Նախագահը Հայաստանի Մէջ Ներդրումներ Կատարելու Լաւ Նախադրեալ Կը Համարէ Դրամատնային Կայունութիւնը

0
676

ԵՐԵՒԱՆ.- Այն փաստը, որ Հայաստանի մէջ յայտարարուած է եւ կ՛իրականացուի կաշառակերութեան դէմ պայքար, աշխարհի մէջ աննկատ չ՛անցնիր: Ըստ «Արմէնփրէս»ի՝ գործարարներու հետ հանդիպման ընթացքին վերոնշեալ կարծիքը յայտնեց Հայաստանի նախագահ Արմէն Սարգսեան: «Այդ պայքարը աննկատ չի մնար թէ՛ Միացեալ Նահանգներու, թէ՛ Ռուսիոյ եւ թէ Եւրոպայի մէջ: Ասիկա շատ դրական երեւոյթ է: Խօսքը ոչ միայն կաշառակերութեան դէմ պայքարի, այլ ընդհանրապէս դատաիրաւական համակարգը բարելաւելու քայլերուն մասին է: Մենք կ՛ուզենք ունենալ այն դատարանը, զոր մենք կ՛երազենք ունենալ, որովհետեւ չի կրնար գործարարութիւնը զարգանալ, երկրին մէջ ներդրումներ չեն կրնար ըլլալ, եթէ մարդիկ դատարաններուն չեն վստահիր: Եթէ ուշադիր ըլլանք աշխարհի մէջ ամենամեծ ներդրումային ծաւալներ ունեցող երկիրները ունին լաւագոյն դատաիրաւական համակարգը», ըսաւ Հայաստանի նախագահը՝ ընդգծելով, որ շատ կը փափաքէր, որ Հայաստանի մէջ զարգանար նաեւ իրաւարարութեան դատարանի մշակոյթը:

Նախագահը Հայաստանի մէջ ներդրումներ կատարելու, աշխատանք սկսելու համար լաւ նախադրեալ կը համարէ երկրի դրամատնային եւ տնտեսական համակարգին կայունութիւնը: «Ես ամէն առիթով կ՛ըսեմ, որ Հայաստանի մէջ յեղափոխութիւն եղաւ, բայց մեր դրամն ու դրամատնային համակարգը անփոփոխ մնացին: Ասիկա հսկայական առաւելութիւն է մարդոց գիտակցութեան մէջ, որ Հայաստան կայուն տնտեսական համակարգ ունի, եւ, եթէ Հայաստանի մէջ արժոյթը եւ դրամատնային համակարգը ճակատագրական փոփոխութիւններու ընթացքին կայուն կը մնան, հետեւաբար կարելի է երկրին վստահիլ», ընդգծեց նախագահը:

Արմէն Սարգսեան յայտնեց, որ այս տարուան ապրիլեան դէպքերը Հայաստանը բարձրացուցին ամենաբարձր մակարդակի, որովհետեւ այսօրուան անկայուն աշխարհի մէջ մարդկային, գեղեցիկ ձեւով տեղի ունեցող գործընթացները կը դառնան արժէքաւոր: «Հայաստան այսօր որեւէ իմաստով իւրօրինակ, իւրայատուկ երկիր է, ուր տեղի ունեցած է մեծ փոփոխութիւն, պատմական փոփոխութիւն, տեղի ունեցած է յեղափոխութիւն, բայց՝ շատ պարզ եւ մարդկային ձեւով: Եւ մենք որեւէ իմաստով իւրօրինակ ենք, որովհետեւ անկայուն աշխարհի մէջ կայ մէկ տեղ, ուր իր ձեւով յեղափոխութիւն կատարուած է: Այսինքն, ասիկա ամենաբարձր մակարդակն է գործարար շրջանակներու մէջ մարդոց գիտակցութեան մէջ, որ Հայաստան տարբեր է, իւրօրինակ է, հետեւաբար, Հայաստանի նկատմամբ վերաբերումը տարբեր է», ընդգծեց Արմէն Սարգսեան:

Հայաստանի նախագահը մեր երկրի դիմագիծին համար դրական համարեց ֆրանսախօս երկիրներու միջազգային կազմակերպութեան գագաթնաժողովի բարձր մակարդակով իրականացումը Երեւանի մէջ եւ շնորհակալութիւն յայտնեց աշխատանքներ տարած դիւանագէտներուն, ինչպէս նաեւ կառավարութեան՝ ձեռնարկը փայլուն կերպով կազմակերպելնուն եւ իրականացնելնուն համար: Արմէն Սարգսեան յայտնեց, որ հրամանագիրներ ստորագրած է նշեալ գագաթնաժողովը բարձր մակարդակով կազմակերպելու եւ իրականացնելու գործին մէջ ներդրում ունեցած կարգ մը անհատներ պարգեւատրելու մասին:

LEAVE A REPLY

Please enter your comment!
Please enter your name here