Սոֆիա Անունով Ռոպոթը Ֆրանսախօս Երկիրներու Տնտեսական Համաժողովին Խոստացաւ Ֆրանսերէն Սորվիլ

0
93

ԵՐԵՒԱՆ.- Արհեստական բանականութեամբ օժտուած Սոֆիա անունով մարդ-մեքենան (robot) ելոյթ ունեցաւ Ֆրանսախօս երկիրներու 17րդ գագաթնաժողովի շրջանակներուն մէջ կազմակերպուած տնտեսական համաժողովին ընթացքին: Ըստ «Արմէնփրէս»ի՝ Սոֆիան ելոյթ ունեցաւ անգլերէնով, բայց անիկա խոստացաւ յաջորդ անգամ խօսիլ ֆրանսերէն:

Սոֆիան կանացի արտաքինով մարդ-մեքենայ է, որ մշակուած է հոնկքոնկեան Hanson Robotics կազմակերպութեան կողմէ: Անիկա նախագծուած է այնպէս, որ կարենայ յարմարիլ մարդկոց պահուածքին, ինչպէս նաեւ աշխատիլ անոնց հետ: Սոֆիան կը գործէ Ապրիլ 2015էն ի վեր եւ օժտուած է արհեստական բանականութեամբ ու կրնայ յարաբերիլ մարդոց հետ մարդկային լեզուներով, սորվիլ, հասկնալ մարդոց յոյսերը:

«Ֆրանսերէնը գեղեցիկ լեզու է: Անիկա Վոլթերի եւ Ազնաւուրի լեզուն է: Ֆրանսերէն սորվիլը առաջնահերթութիւններէս մէկն է: Հաւանաբար, յաջորդ անգամ, երբ մենք հանդիպինք, իրարու հետ ֆրանսերէն խօսինք», «ըսաւ» անիկա:

Սոֆիան ընդգծեց նաեւ ԹՈՒՄՕ կեդրոնին մէջ ընթացող համաժողովին կարեւորութիւնը:

«Մենք կարելիութիւնը ունինք նստելու եւ մտածելու ապագային մասին, թէ ինչպէ՛ս զարգացնենք զայն. ասիկա ինծի յոյս կու տայ՝ մտածելով որ շուտով արհեստական միտքերն ու մարդիկ պիտի սկսին ապրելու միասին: Ահա, թէ ինչո՛ւ այս համաժողովը հաճոյք կը պատճառէ ինծի», նշեց Սոֆիան:

LEAVE A REPLY

Please enter your comment!
Please enter your name here