Հիմա Ամենակարեւոր Շրջափուլն է, Երբ Հայաստանի Մէջ Պէտք Է Ապահովենք Տնտեսական Յեղափոխութիւն. Նիկոլ Փաշինեան

0
213

Հայաստանի Հանրապետութեան վարչապետ Նիկոլ Փաշինեանի գլխաւորած կառավարական պատուիրակութիւնը աշխատանքային այցելութեամբ 13 Սեպտեմբերին ժամանեց Ֆրանսա։

Վարչապետը օդակայանէն ուղղուեցաւ Փարիզի «Երեւան» պուրակ, ուր ծաղկեպսակ տեղադրեց Կոմիտասի յուշարձանին դիմաց՝ յարգանքի տուրք մատուցելով Հայոց Ցեղասպանութեան զոհերու յիշատակին:

Այնուհետեւ վարչապետ Փաշինեան հրաւիրուեցաւ ընթրիքի Ֆրանսայի հայ համայնքի ներկայացուցիչներուն կողմէ, որոնց շարքին էին Ֆրանսայի Ազգային ժողովի հայազգի պատգամաւորներ, քաղաքական, հասարակական գործիչներ, գործարարներ, արուեստագէտներ, Լիոնի քաղաքապետ Ժորժ Քեփենէքեան, Փարիզի 9րդ թաղամասի փոխքաղաքապետ Ալեքսի Կովչեան, Ֆրանսայի կառավարութեան նախկին անդամ Փաթրիք Տեւէճեան, Ֆրանսահայ Կազմակերպութիւններու համակարգող խորհուրդի համանախագահներ Արա Թորանեան եւ Մուրատ Փափազեան, գործարարներ Դանիէլ Քիւրքճեան, Սերժ Չուրուք, Վարդան Սրմաքէշ, Արմէն Պետրոսեան, Ալէն Միքլի, Ֆրանսայի Թատերական գործիչներու միութեան նախագահ Ալէն Թէրզեան եւ աշխարհահռչակ ֆութպոլիսթ Եուրի Ճորկայէֆ եւ ուրիշներ:

Իր խօսքին մէջ վարչապետը յայտնեց, որ այսօրուան ձեռնարկը եւ ֆրանսահայութեան հռչակաւոր զաւակներու ներկայացուածութիւնը կը խորհրդանշեն այն կարելիութիւնները, որոնք այսօր բացուած են Հայաստանի Հանրապետութեան առջեւ:

«Ի՞նչ տեղի ունեցած է Հայաստանի մէջ. շատ պարզ բան մը. Հայաստանի քաղաքացին եւ հայ ժողովուրդը սկսած են հաւատալու իրենք իրենց. առանցքային փոփոխութիւնը, որ տեղի ունեցած է՝ այս է: Կապ չունի, թէ ո՛վ իշխանութիւն է եւ ով՝ ընդդիմութիւն, Հայաստանի Հանրապետութեան մէջ իշխանութիւնը ժողովուրդն է, եւ ասոր մէջ որեւէ չափազանցութիւն չկայ: Այսօր ընդունեցի Ֆրանսա-Հայաստան բարեկամական խումբի ներկայացուցիչները, որոնց հետ տեղի ունեցաւ հետաքրքրական զրոյց մը. անոնց ըսի, որ Հայաստանի Հանրապետութեան մէջ կը ձեւաւորուի կառավարման նոր համակարգ. այդ ճիշդ ժողովուրդի իշխանութիւնն է: Որովհետեւ այս արտայայտութիւնը թիւրըմբռնումներու առիթ կու տայ, անդրադառնամ, որ այս խօսքով նկատի ունիմ հետեւեալը. Հայաստանի Հանրապետութեան քաղաքացիները առաւել կարեւոր մասնակցութիւն պէտք է ունենան երկրի կառավարման՝ յատկապէս հանրաքուէներու միջոցով: Կը կարծեմ, թէ Հայաստանի մէջ սկսած է նոր գործընթաց մը, որ կը տարածուի աշխարհի մէջ: Կ՛ուզեմ հաւատալ, որ հայ ժողովուրդը եւ Հայաստան ստանձնած են դերակատարութիւն մը, որ ունի համաշխարհային նշանակութիւն, եւ կը կարծեմ, որ հայ ժողովուրդը ունի ներուժ, պատմութիւն եւ հմտութիւն աշխարհի մէջ նոր համակարգերու ստեղծումի ճանապարհին իր դերակատարութիւնը ունենալու համար:

