Ատրպէյճան «Նեղսրտած» Է Հայաստանի Մէջ Ֆրանսախօս Երկիրներու Գագաթնաժողովի Իրականացման Պատճառով

0
117

«Արմէնփրէս»ը կը հաղորդէ, թէ Հայաստանի մէջ ընթացող Ֆրանսախօս երկիրներու միջազգային կազմակերպութեան (ՖՄԿ) գագաթաժողովը չէ վրիպած Հայաստանի դրացիներուն ուշադրութենէն: Մասնաւորապէս, Ատրպէյճանի մէջ դժուարութիւն ունին համակերպելու այն իրողութեան հետ, որ Հայաստան այսպիսի մեծածաւալ հիւրընկալութիւն մը կազմակեպած է:

Առաւել քան 80 պատուիրակութիւններ, ներառեալ առաւել քան 25 պետութիւններու ղեկավարներու նոյն ժամանակ ներկայութիւնը մեծապէս կը նպաստեն Հայաստանի միջազգային հեղինակութեան բարձրացման:

Նշենք, որ գագաթնաժողովին յաջող իրականացումը պիտի նպաստէ Հայաստանի՝ իբրեւ յուսալի եւ վստահելի գործընկեր ընկալման միջազգային հարթակին վրայ:

Նկատելի է ատրպէյճանական քարոզչութեան աշխուժացումը, որ նպատակ ունի ստուեր նետել Ֆրանսախօս երկիրներու գագաթնաժողովին կարեւորութեանը: Պաքուի կողմէ շրջանառութեան մէջ դրուած են շարք մը թէզեր, որոնք ոչ միայն կը դիմանան որեւէ քննադատութեան, այլ նաեւ որոշ պարագաներու ծայրայեղութիւններու կը հասնին: Ատրպէյճանի մէջ այս օրերուն կասկածի տակ կը դնեն ոչ միայն «հայ-ֆրանսական պատմական յարաբերութիւններու գոյութիւն»ը, այլ նաեւ կը յայտարարեն, որ Հայաստանի մէջ նման ձեռնարկի մը իրականացումը «քաղաքական ուղերձ է Ռուսիոյ, որ կ՛ակնարկէ, թէ Հայաստան արեւմտամէտ քաղաքականութիւն կը վարէ»: Ատրպէյճանի մէջ այս օրերուն շրջանառութեան մէջ դրուած այլ տեսակէտի մը համաձայն՝ «Հայաստան ամբողջութեամբ մեկուսացուած է եւրասիական ընդելուզումէն»:

Ատրպէյճանական այս քարոզչութիւնը, բնականաբար, իրականութեան հետ ոչ մէկ աղերս ունի: Հայաստանի կողմէ իրականացող հաւասարակշռութեան եւ ընդելուզման գործընթացներու փոխլրացման քաղաքականութեան իբրեւ արդիւնք՝ Հայաստան չունի ընտրութեան հարց եւ բաց է՝ ամրապնդելու եւ խորացնելու յարաբերութիւնները բոլոր գործընկերներու եւ բարեկամ երկիրներու հետ: Պաքուին պէտք է յիշեցնել նաեւ, որ Ֆրանսախօս երկիրներու Արեւմուտքի հետ համեմատելը նոյնպէս անհեթեթութիւն է. այդ կառոյցը կը միաւորէ տարբեր երկիրներ աշխարհի բոլոր ցամաքամասերէն, ներառեալ՝ Ափրիկէէն եւ Ասիայէն:

LEAVE A REPLY

Please enter your comment!
Please enter your name here