութեան, այլ ոչ թէ մթնոլորտ մը, որ կը նպաստէ ատելութիւնը աւելցնելուն», նշած է Մնացականեան:

Ապա պատասխանելով այն հարցումին, թէ արդեօք կարելի՞ է որ Հայաստանը ճանչնայ Աբխազիոյ ու Հարաւային Օսեթիոյ անկախութիւնը՝ նախարարը ըսած է. «Մենք հակամարտութիւններու խաղաղ կարգաւորման կողմնակից ենք: Մենք զերծ մնացած ենք Լեռնային Ղարաբաղի անկախութեան ճանաչումէն, քանի որ կողմ ենք բոլոր խնդիրներու լուծման՝ բանակցային գործընթացի միջոցով: Ա՛յս է միւս բոլոր հարցերուն մէջ մեր դիրքորոշման հիմքը»:

LEAVE A REPLY

Please enter your comment!
Please enter your name here