Տեսնելով ներկաները՝ կ՛ուզեմ հաւատալ, որ մեր պետութիւնը կը դառնայ ժամանակակից քաղաքականութեան ոչ թէ ետնաբեմին մէջ, այլ ղեկավարութեան իր չափաբաժինը կը ստանձնէ: Հայ ժողովուրդը ունի այդ ներուժը եւ որպէս քրիստոնէութիւնը ընդունած առաջին ժողովուրդ՝ ես կը հաւատամ այն գաղափարին, որ մենք ունինք շատ աւելի լուրջ եւ մեծ կարողականութիւն: Մենք մեր ուժերը պէտք է մէկտեղենք, եւ անոր արդիւնքով է, որ Հայաստանի մէջ տեղի ունեցած են քաղաքական փոփոխութիւնները, որովհետեւ թաւշեայ յեղափոխութիւնը տեղի ունեցած է ոչ միայն Հայաստանի քաղաքացիներուն, այլ նաեւ Սփիւռքի գործօն մասնակցութեամբ: Ի՞նչ նկատի ունիմ մասնակցութիւն ըսելով. յստակ դիրքորոշում եւ տեսակէտ արտայայտելը այս հարցին մէջ ամենահզօր գործօնն էր, որ կրնար փոխել քաղաքական իրավիճակը Հայաստանի մէջ: Ինծի համար չափազանց կարեւոր է տեղի ունեցածին հոգեւոր, մշակութային եւ քաղաքական բովանդակութիւնը, որ ինչպէս պարզուեցաւ՝ պէտք է միաւորեր բոլորս: Ես կը հաւատամ, որ հայ ժողովուրդը նոր դերակատարութեան մը փուլը մտած է, եւ այդ նոր դերակատարութիւնը առաջին կարգին ազատ եւ երջանիկ հայրենիք կերտելն է: Կրնամ երաշխաւորել, որ այսօր Հայաստանի մէջ մարդիկ, առանց բացառութեան, հաւասար են օրէնքին առջեւ: Երկրին մէջ որեւէ մէկէ որեւէ բանով աւելի եւ պակաս չըլլալը այն անկիւնաքարն է, որուն վրայ կը կառուցուի մեր նոր իրականութիւնը:

Կ՛ուզեմ շնորհակալութիւն յայտնել այս վերաբերմունքին եւ ընդունելութեան համար: Շատ բաներ տակաւին չեն խօսուած, բայց կ՛ուզեմ հաւաստել, որ ձեր աչքերուն մէջ կարդացի այն բոլորը, զորս կ՛ուզէիք ըսել. յոյս ունիմ, որ իմ աչքերուն մէջ տեսաք այն բոլորը, զորս կ՛ուզէիք լսել: Մենք նոյն նահապետի յետնորդներն ենք, նոյն հայրենիքի զաւակներն ենք, նոյն երազանքները կրողներն ենք, նոյն յաղթանակը կերտողներն ենք եւ պէտք է ըլլանք միասին», ըսաւ վարչապետը:

Միտքերու փոխանակման ընթացքին վարչապետը պատասխանեց ֆրանսահայ գործիչներու հարցումներուն՝ Հայաստանի մէջ տեղի ունեցող փոփոխութիւններուն, ժողովրդավարութեան զարգացումին, փտածութեան դէմ պայքարին, առեւտրական միջավայրի բարելաւումին, ներդրումներու ներգրաւումին եւ այլ նիւթերու վերաբերեալ:

Այնուհետեւ վարչապետ Նիկոլ Փաշինեան Հայաստանի անկախութեան տօնին առիթով ֆութպոլիստ Եուրի Ճորկայէֆը պարգեւատրած է Երախտագիտութեան մետալով: Իւրի Ճորկայէֆ յայտնեց, որ իրեն համար մեծ պատիւ է արժանանալ նման պարգեւի եւ աւելցուց, որ զայն կը կրէ պատիւով ու հպարտութեամբ: «Հպարտ եմ ըլլալու Հայաստանի ներկայացուցիչներէն մէկը», ըսաւ Ճորկայէֆ:

Վարչապետ Նիկոլ Փաշինեան, շարունակելով աշխատանքային այցելութիւնը Ֆրանսա՝ երկրորդ օրը սկսաւ «Ֆրանսայի ձեռնարկութիւններու շարժում» կազմակերպութեան (MEDEF) անդամներուն հետ հանդիպումով: Կազմակերպութիւնը կը միաւորէ Ֆրանսայի շուրջ 7200 ընկերութիւններ, որոնք գործունէութիւն կը ծաւալեն զանազան ոլորտներու մէջ եւ կ՛օժանդակեն վերջիններուս դուրս գալ արտասահմանեան շուկաներ:

Կազմակերպութեան խորհուրդի նախագահ Ֆիլիփ Տելիոր, ողջունելով վարչապետը՝ յայտնեց, թէ յոյս ունի, որ Նիկոլ Փաշինեանի այցելութիւնը կ՛ըլլայ արդիւնաւէտ ու կը նպաստէ Հայաստանի եւ Ֆրանսայի միջեւ համագործակցութեան ընդլայնումին: Ֆիլիփ Տելիոր նաեւ յայտնեց, որ նկատի ունենալով երկու երկիրներու միջեւ պատմականօրէն ձեւաւորուած բարեկամական կապերու գոյութիւնը՝ MEDEF-ը շահագրգռուած է տնտեսական համագործակցութեան զարգացումով եւ ընդլայնումով, երկու երկիրներու գործարար շրջանակներուն միջեւ կապերու խորացումով ու պատրաստ է այդ ուղղութեամբ աշխոյժ աշխատանք տանելու:

LEAVE A REPLY

Please enter your comment!
Please enter your name here