Հայկական Երեսփոխանական Պլոքը Գումարեց Իր Ընթացիկ Նիստը

0
77

Հայկական երեսփոխանական պլոքը` նախագահութեամբ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի, գումարեց իր ընթացիկ նիստը, ներկայութեամբ երեսփոխաններ Յակոբ Թերզեանի եւ Ալեքսանտր Մաթոսեանի, ինչպէս նաեւ զբօսաշրջութեան նախարար Աւետիս Կիտանեանի:

Նիստին ընթացքին մտահոգութիւն յայտնուեցաւ կառավարութեան կազմութեան եւ անոր վերաբերող յայտարարութիւններուն ու քաղաքական կեցուածքներուն մասին: Պլոքը ընդգծեց, որ երկրին մէջ ներկայիս տիրող մթնոլորտը կ՛անհանգստացնէ ժողովուրդը եւ կը ծանրացնէ անոր նիւթական, տնտեսական եւ ապրուստի բեռը, մինչ լիբանանցին 6 մայիսի երեսփոխանական ընտրութիւններէն ետք կ՛ակնկալէր վկայել լուծումներ եւ տարբեր ծրագիրներու վերաբերող աշխատանք` շրջանցելու համար իր առօրեան յուզող բարդ հարցերը:

Հայկական երեսփոխանական պլոքը մեծապէս գնահատեց Եւրոպական խորհրդարանին մէջ հանրապետութեան նախագահ զօր. Միշել Աունի արտասանած խօսքը, որ միջազգային ընտանիքը դէմ յանդիման դրաւ Լիբանանի եւ անոր դիմագրաւած մարտահրաւէրներուն:

Պլոքը բարձր գնահատեց նաեւ արտաքին գործոց նախարար Ժըպրան Պասիլի արտասանած խօսքը` արաբ արտաքին գործոց նախարարներու արտակարգ նիստին ընթացքին:

Պլոքը քննարկեց նաեւ վերամուտի սեմին քաղաքացին յուզող դժուար պայմանները, յատկապէս նկատի ունենալով անոնց հետեւանքները, մէկ կողմէ` լիբանանցի ընտանիքներուն վրայ, իսկ միւս կողմէ` կրթական հաստատութիւններուն եւ այդ մարզին մէջ ծառայողներուն վրայ:

Հայկական երեսփոխանական պլոքը մտահոգութիւն յայտնեց առողջապահութեան մարզին դիմագրաւած տագնապին նկատմամբ` հաստատելով դեղորայք ստանալու լիբանանցիներուն իրաւունքը եւ հաստատելով առողջապահութեան նախարարութեան կողմէ արտակարգ միջոցառումներով այդ դեղերն ու դարմանումը ապահովելու անհրաժեշտութիւնը:

Պլոքը քննարկեց նաեւ Լիբանանի մէջ գտնուող սուրիացի տեղահանուածներուն իրավիճակը, ինչպէս նաեւ տեղահանուածներու տունդարձին համար որդեգրուած քայլերը: Այս շրջագիծին մէջ, Հայկական երեսփոխանական պլոքը կոչ ուղղեց համապատասխան կառոյցներուն պահպանելու լիբանանցիներուն իրաւունքները, մասնաւորաբար ապահովական կայունութեան շրջագիծին մէջ:

LEAVE A REPLY

Please enter your comment!
Please enter your name here