Միացեալ Նահանգները Ռուսիոյ Դէմ Նոր Պատժամիջոցներ Հաստատած Է

0
205

Միացեալ Նահանգներու արտաքին գործոց նախարարութիւնը Սքրիփալներու հարցին պատճառով Ռուսիոյ դէմ նոր պատժամիջոցներ հաստատած է: «Ռոյթըրզ» լրատու գործակալութիւնը կը հաղորդէ, թէ նոր պատժամիջոցները ուժի մէջ պիտի մտնեն ընթացիկ տարուան 22 Օգոստոսէն սկսեալ:

Կը նշուի, որ Սալիզպըրիի մէջ թունաւոր նիւթ օգտագործելով՝ Ռուսիան միջազգային իրաւունքի խախտում կատարած է, իսկ 1991ին որդեգրուած օրէնքին համաձայն՝ որեւէ երկրի կողմէ կենսաբանական կամ քիմիական զէնքի օգտագործումը կը յանգեցնէ Միացեալ Նահանգներու կողմէ պատժական քայլերու ձեռնարկման:

Պատժամիջոցները կը վերաբերին Ռուսիա արտածուող այն ապրանքներուն, որոնք կրնան առնչուած ըլլալ ազգային անվտանգութեան հետ: Մասնաւորաբար, խօսքը կը վերաբերի ելեկտրոնային սարքաւորումներու եւ անոնց բաղադրիչներուն, որոնք կ՛օգտագործուին թռիչքներու ոլորտին մէջ:

Բացի ատկէ, Ռուսիա պէտք է երեք ամսուան ընթացքին ներկայացնէ քիմիական զէնք չօգտագործելու երաշխիքներ, ինչպէս նաեւ համաձայնի միջազգային ստուգումներու իրականացման, այլապէս՝ անոր դէմ պիտի կիրարկուի պատժամիջոցներու երկրորդ թղթածրար մը:

Մոսկուա, իր կարգին, ամերիկեան պատժամիջոցները նկատեց անընդունելի՛: Աւելին, Ռուսիոյ արտաքին գործոց նախարարութիւնը յայտնեց, թէ Մոսկուա «վրէժխնդրական քայլեր» պիտի որդեգրէ:

Յիշեցնենք, որ նախկին լրտես, 66 տարեկան Սերգէյ Սքրիփալ եւ անոր դուստրը, 4 Մարտ 2018ին, ջիղերու վրայ ազդող կազի ազդեցութեան ենթարկուած էին անգլիական Սալիզպըրի քաղաքի առեւտուրի կեդրոններէն մէկուն մէջ, ապա անգիտակից վիճակի մէջ տեղափոխուած էին հիւանդանոց:

Ամերիկեան նոր պատժամիջոցներու հաստատումէն ետք, Մոսկուայի սակարանն ու ռուսական ռուբլին անկում կրեցին: Ռուսական «Կազեթա» կայքը կը հաղորդէ, որ 8 Օգոստոսին, Մոսկուայի սակարանին մէջ ռուբլին՝ տոլարի եւ եուրոյի դիմաց, շուրջ 1.3 առ հարիւրի անկում կրեց: Որոշ պահերու, ռուսական դրամանիշը այնքա՛ն անկում արձանագրած է, որ հասած է տոլարի եւ եւրոյի դիմաց՝ համապատասխանաբար, 65 եւ 75 ռուբլիէն ցած ցուցանիշի:

Վերլուծաբաններ վաղուց կը սպասէին ռուսական դրամանիշի դիրքերու թուլացումին: Անոնք ռուսական դրամանիշի փոխարժէքի թուլացումը կը բացատրեն Ռուսիոյ դէմ ամերիկեան պատժամիջոցներու հաւանական խստացման մասին վերջին օրերու բացասական նորութիւններով: Այդ պատճառով ալ այժմ յառաջացած է ռուբլիի խուճապային վաճառք:

LEAVE A REPLY

Please enter your comment!
Please enter your name here