Մեր Ամենակարեւոր Նպատակը Ո՛չ Միայն Կանգնեցնելն է Արտագաղթի Անիւը, Այլեւ՝ Ետ Դարձնելը. Նիկոլ Փաշինեան

0
141

ՀՀ վարչապետ Նիկոլ Փաշինեան, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հետ ներկայ եղած է Հայ Առաքելական եկեղեցւոյ համաշխարհային երիտասարդաց միութեան հաւաքի աւարտական ձեռնարկին, որուն մասնակցած է աշխարհի աւելի քան 20 պետութեան 400 սփիւռքահայ երիտասարդ: Այս մասին կը տեղեկացնեն ՀՀ կառավարութեան տեղեկատւութեան եւ հասարակայնութեան հետ կապերու վարչութենէն:

Դիմելով հաւաքի մասնակիցներուն՝ վարչապետը նշած է. «Սիրելիներս, եղբայրներ եւ քոյրեր, ինծի համար մեծ երջանկութիւն է ձեզ այստեղ տեսնելը՝ Հայաստանի, Երեւանի մէջ: Համոզուած եմ, որ Հայաստանի մէջ շատեր այդ երջանկութիւնը կը զգան՝ ձեզ տեսնելով Երեւանի փողոցներուն մէջ քալելու, զբօսնելու ժամանակ: Ընդհանրապէս, անգամ մը ես դիմատետրի վրայ գրած եմ, երեւի մէկ տարի առաջ, փորձելով նկարագրել, թէ ինչպիսին է ապագայ Հայաստանի մասին իմ պատկերացումը: Այն տեսարանը, որ ժամանակ մը առաջ, շատ հետաքրքրական էր: Երկու մարդ Աբովեան փողոցի այս մայթէն այն մայթը բարձրաձայն իրարու հետ կը խօսէին արեւմտահայերէն եւ կը համաձայնէին, թէ երեկոյեան ուր պէտք է հանդիպին: Ատիկա իսկապէս էպիքական տեսարան էր, երջանկացնող տեսարան էր, որովհետեւ երբ մենք կ՝ըսենք, որ Հայաստանը կը պատկերացնենք իբրեւ պետութիւն մը, որ պէտք է հայութեան մարդկային միջոցները կամ անոր մեծագոյն մասը կեդրոնացնէ իր տարածքին վրայ եւ ապահովէ այդ մարդոց, մեր ժողովուրդի մեծագոյն մասին անվտանգութիւնն ու բարեկեցութիւնը՝ ատիկա մեզի համար պարզապէս գաղափարախօսական խնդիր չէ: Ատիկա խնդիր է, որ մենք կ՝ուզենք լուծել: Մենք կ՝ուզենք, որ դուք այս երջանկութիւնը աւելի ու աւելի յաճախ պատճառէք Հայաստանի Հանրապետութեան՝ ձեր հայրենիքին: Մենք կ՝ուզենք, որ դուք այստեղ ըլլաք ուխտագնացութեան առիթով, առանց ուխտագնացութեան առիթի, ըլլաք ձեր քոյրերու, եղբայրներու, ծնողներու, հարազատներու հետ, ըլլաք աւելի երկար, ըլլաք աւելի յաճախ եւ այնքան երկար ու աւելի յաճախ, որ մենք մտածենք, որ ոչ թէ դուք եկած էք Հայաստան կարճ ժամանակով, այլ մտածենք, որ դուք կարճ ժամանակով պէտք է ետ երթաք Միացեալ Նահանգներ, Ռուսիա, Եւրոպա, Աւստրալիա, Լիբանան, ամէնուր: Այս է մեր խնդիրը, այս  է մեր նպատակը, որովհետեւ Հայաստանի Հանրապետութիւնը երկիր մըն է, որ բոլորիս հայրենիքն է, Հայաստանի Հանրապետութիւնը երկիր մըն է, ուր մենք պէտք է ապրինք, ուր մենք պէտք է ստեղծագործենք, ուր մենք պէտք է ամուսնանանք, ուր մենք պէտք է զաւակներ ունենանք, ուր մենք պէտք է աղօթենք, ուր մենք պէտք է ուխտի երթանք եւ ուր պէտք է հրաւիրենք մեր միւս հայրենակիցները ուխտի, հայրենիքի մէջ մնալու, հայրենիքը շէնցնելու, հայրենիքը հզօրացնելու ուխտը ամենօրեայ գործ եւ ամենօրեայ աշխատանք դարձնելու: Այս է մեր նպատակը եւ այս նպատակին մենք կը ծառայենք ամէն օր: Չկայ որեւէ այլ նպատակ, որուն, իմ ընկալումով, իմաստ ունի ծառայել, քան այն նպատակը, որ Հայաստանի Հանրապետութիւնը պէտք է բառիս իրաւական, տնտեսական, քաղաքական, հասարակական իմաստով բոլորիս համար ըլլայ աշխարհի մէջ լաւագոյն տեղը ապրելու համար: Հայաստանի Հանրապետութիւնը աշխարհի մէջ պէտք է ըլլայ բոլոր իմաստներով ապրելու լաւագոյն տեղը իւրաքանչիւր հայու համար: Մեր խնդիրը, մեր ցանկութիւնը այդքան մեծ է, այդքան ուժեղ է, այդքան համապարափակ եւ կը կարծեմ՝ ոեւէ մէկը չի կասկածիր, որ շատ շուտով այդպէս ալ՝ բոլորիս ուժերով, ուս ուսի պիտի տանք եւ հասնինք այդ նպատակին: Շնորհակալ եմ, որ դուք այստեղ էք, շնորհակալ եմ, որ դուք համաձայն էք նուիրուելու այդ նպատակին եւ ուժ ներդնելու այդ նպատակին մէջ»:

