Ֆրանսախօս Երկիրներու Գագաթնաժողովին Մասնակիցները Ջերմ Ծափահարութիւններով Ողջունեցին Շառլ Ազնաւուրի Յաւերժական Ներկայութիւնը

0
196

Երեւանի մէջ տեղի ունեցող Ֆրանսախօս երկիրներու 17-րդ գագաթնաժողովին մասնակիցները ձեռնարկին սկիզբը ջերմ ծափահարութիւններով ողջունեցին աշխարհահռչակ հայ երգիչ Շառլ Ազնաւուրի յաւերժական ներկայութիւնը:

Ըստ Armenpress.am-ի՝ ՀՀ վարչապետ Նիկոլ Փաշինեան իր բացման խօսքին մէջ նշեց, թէ  կ՝ուզէ արտայայտել այն անսահման ցաւը, որ զինք կը համակէ Շառլ Ազնաւուրի մասին մտածելու պահուն:

«Այնքան արժէքաւոր անձնաւորութիւն մը, որ մեզմէ հեռացաւ 1 Հոկտեմբերին: Այդ մեծ անձնաւորութիւնը, ֆրանսերէն լեզուի դեսպանը 100 տոկոս ֆրանսացի էր, միեւնոյն ժամանակ 100 տոկոս հայ: Ինչպէս ինք կը սիրէր ըսել, կը փափաքէր երկար ժամանակ ըլլալ մեր կողքին՝ արտայայտելու իր նուիրուածութիւնը սիրելի երկու երկիրներուն՝ Ֆրանսային եւ Հայաստանին, նաեւ նշանաւորելու համար Ֆրանսախօս երկիրներու տօնը, որուն ամբողջ կեանքին ընթացքին կը ծառայէր: Ֆրանսական մեծ երգիչի գլուխգործոցները, որոնք արդէն բազմաթիւ սերունդներու ուղեկցած են եւ դեռ պիտի ուղեկցին, երկար պիտի մնան մեր յիշողութիւններուն մէջ: Մենք կը սգանք, որովհետեւ կը սիրենք: Ան, ըլլալով Հայաստանի եռանդուն պաշտպան, մեր երկրի դեսպանը միջազգային կազմակերպութիւններու մէջ, բարձր պահած է Հայաստանի անունը: Մենք յաւերժ երախտապարտ պիտի ըլլանք իրեն: Ան հեռացաւ մեզմէ, բայց ներկայ է մեր մտքերուն մէջ: Անոր յիշատակը 1 վայրկեան լռութեամբ յարգելու փոխարէն, կը խնդրեմ անոր յիշատակը տօնելու համար ջերմ ծափահարութիւններով ողջունել Շառլ Անզնաւուրի յաւերժական ներկայութիւնը»,- ըսաւ Նիկոլ Փաշինեան:

LEAVE A REPLY

Please enter your comment!
Please enter your name here