Թուրքիոյ Մէջ Ազատ Արտայայտուելու Դէմ Արշաւը Կը Շարունակուի

0
127

ՊՈԼԻՍ, «Ակօս».- 9 Հոկտեմբերին տեղի ունեցաւ «Ակադեմականներ խաղաղութեան համար» հարթակի անդամներուն դատավարութեան առաջին նիստը:

Ինչպէս ծանօթ է, 1128 ակադեմականներ 2016ին ստորագրած էին՝ «Մեղսակից չենք ըլլար այս յանցագործութեան» խորագրեալ գրութիւն մը, քննադատելով քիւրտերուն դէմ թրքական զինուորական ուժերու գործողութիւնները եւ դատապարտելով կառավարութեան ռազմատենչ քաղաքականութիւնը:

Յայտարարութեան հրապարակումէն ետք անոնցմէ խումբ մը Մարտ 2016ին ձերբակալուած էր, իսկ աւելի ուշ պայմանականօրէն ազատ արձակուած:

Պոլսոյ 13րդ ոճրադատ ատեանին մէջ կայացող դատական նիստին ընթացքին դատախազը ամբաստանեալներուն համար պահանջեց բանտարկութեան պատիժ: Դատախազը իր պնդումները կը հիմնաւորէր ահաբեկչութեան դէմ պայքարի սահմաններով: Մեղադրեալներու պաշտպանութեան հայցերը լսելու համար, նիստը յետաձգուեցաւ 28 Յունուար 2019-ին:

Այս դատավարութիւնը անգամ մը եւս վիճելի կը դարձնէ Թուրքիոյ արդարադատական համակարգի որդեգրած ընկալումները, որովհետեւ շատերու համար անհասկնալի կը մնայ խաղաղութիւն քարոզելով՝ «ահաբեկչական մեղք» գործելու յարաբերակցութիւնը:

Նաեւ, Հոկտեմբեր 8ին եւ 9ին Տիգրանակերտի մէջ ոստիկաններ ձերբակալեցին բազմաթիւ քաղաքական գործիչներ եւ լրագրողներ: Քաղաքական գործիչները ընդհանրապէս քրտամէտ Ժողովուրդներու ժողովրդավարական կուսակցութեան անդամներն են:

Թուրքիոյ մէջ տնտեսական ճգնաժամը մէկ կողմէ կը ճնշէ հասարակութեան վրայ, անմիջականօրէն ազդելով անոր ամէնօրեայ կենցաղին վրայ, իսկ միւս կողմէ, իշխանութիւնները կը փորձեն հասարակութիւնը համոզել, թէ իրականութեան մէջ ճգնաժամ մը չկայ, երկրի տնտեսութիւնը ամուր հիմքեր ունի եւ կատարուածը պարզ դաւադրական խաղ մըն է երկրի ազգային դրամի կայունութեան դէմ: Սակայն այդքան ալ հաւաստի չեն թուիր այս բոլորը, որոնց հետեւանքով կառավարութիւնը կ՛ուզէ անգամ մը եւս սպառնալիքներու միջոցաւ սրել քաղաքական դաշտը եւ այդ եղանակով ալ ուշադրութիւնները շեղել տնտեսական նեղ կացութենէն:

Այս շաբաթ ձերբակալուածներուն մէջ կան նաեւ բազմաթիւ լրագրողներ ընդհանրապէս՝ «Մեզոփոթամիա» լրատու գործակալութենէն, «Ժին Նիւզ» եւ «Ենի Եաշամ» թերթերու անձնակազմէն:

Կը նշուի, որ ոստիկանութիւնը ունի 151 անուններէ բաղկացած ցանկ մը եւ այդ ցանկէն այս շաբաթ ձերբակալուած են աւելի քան 90 անձեր։

LEAVE A REPLY

Please enter your comment!
Please enter your name here