ԵՐԲ ՊԻՏԻ ԾԱՂԿԻ ԱՐԱԲԱԿԱՆ ՄՏՔԻ ԳԱՐՈՒՆԸ

Մօտաւորապէս ամիս մը առաջ, ՄԱԿ-ի Ապահովութեան Խորհուրդի ամպիոնը բարձրանալով, նախագահ Պարաք Օպամա սպառնաց վեթօ օգտագործել պաղեստինեան պետութիւնը ճանչցող բանաձեւին դէմ: Նախագահին արտայայտած միտքերը, օգտագործած սպառնական նախադասութիւնները շատ աւելի մտահոգիչ էին, քանª կեցուածքը: Սահուն եւ հեզասահ ոճով, Օպամա արդարացուց այլ պետութիւններու հողերը բռնագրաւելու իսրայէլեան արարքները:
Անկախª իր նախընտրական խոստումը դրժելու իրողութենէն, Միացեալ Նահանգներու նախագահը, նոպէլեան մրցանակի մը արժանանալու չափ ՙտպաւորիչ՚ ելոյթով մը, անգամ մը եւս ոտնակոխեց Միջին Արեւելքի մէջ ամբողջական խաղաղութիւն հաստատելու կարելիութիւնները եւ ապացուցեց, թէ կը մնայ Իսրայէլի շահերուն եւ ազգային անվտանգութեան գերագոյն պաշտպանըª ձեռնասուն:
Սակայն յատկանշական էր, որ Ապահովութեան Խորհուրդի անդամ ոչ մէկ պետութիւն ծափահարութեամբ դիմաւորեց Օպամայի ելոյթը: Այսուհանդերձ, Օպամա եկաւ հաստատելու, թէ Իսրայէլի ֆաշական բանակը պիտի շարունակէ իր բռնատիրութեան տակ պահել հարաւային Լիբանանի մէկ հատուածը, Կոլանը, Երուսաղէմը, Կազան եւ Արեւմտեան Ափը:
Արաբական աշխարհի ղեկավարներուն վարած անհեռատես քայլերուն հետեւանքով դէպքերը կը զարգանան այնպէս, կարծէք արաբները յանցաւոր ըլլային բաց ձեռքերու մէջ չողջագուրելու Իսրայէլը, նոյնքան յանցաւոր, չերաշխաւորելու իսրայէլացի մանուկները դպրոց փոխադրող օթոպիւսներուն անվտանգութիւնը: Արդեօ՞ք նախքան 1967-ի պատերազմը, պաղեստինեան հողերու 22 առ հարիւրը իր սեփականատիրոջ վերադարձնելու սակարկութիւնները սպառնալիքի տակ կը դնեն Իսրայէլի ազգային անվտանգութիւնը: Արդեօ՞ք արաբական բռնագրաւուած հողերուն վրայ բնակութեան միաւորներու կառուցումը սպառնալիք չի ներկայացներ պաղեստինցիներու անվտանգութեան: Իսկ ընդհանրապէս, Ուաշինկթընի ենթագիտակցութեան մէջ գոյութիւն ունի պաղեստինցիներու անվտանգութեան, ազգային ինքնորոշման իրաւունքներու պաշտպանութեան մասին որեւէ հասկացողութիւն…: Օպամա խուսափեցաւ յիշատակելու Կազանª աշխարհի ամենախիտ բնակչութեամբ տարածութիւններէն մէկը, որուն բնակիչները տարուան տասներկու ամիսներուն ընթացքին զրկուած են ըմպելի ջուրէն, ելեկտրականութենէն, սովորական սննդանիւթերու բարիքներէն: Իսրայէլեան բարբարոս կառավարութիւններու քմայքէն կախեալª ըմպելի ջուր եւ ելեկտրականութիւն ստանալը տօնական օրերու համազօր ցնծութիւն է Կազայի շրջափակուած ժողովուրդին համար:
Օպամա կը խօսի խաղաղութեան մասին, սակայն բացատրութիւն չունի, ոչ ալ պատկերացում խաղաղութեան եզրին վերաբերեալ: Եւ մարդկային ինչպիսի հեգնանք, երբ Պարաք Օպամաª Միջազգային Դատական Ատեանին մօտ, իսրայէլեան բարբարոսութիւններուն դէմ հայց չբարձրացնելու երաշխիքներ կը պահանջէ Մահմուտ Ապպասէն…:
Պաղեստինեան պետականութեան դէմ Ուաշինկթընի վեթօն անակնկալ մը չէր, ամենեւին: Յիմար պէտք է ըլլալ կասկածելու, թէ ինքզինք աշխարհի միանձնեայ գերուժը համարող Միացեալ Նահանգները, փորձէ ըմբոստանալ Իսրայէլի դէմ: Համայն աշխարհ քաջատեղեակ էր պաղեստինցիներու վրայ, իսրայէլեան գաղութատիրութիւնը, ցեղային զտման քաղաքականութիւնը ջնջելու դէմ Ուաշինկթընի դնելիք արգելիքին: Դժբախտաբար, սխալ դուրս չեկան անոնց կանխատեսութիւնները…:
ՄԱԿ-ի մօտ պաղեստինցիներու ճաշակած դաւաճանութիւններուն պատմութիւնը բաւական երկար է: Անիկա կը սկսի 1945-էն: ՙԽաղաղութիւնը պիտի չգայ հաղորդագրութիւններու եւ բանաձեւերու ընդմէջէն՚ ըսաւ, Օպամա, մոռնալով, որ ՄԱԿ-ի որոշ մէկ բանաձեւին հիման վրայ անդամահատուեցաւ Պաղեստինը եւ ստեղծուեցաւ այսօրուան Իսրայէլը: Այսօրուան Իսրայէլի ծնունդը արաբներու հետ բանակցութիւններու հետեւանք չէր: Միացեալ Նահանգներու վարած երկդիմի քաղաքականութեան աւելի վար օրինակ գոյութիւն ունի՞ արդեօք, քան պաղեստինեան թղթածրարը:
Հաւանաբար ճիշդ այս պատճառով, Սէուտական Արաբիոյ արտաքին գործոց նախարար, իշխան Սաուտ Ֆայսալ կը պահանջէ վերատեսութեան ենթարկել ՄԱԿ-ի կառոյցը: Ան միաժամանակ կը պահանջէ սահմանափակել վեթոյի իրաւունքէն օգտուելու լիազօրութիւնները:
Ե՞րբ պիտի զարթնին արաբները, զգաստանան եւ գիտակցին, թէ Իսրայէլն է իրենց յաւիտենական թշնամին: Իսրայէլն է, որ բռնագրաւած է իրենց հողը, ինքնորոշման ու ազատ ապրելու իրաւունքը, եւ ոչª արաբը: Երբ պիտի արթննան, որ Իսրայէլն է նոյնինքն արաբներու ձեռքով արաբներու միջեւ համայնքային հակամարտութիւններ հրահրողը արաբական պետութիւնները, մէկ առ մէկ տնտեսապէս, քաղաքականապէս թուլացնոողը, որպէսզի թելադրէ իր պայմանները եւ ամրապնդէ իր անվտանգութիւնը:
ԱՀԱՐՈՆ ՇԽՐՏԸՄԵԱՆ
www.araraddailynews.com

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button