Ի պատասխան մասնակիցներէն մէկուն՝ կառավարութեան կարեւորագոյն նպատակներէն մէկուն մասին հարցին՝ Նիկոլ Փաշինեան նշած է. «Մեր քաղաքական ուժին եւ մեր քաղաքական գործունէութեան ամենակարեւոր նպատակներէն մէկն է մեծ հայրենադրձութեան յարուցումը: Մենք կ՝ուզենք այնպէս ընել, որ մարդիկ ո՛չ միայն անոր համար որոշեն գալ ապրելու Հայաստան, որ ասիկա իրենց հայրենիքն է, իրենց նախնիներուն հողը, այլ ուղղակի անոր համար, որ Հայաստանի Հանրապետութիւնը երկիր մըն է, ուր կայ օրինականութիւն, ուր կայ կարգ ու կանոն, ուր կը յարգուին մարդու իրաւունքները, ուր կայ ժողովրդավարութիւն, ուր հնարաւոր է տնտեսական մրցակցութեան հաւասար պայմաններու մէջ գործունէութիւն ծաւալել, ներդրումներ ընել, հարստանալ եւ հարստացնել, ունենալ ստեղծագործական հնարաւորութիւններ: Իսկ ինչի՞ համար կ՝ընենք մենք ասիկա, ի՞նչն է մեր նպատակը՝ մեր ամենամեծ նպատակը հետեւեալն է. ըստ էութեան արդէն Բագրատունիներու ժամանակներէն Հայաստանէն արտագաղթի անիւը դապձած է, դարձած է եւ դարձած, մեր ամենակարեւոր նպատակն է արտագաղթի այդ անիւը ո՛չ միայն կանգնեցնելը, այլեւ այդ անիւը ետ դարձնեը, որ ինչպէս մարդիկ դարերով արտագաղթած են, այդպէս ալ վերադառնան Հայաստան, վերադառնան, վերադառնան եւ շարունակեն վերադառնալ: Այս է մեր ամենակարեւոր նպատակը»:

LEAVE A REPLY

Please enter your comment!
Please enter your name here