Դեսպան Մկրտչեան Հրաժեշտի Հանդիպումներ Ունեցաւ Նախագահ Աունի Եւ Պըրրիի Հետ

0
536

Լիբանանի մէջ Հայաստանի դեսպան Սամուէլ Մկրտչեան հրաժեշտի այցելութեամբ մը ուղղուեցաւ Պաապտա, ուր հանդիպում մը ունեցաւ հանրապետութեան նախագահ զօր. Միշել Աունի հետ:

Հանդիպումին ընթացքին նախագահ Աուն բարձր գնահատեց դեսպան Մկրտչեանի ջանքերը` երկկողմանի յարաբերութիւնները ամրապնդելու եւ լիբանանեան-հայկական համագործակցութիւնը աշխուժացնելու առումով:

Նախագահ Աուն յաջողութիւն մաղթեց դեսպան Մկրտչեանին` Լեհաստանի մէջ Հայաստանի դեսպանը դառնալու իր նոր պաշտօնին առիթով:

Պըրրիի Մօտ

Դեսպան Մկրտչեան այցելեց նաեւ Այն Թինէ, ուր հանդիպում ունեցաւ խորհրդարանի նախագահ Նեպիհ Պըրրիի հետ:

Հանդիպումին ընթացքին դեսպան Մկրտչեան Պըրրիին ներկայացուց Հայաստանի ներքին քաղաքական զարգացումները, յառաջիկայ արտակարգ խորհրդարանական ընտրութիւններուն նախապատրաստական աշխատանքներուն ընթացքը եւ զանոնք բարձր մակարդակով կատարելու ակնկալութիւնները` իբրեւ թաւշեայ, ոչ բռնի, ժողովրդական յեղափոխութեան տրամաբանական փուլ:

Հայաստանի դեսպանը հաստատեց, որ իր պաշտօնավարութեան ընթացքին ճիգ չէ խնայած ամրապնդելու ու զարգացնելու երկու բարեկամ երկիրներու յարաբերութիւնները եւ բոլոր մարզերուն մէջ երկկողմանի գործակցութիւնը աշխուժացնելու:

Միւս կողմէ, ընդգծելով հայ-լիբանանեան յարաբերութիւններու ջերմ եւ բարեկամական բնոյթը` Պըրրի գնահատեց կատարուած աշխատանքը եւ յաջողութիւն մաղթեց Սամուէլ Մկրտչեանին, իր հետագայ դիւանագիտական գործունէութեան մէջ:

LEAVE A REPLY

Please enter your comment!
Please enter your name here