Ամերիկայի Մէջ Թուրքիոյ Ի Նպաստ Քարոզչութիւն Կը Կատարեն 21 Ընկերութիւններ

0
71

ՆԻՒ ԵՈՐՔ, «Պլումպըրկ».- Միացեալ Նահանգներու մէջ լոպիական գործունէութիւն կատարող աւելի քան 20 ընկերութիւններ, գումարներ ստացած են Թուրքիոյ շահերը պաշտպանելու եւ Անգարայի ի նպաստ քարոզչութիւն կատարելու համար, մինչ այդ, Թուրքիոյ տնտեսութիւնը կը դիմագրաւէ ազգային դրամանիշի արժեզրկման ճգնաժամը եւ նախագահ Տանըլտ Թրամփի սահմանած մաքսատուրքերու տագնապը:

Միացեալ Նահանգներու արդարադատութեան նախարարութեան տուեալներուն համաձայն՝ Թուրքիոյ կառավարութիւնը, քաղաքական կուսակցութիւններն ու այլ կազմակերպութիւններ աւելի քան 7.5 միլիոն տոլար ծախսած են Յունուար 2017էն մինչեւ 2018ի գարուն երկարող ժամանակամիջոցին, Ուաշինկթընի մէջ իրենց շահերը ներկայացնելու համար:

Կը հաղորդուի, որ ընդհանուր առմամբ, 21 ընկերութիւններ բացայայտած են, թէ անցեալ տարուընէ ի վեր աշխատած են Թուրքիոյ օգտին: Այդ 21 ընկերութիւններէն 7ն ներկայիս դադրեցուցած է Թուրքիոյ հետ համագործակցութիւնը:

Հրապարակուած բացայայտումներուն մէջ, սակայն, յստակ մատնանշումներ չեն կատարուիր, այլ միայն կը նշուի ընդհանրական «Միացեալ Նահանգներ-Թուրքիա» յարաբերութիւններու կարգաւորման մասին:

Իբրեւ օրինակ՝ կը յիշուի «Մըրքըրի Փապլիք Ըֆերզ» վերլուծական ընկերութիւնը, որ ներկայացուցած է թէ՛ Թուրքիոյ կառավարութեան, թէ՛ անհատական առեւտուրի շրջանակներուն շահերը, եւ միայն այս տարի 177,600 տոլար գումար ստացած է:

LEAVE A REPLY

Please enter your comment!
Please enter your name here